LIPESALEMA 16

Ak'u mpaballe Molimo,

hobane ke tšabela ho uena.

₂Ke re ho Morena:

“Ke uena Morena oa ka,

ha ke na lehlohonolo

ntle ho uena.”

₃Ha e le melimo ea bohata

e lefatšeng,

ba khahloang ke eona

ba rōhakehile.

₄Ba mathang kamora' eona

ba ipakela mahlomola;

nke ke ka e etsetsa nyehelo ea mali,

esita le ho bolela mabitso a eona,

ho a bolela ka molomo oa ka.

₅Morena, ke uena lefa la ka

le mohope oa ka;

tseo ke nang le tsona

li tsoa ho uena.

₆Ke sehetsoe khubung,

ruri ke thabela lefa la ka.

₇Ke tla boka Morena, moeletsi oa ka;

le bosiu pelo ea ka ea ntemosa.

₈Kamehla

ke ntse ke hopotse Morena,

hobane o ka tsohong la ka

le letona,

nke ke ka sisinngoa.

₉Kahoo pelo ea ka e thabile,

moea oa ka o nyakaletse,

le oona 'mele oa ka o tla phomola,

o tla phomola o phutholohile;

₁₀u ke ke

ua ntlohela Qalong ea Bafu,

u ke ke

ua lesela motšepuoa oa hao,

ua mo lesella ho bolla lebitleng.

₁₁U tla mpontša tsela ea bophelo;

thabo e khaphatsehang

e fumanoa ho uena,

ho ba ka tsohong la hao le letona

ke monyaka o sa feleng.