LIPALO 6

₁Morena a bua ho Moshe, a re:

₂“Bua le bana ba Iseraele, u re ho bona: ‘Ha monna kapa mosali a etsa kano e khethehileng, e leng kano ea mokhethoa, ea ho ikabela Morena, ₃o tla ila veine le joala. A se ke a noa asene e entsoeng ka veine, kapa a noa asene e tahang. A se ke a noa lero la morara. A se ke a ja morara o mocha kapa oa mangangajane. ₄Ka matsatsi 'ohle a bokhethoa ba hae, a se ke a ja letho le entsoeng ka morara, e ka ba litholoana tsa oona kapa makhapetla a oona.

₅“ ‘Ka matsatsi 'ohle a ho ikanela bokhethoa, a se ke a beola moriri oa hae. Ho fihlela matsatsi a hae a ho ikabela Morena a fela, o tla halalela. O tla tlohela moriri oa hae o hōle, o be sehlōthō. ₆Ka matsatsi 'ohle a hae a ho ikabela Morena, a se ke a atamela pel'a setōpō. ₇E ka ba sa ntat'ae, kapa sa 'm'ae, kapa sa ngoan'abo, kapa sa khaitseli ea hae, a se ke a itšilafatsa ka tsona, hobane khalaletso ea Molimo oa hae e holim'a hlooho ea hae. ₈Ka matsatsi 'ohle a bokhethoa ba hae, oa halalela ho Morena.

₉“ ‘Haeba motho a e-shoa hang-hang pel'a moo mokhethoa a leng teng, 'me a silafatsa hlooho ea hae e halalelitsoeng, o tla beola hlooho ea hae mohl'a letsatsi la tlhoekiso ea hae; o tla beola ka letsatsi la bosupa. ₁₀Ka letsatsi la borobeli o tla tlisa maebana-khoroana a mabeli, kapa malinyane a mabeli a maeba, ho moprista, monyakong oa Tente ea Morena. ₁₁Moprista o tla nyehela ka le leng e le nyehelo e tlosang sebe, 'me le leng e be la nyehelo ea secheso. O tla mo etsetsa tefelo ea sebe, hobane a entse sebe ka baka la motho eo ea shoeleng, 'me ka lona letsatsi leo a be a halaletse hlooho ea hae. ₁₂O tla ikabela Morena bocha, matsatsing ao a bokhethoa ba hae, a be a tlise nku e tona e nang le selemo, e le nyehelo e tlosang molato. Empa matsatsi a pele ha a na ho ba le thuso, hobane bokhethoa ba hae bo ile ba silafatsoa.

₁₃“ ‘Ona ke molao oa mokhethoa oa Molimo. Ha matsatsi a khalaletso ea hae a fetile, o tla tlisoa monyakong oa Tente ea Morena. ₁₄O tla tlisetsa Morena nyehelo ea hae, e leng nku e tona e nang le selemo, e se nang sepha, e le ea nyehelo ea secheso; le nku e tšehali e nang le selemo, e se nang sepha, e le ea nyehelo e tlosang sebe; le pheleu e le 'ngoe, e se nang sepha, e le ea nyehelo ea teboho. ₁₅A tlise le serōtō se nang le bohobe bo sa lomosoang, ba phofo e thumisehileng, le maqebekoane a lubiloeng ka ole, le moqathane o sa lomosoang, o tlotsitsoeng ka ole; le nyehelo ea bona ea lijo, le linyehelo tsa bona tsa lino.

₁₆“ ‘Moprista o tla li tlisa kapele ho Morena, a be a mo etsetse nyehelo e tlosang sebe, a mo etsetse le nyehelo ea secheso. ₁₇Ka pheleu le ka serōtō se nang le bohobe bo sa lomosoang, moprista o tla etsetsa Morena sehlabelo sa nyehelo ea teboho, 'me moprista a be a mo etsetse le nyehelo ea lijo, le nyehelo ea lino.

₁₈“ ‘Mokhethoa o tla beola hlooho ea hae e halalelang, a le monyakong oa Tente ea Morena, 'me a nke moriri oa hlooho eo e halalelang, a o akhele mollong o besitsoeng katlas'a sehlabelo sa nyehelo ea teboho.

₁₉“ ‘Moprista o tla nka sephaka sa pheleu, se phehiloeng; le leqebekoane le le leng le sa lomosoang, le ka serōtōng; le moqathane o le mong o sa lomosoang, 'me tsena a li bee matsohong a mokhethoa, ha a qetile ho beola hlooho ea hae e halalelitsoeng. ₂₀Moprista o tla li akhōtsa, e le nyehelo e akhōtsoang kapele ho Morena. Lia halalela, 'me ke tsa moprista, hammoho le sefuba sa nyehelo e akhōtsoang, le sephaka sa nyehelo e phahamisoang. Kamora' moo mokhethoa o tla noa veine.

₂₁“ ‘Ona ke molao oa mokhethoa oa Molimo, ea ikanneng. Ena ke nyehelo ea hae ho Morena, ka baka la khalaletso ea hae, feela ho sa baloe tse ling, tseo a ka tsebang ho li tlisa. Kathōko ho tsena tse hlokoang ke molao oa khalaletso, mokhethoa oa Molimo o tla phetha tsohle ho ea ka kano eo a ikanneng ka eona.’ ”

₂₂Morena a bua ho Moshe, a re: ₂₃“Bua le Arone le bara ba hae, u re: ‘Ha le hlohonolofatsa bana ba Iseraele, le re ho bona:

₂₇“Ba tla rapella bana ba Iseraele ka lebitso la ka, 'me 'na ke tla ba hlohonolofatsa.”