LIPESALEMA 3

₂Morena, lira tsa ka

li ngata hakaakang!

Ba bangata ba ntsohelang matla,

₃ba bangata ba buang ka 'na, ba re:

“Molimo ha a na ho mo pholosa.”

₄Empa uena Morena,

u thèbè e ntšireletsang,

u mpha seriti, u ntsosa molota.

₅Ha ke ipiletsa ho Morena,

o nkaraba a le thabeng ea hae

e halalelang.

₆Ke ee ke ithoballe, ke khalehe,

ke be ke itsohele,

hobane Morena o na le 'na.

₇Ha ke tšabe likete-kete tsa batho

tse ntikileng kamahohle.

₈Thusa, Morena!

U mpholose, Molimo oa ka,

uena ea jabelang

lira tsa ka tsohle marameng,

ea pshatlang mehlaare ea ba khopo.

₉Pholoho e tsoa ho Morena.

Tlhohonolofatso ea hao

e ke e be holim'a sechaba sa hao.