LIPESALEMA 2

₁Moferefere ke oa eng har'a lichaba?

Machaba a rerela'ng

ntho tsa mafeela?

₂Likhosi tsa lefatše

li eme ka maoto;

babusi, ba le 'moho,

ba rera Morena

le Motlotsuoa oa hae, ba re:

₃“A re itokolleng litlamong tsa bona,

re lahleng joko ea bona.”

₄Ea lutseng teroneng, leholimong,

oa ba tšeha,

Morena oa ba soma.

₅Joale o bua le bona ka khalefo,

ka bohale ba hae oa ba tšosa, o re:

₆“Thabeng ea ka e halalelang,

thabeng ea Sione,

'na ke beile khosi ea ka.”

₇Eona e re: “A nke ke phatlalatse

taelo ea Morena.

“O itse ho 'na: ‘U mora oa ka;

kajeno ke u tsoetse.

₈Nkōpe, ke tla u nea lichaba

e be lefa la hao,

le lefatše ka bophara ba lona

e be leruo la hao.

₉U tla li busa ka lere la tšepe,

u li pshatle

joaloka nkho ea letsopa.’ ”

₁₀Joale he, hlalefang, lōna likhosi;

eletsehang, lōna babusi ba lefatše.

₁₁Sebeletsang Morena ka tšabo,

le itihele maotong a hae

ka thōthōmelo.

₁₂Ho seng joalo o tla halefa,

'me le timelle tseleng ea lōna;

hobane khalefo ea hae

e phakisa ho tuka.

Ho lehlohonolo bohle

ba tšabelang ho eena.