Sione ke motse oa Molimo
1Pesalema ea bara ba Kora. Sefela.
2Morena o moholo,
o lokeloa ke thoriso e kholo
motseng oa Molimo oa rōna,
thabeng ea hae e halalelang.
3Thaba ea Sione ea khahleha,
e khahleha ka bophahamo ba eona,
e thabisa lefatše lohle;
e ka leboea
ho motse oa Khosi e kholo.
4Molimo o teng matlung a bokhosi,
matlung a bokhosi a motse oo,
eena o tsejoa e le qhobosheane.
5Bonang, likhosi li ile tsa kopana,
tsa o futuhela li le 'moho.
6Tsa o bona, 'me tsa hlolloa;
tsa ferekana, 'me tsa baleha.
7Tsa tšoaroa ke thōthōmelo,
ea li tšoara hona moo,
le bohlōkō bo kang ba pelehi;
8joalokaha moea oa bochabela
o pshatlakanya likepe,
kepe tsa Tarashishe.
9Seo re se utloileng re bile re se bone
motseng oa Morena oa mabōtho,
motseng oa Molimo oa rōna,
oo Molimo a o tiisitseng
ka ho sa feleng.
10Molimo, re hopola mohau oa hao
re le ka Tempeleng ea hao.
11Joaloka lebitso la hao Molimo,
thoriso ea hao e fihla joalo,
e fihla joalo pheletsong tsa lefatše.
Tsoho la hao le letona le tletse toka.
12Thaba ea Sione e ke e thabe;
metse ea Juda e ke e nyakalle
ka baka la kahlōlo tsa hao.
13Pota-potang Sione, le e potolohe,
balang litora tsa eona;
14elang hloko lerako la eona,
rako la eona la tšireletso,
hlahlobang matlo a eona a bokhosi,
le tle le phetele molōko o tlang,
le re:
15“Enoa ke Molimo,
ke Molimo oa rōna
kamehla le mehla,
o tla re tsamaisa.”
