LIPESALEMA 103

Boka Morena, uena moea oa ka;

botho bohle ba ka

bo boke bitso la hae le halalelang.

₂Boka Morena, uena moea oa ka;

u se ke ua lebala

melemo eohle ea hae.

₃Ke eena ea u tšoarelang

melato ea hao kaofela,

ke eena ea u folisang

mahlōkōng a hao kaofela.

₄Ke eena ea u lopollang lebitleng,

ke eena ea u qhakang ka mohau,

ea u qhakang le ka lerato.

₅Ke eena ea u fepang tse molemo

bophelong bohle ba hao,

hore u boele u nchafale,

u nchafale joaloka ntsu.

₆Morena o sebetsa ka ho lōka,

o ahlōlela bohle ba hateletsoeng.

₇O ne a tsebise Moshe litsela tsa hae,

a bontša bana ba Iseraele

liketso tsa hae tse kholo.

₈Morena o na le kutloelo-bohlōkō,

Morena o mosa;

o lieha ho halefa, o tletse mohau.

₉Ha a re tsekise ho-ea-ho-ile;

ha a re jare ka pelo kamehla eohle.

₁₀Ha a re otle

ho ea ka libe tsa rōna,

ha a re putse

ho ea ka melato ea rōna.

₁₁Joalokaha maholimo

a phahametse lefatše,

le mohau oa Molimo o moholo,

o moholo hakaalo ho ba mo tšabang.

₁₂Joalokaha bochabela

bo le hōle le bophirimela,

le litlōlo tsa rōna oa li suthisa,

o li suthisetsa hōle le eena hakaalo.

₁₃Joalokaha ntat'a bana

a ba utloela bohlōkō,

ka mokhoa o joalo le Morena

o utloela ba mo tšabang bohlōkō.

₁₄Ke hobane eena o tseba

seo re bōpiloeng ka sona,

ha a lebale hore re lerōle feela.

₁₅Litšiu tsa motho

li tšoana le tsa joang;

o tlōkōma joaloka palesa ea naha;

₁₆ha moea o fōka holim'a eona

ea fela,

ebe litulo tsa eona

li sala li le feela.

₁₇Empa mohau oa Morena,

ho ba mo tšabang,

ke oa kamehla eohle,

e se nang qaleho le qetello;

le ho lōka ha hae ho fihla

le litlōhō-tlōhōloaneng tsa bona,

₁₈ho ba bōlōkang selekane sa hae,

ba hopolang

ho phethahatsa litaelo tsa hae.

₁₉Morena o beile terone ea hae,

o e beile maholimong,

tsohle li tlas'a puso ea hae.

₂₀Bokang Morena,

lōna mangeloi a hae,

lōna bahale

ba phethang taelo tsa hae,

ba mamelang seo a se bolelang.

₂₁Bokang Morena,

lōna mabōtho a hae 'ohle,

lōna basebeletsi ba hae

ba phethang thato ea hae.

₂₂Bokang Morena,

lōna mesebetsi ea hae eohle,

hohle moo a busang teng.

Boka Morena, uena moea oa ka.