LIPESALEMA 111

₁Haleluja!

Ke tla boka Morena

ka pelo ea ka eohle,

ke le phuthehong ea ba lokileng.

₂Mesebetsi ea Morena e meholo,

e fuputsoa ke bohle ba e thabelang.

₃Mosebetsi oa hae

o bonahatsa tlōtla le botlōtlehi,

ho loka ha hae

ho teng kamehla eohle.

₄O entse hore limakatso tsa hae

li se ke tsa lebaloa;

Morena o mosa,

o na le kutloelo-bohlōkō.

₅O fepa ba mo tšabang;

o hopola selekane sa hae kamehla.

₆O bontšitse sechaba sa hae,

a se bontša matla

a mesebetsi ea hae,

ka ho se nea lefa la balichaba.

₇Mesebetsi ea liatla tsa hae

ea tšepahala,

mesebetsi ea hae e lokile,

litaelo tsohle tsa hae ke tsa 'nete;

₈li etselitsoe mehla eohle,

li hlophiloe ka botšepehi

le ka ho loka.

₉O lopolotse sechaba sa hae,

a laela hore selekane sa hae

e be sa kamehla eohle;

lebitso la hae lea halalela,

'me lea tšabeha.

₁₀Qaleho ea bohlale

ke ho tšaba Morena,

bohle ba seli ba phela joalo.

O lokeloa ke thoriso kamehla.