Bophelo ba motho bo feta kapele
1Pesalema ea Davida, e qapetsoeng motsamaisi oa libini; ea Jedutune.
2Ke ile ka re:
“Ke tla hlokomela metsamao ea ka,
ke tle ke se ke ka etsa sebe
ka leleme la ka;
ke tla tšoara leleme la ka
ha ea khopo a ntse a le pel'a ka.”
3Ke ne ke khutsitse joaloka semumu,
ke thōtse;
ka baka la katleho ea hae,
bohlōkō ba ka ba 'na ba tōta,
4pelo ea ka ea tlallana,
ha ke ntse ke feheloa
ka tuka malakabe,
ka ba ka bua, ka re:
5“Morena, ak'u ntsebise
pheletso ea ka,
le bolelele ba matsatsi a ka;
a nke ke tsebe
hore na bophelo ba ka
bo feta kapele hakaakang!
6Bona, matsatsi a ka u a lekantse,
u a lekantse ka bophara ba seatla,
bolelele ba bophelo ba ka
hase letho mahlong a hao.
Ruri motho ea phelang ke lefeela.
7“Motho ea tsamaeang
o ka seriti feela,
maruo ao a ipōkellelang 'ona
ke lefeela;
ha a tsebe
hore na a tla sebelisoa ke mang.”
8Joale, Morena,
ekaba ke sa lebeletse'ng?
Tšepo ea ka e ho uena.
9Ntopolle litlōlong tsa ka tsohle,
se nketse sesomo ho lithoto.
10Ke joaloka semumu, ha ke na puo,
hobane ke uena ea sebetsang.
11Mphemise likotlo tsa hao,
letsoho la hao le nqetile.
12U khalemela motho ka ho mo otla,
ka ho mo otlela melato ea hae,
u felisa seo a se ratang
joalokaha eka se jeoa ke tšoèlè.
Ruri motho ke lefeela.
13Morena, ak'u utloe thapelo ea ka,
u sekehele thapeli ea ka tsebe,
u se hane ho mamela sello sa ka.
Ke mojaki naheng ea hao,
ke mofeti joaloka bo-ntate.
14Se ntjamele, ke tle ke thabe,
ke e-s'o ikele, 'me ka ba sieo.
