LIPESALEMA 146

₁Haleluja!

Boka Morena, uena moea oa ka!

₂Ke tla rorisa Morena

ha ke ntse ke phela;

ke tla roka Molimo oa ka

bophelong ba ka bohle.

₃Le se ke la tšepa mahosana,

leha e le motho ea se nang matla,

matla a ho pholosa.

₄Hoba a neele moea,

motho o khutlela mobung;

ka lona tsatsi leo

merero ea hae ea fela.

₅Ho lehlohonolo

eo Molimo oa Jakobo

e leng thuso ea hae;

eo Morena Molimo oa hae,

e leng tšepo ea hae.

₆Ke eena

ea entseng maholimo le lefatše,

leoatle le tsohle tse ho lona.

O tšepahala kamehla,

₇o ahlōlela ba hateletsoeng,

o fepa ba lapileng;

Morena o lokolla batlamuoa,

₈Morena o tutubolla mahlo a lifofu.

Morena o phahamisa

ba khokhopaneng;

Morena o rata ba lokileng.

₉Morena o sireletsa bajaki,

o thusa khutsana le mohlolohali,

athe merero ea ba khopo

oa e nyōpisa.

₁₀Morena o busa kamehla eohle;

Molimo oa hao, Sione,

ke oa melōko eohle.

Haleluja!