Boholo ba Molimo le molemo oa hae
1Pesalema ea Davida. Thoko.
Ke tla u tumisa,
uena Molimo oa ka
u leng Khosi ea ka,
ke boke lebitso la hao
kamehla le mehla.
2Ke tla u boka
ka letsatsi le leng le le leng,
ke rorise lebitso la hao
kamehla le mehla.
3Morena o moholo,
o lokeloa ke thoriso e kholo,
boholo ba hae ha bo fihleloe.
4Molōko ho isa molōkong o mong
o tlotlisa mesebetsi ea hao,
o bonahatsa ketso
tsa bonatla ba hao.
5Batho ba tla bolela
khanya ea tlōtla ea hao,
'na ke nahane limakatso tsa hao.
6Ba tla bolela
matla a ketso tsa hao tse tšabehang,
'na ke phete tsa boholo ba hao.
7Ba tla etsa khopotso
ea molemo oa hao o moholo,
ba etsetse ho loka ha hao litlatse.
8Morena o mosa,
o na le kutloelo-bohlōkō,
o lieha ho halefa,
o tletse mohau.
9Morena o molemo ho bohle,
lerato la hae
le aparela mesebetsi eohle ea hae.
10Morena, mesebetsi eohle ea hao
ea u leboha,
le batšepuoa ba hao baa u boka;
11ba bolela tlōtla ea 'muso oa hao,
ba bua ka liketso tsa bonatla ba hao.
12Ba tsebisa batho bohle
liketso tsa bonatla ba hao,
le tlōtla e khanyang
ea 'muso oa hao.
13'Muso oa hao
ke 'muso oa kamehla eohle,
le puso ea hao
ke ea melōko eohle.
Morena o tšepahala
lipolelong tsohle tsa hae,
o mohau mesebetsing eohle ea hae.
14Morena o tšehetsa bohle ba oang,
o phahamisa bohle
ba khokhopaneng.
15Mahlo a bohle a lebeletse uena,
hore u ba fepe ka nako e lokelang.
16Ha u fuparolla seatla,
u khōrisa tsohle tse phelang
ka tseo li li lakatsang.
17Morena o lokile
ho tsohle tseo a li etsang,
mesebetsing eohle ea hae
o mohau.
18Morena o haufi
le bohle ba mo rapelang,
ba mo rapelang kannete.
19O phetha litakatso
tsa ba mo tšabang,
o utloa sello sa bona,
'me oa ba pholosa.
20Morena o baballa bohle
ba mo ratang,
empa bohle ba khopo oa ba timetsa.
21Molomo oa ka
o ke o rorise Morena;
batho bohle ba boke
lebitso la hae le halalelang,
ba le boke kamehla le mehla.
