MAELE 13

₁Mora ea bohlale

o mamela thuto ea ntat'ae,

empa moikakasi

ha a natse khalemo.

₂Motho o khōla tholoana tse monate,

tholoana tsa lipuo tsa hae,

ea sa tšepahaleng

eena o lapetse mahahapa.

₃Ea tšoarang leme la hae

o baballa bophelo ba hae,

ea phasolohang feela

eena o tla timela.

₄Sekhōba sea lakatsa,

empa ha se fumane letho,

sekhothali sea atleha,

se khotsofatsoa ke tsohle.

₅Motho ea lokileng o hloile leshano,

ea khopo ha a na lihlong,

oa soabisa.

₆Toka e sireletsa ea lokileng,

bokhopo bona

bo kulupanya baetsalibe.

₇E mong o iketsa morui,

a se na letho,

e mong a iketse mofutsana,

a hafa ka nkatana.

₈Bophelo ba motho

bo ka lopolloa ka maruo a hae,

mofumanehi eena

ha a ke a sokeloa ke motho.

₉Lebone la ea lokileng

le tuka haholo,

empa bone la ea khopo

lona le tla tingoa.

₁₀Likhang li hlahisoa ke boikakaso,

bohlale bo fumanoa

ho ba mamelang likeletso.

₁₁Maruo a bolotsana a tla fela hang,

a kolletsoang kahanyane

'ona aa eketseha.

₁₂Tšepo e sa phethahaleng

e nyahamisa pelo,

takatso tse phethahatsoang

li ka fate sa bophelo.

₁₃Ea nyefolang likeletso

o tla timela,

ea bolokang molao

o tla amohela moputso.

₁₄Thuto ea ea bohlale

ke seliba sa bophelo,

e phemisa motho maraba a lefu.

₁₅Kelello e chatsi ho bohle

ea khahleha,

tsela ea ba sa tšepahaleng

e isa timelong.

₁₆Motho ea bohlale

o sebetsa ka kelello,

sethoto sona

se pepesa bothoto ba sona.

₁₇Leqosa le khopo

le oeloa ke litsietsi,

morōmuoa ea tšepahalang

o tlisa tse molemo.

₁₈Bofuma le lihlong

li oela ea hanang khalemo,

tlōtla e aparela

ea sa haneng ho nyatsuoa.

₁₉Se labalabeloang ha se fihletsoe

sea thabisa,

lithoto tsona ha li rate ho tela bobe.

₂₀Ea tsamaeang le bahlalefi

oa hlalefa,

molekane oa lithoto

eena oa thotofala.

₂₁Bobe bo salama baetsalibe,

ba lokileng bona

ba putsoa ka tse molemo.

₂₂Monna ea lokileng

o siela tlōhōlō tsa hae lefa,

leruo la moetsalibe

ke lefa la ba lokileng.

₂₃Masimong a mofutsana

chai e ba ngata,

ba hlokang toka bona baa e felisa.

₂₄Motho ea sa shapeng mor'a hae

o mo hloile,

athe ea ratang mor'a hae

eena oa mo khalema.

₂₅Ea lokileng oa ja,

a ikhotsofatse,

empa ea khopo

eena o ngongorehela lijo.