Teleko ea ba sa hloekang
1Morena a bua ho Moshe, a re:
2“Laela bana ba Iseraele hore ba leleke balepera bohle kahar'a liahelo, le bohle ba nang le seso se qhitsang lero, le bohle ba silafalitsoeng ke ho ama setōpō. 3U leleke banna le basali; u ba lelekele kathōko ho liahelo, ba tla ba se ke ba silafatsa liahelo tsa bona, tseo ke phelang har'a tsona.” 4Bana ba Iseraele ba etsa joalo, ba ba lelekela kathōko ho liahelo joalokaha Morena a ne a buile ho Moshe.
Linyehelo tsa puseletso
5Morena a bua ho Moshe, a re: 6“Bolella bana ba Iseraele, u re: ‘Ha monna kapa mosali a ka etsa sebe sefe kapa sefe se eeng se etsoe ke batho, 'me kahoo a siteloa Morena ka ho se tšepahale, motho eo o tla ba molato. 7O tla ipolela sebe seo a se entseng, a lefe molato oa hae ka ho tlala, 'me a be a eketse tefo eo ka karolo ea eona ea bohlano, a e nee eo a mo sitetsoeng. 8Empa haeba motho ea sitetsoeng a se na monèkètsèla oo tefo ea molato e ka isoang ho oona, tefo eo ea molato e tla lefeloa Morena, 'me e tla ba ea moprista. Tefo ena ke e kathōko ho pheleu ea tefelo ea sebe, eo moprista a tla mo etsetsa tefelo ea sebe ka eona. 9Nyehelo e 'ngoe le e 'ngoe e phahamisetsoang holimo, ea lintho tsohle tse halalelang tsa bana ba Iseraele, eo ba e tlisetsang moprista eo, e tla ba ea moprista. 10Lintho tse halalelang tsa motho e mong le e mong e tla ba tsa moprista; seo motho ofe kapa ofe a se neang moprista, e tla ba sa moprista.’ ”
Mosali ea belaelloang ka ho feba
11Morena a bua ho Moshe, a re: 12“Bua le bana ba Iseraele, u re ho bona: ‘Ha mosali oa monna e mong a etsa phoso, 'me a sa tšepahale ho monna oa hae, 13ka ho feba le monna e mong; leha eba monna eo oa hae a se na bopaki bo lekaneng ba taba eo, hoo ho silafala ha mosali ho salang ho sa pakahala ka baka la ho hloka paki e mo tšoereng a ntse a feba; 14kapa haeba motho a hlōloa ke lefufa le etsang hore a belaelle mosali oa hae, ebang o itšilafalitse kapa che; 15monna eo a tlise mosali oa hae ho moprista, 'me a tle a nkile nyehelo ea mosali eo, ea phofo ea harese e boima ba likilo 000026li. Empa a se ke a tšèla ole, kapa mokubetso holim'a eona, hobane ke nyehelo ea phofo, ea lefufa; ke nyehelo ea phofo, e etsetsoang hore ho 'ne ho hopoloe molato oo.
16“ ‘Moprista o tla fetisetsa mosali eo kapele, a mo emise kapele ho Morena. 17O tla tšèle metsi a halalelang ka sejaneng sa letsopa, a tšèlè le lerōle leo a le nkileng fatše, ka Tenteng ea Morena. 18Moprista o tla emisa mosali eo kapele ho Morena, a hlanthōlle moriri oa mosali eo, a mo nkise nyehelo ea phofo ea khopotso, ea lefufa, moprista eena a ntse a nkile metsi a letsoai, a tlisang thōhako. 19Joale moprista o tla hlapantša mosali eo, a re ho eena: Haeba ha ho monna eo u ileng ua feba le eena, 'me eba ha u e-s'o etse phoso ka ho itšilafatsa le monna e mong, ha u ntse u le taolong ea monna oa hao, metsi ana a letsoai a se ke a u tlisetsa thōhako. 20Empa haeba u ile ua etsa phoso ha u ntse u le taolong ea monna oa hao, eba u silafetse, 'me u ile ua feba le monna e mong eo e seng monna oa hao, 21moprista o tla hlapantša mosali eo ka kano ea thōhako, 'me a re ho mosali eo: “Morena a ke a u etse mohlala oa thōhako har'a sechaba sa heno, ka hore mpa ea hao e hōhōmōhe, u senyeheloe. 22Metsi ana a tlisang thōhako a ke a kene ka maleng a hao, a hōhōmōse mpa ea hao, u fetohe nyopa”.
“ ‘Mosali o tla re: “A ho be joalo! A ho be joalo!”
23“ ‘Moprista o tla ngola lithōhako tsena pampiring, ebe o li hlatsoetsa ka metsing a letsoai. 24Joale moprista a noese mosali eo metsi ao a letsoai, a tlisang thōhako, hore a kene ka maleng a hae, a mo lōmise mala. 25Ebe moprista o nka nyehelo ea phofo, ea lefufa, e matsohong a mosali, o e akhōtsa kapele ho Morena, ebe o e isa aletareng. 26A ngoathe phofo eo ea nyehelo ka seatla, e le khopotso, a e chesetse holim'a aletare, a nt'o noesa mosali eo metsi ao. 27Ha a se a mo noesitse metsi ao, 'me eba o silafetse, o sitetsoe monna oa hae, metsi ao a tlisang thōhako a tla kena ka maleng a hae, a mo lōmise mala, ebe mpa ea hae ea hōhōmōha, o fetoha nyopa. Mosali eo e tla ba mohlala oa motho ea rōhakehileng har'a sechaba sa habo. 28Empa haeba mosali eo a sa silafala, eba o ntse a hloekile, ha a na ho hlaheloa ke letho, 'me o tla 'ne a belehe.
29“ ‘Ona ke molao oa lefufa. Ha mosali a etsa phoso, empa a ntse a le tlas'a taolo ea monna oa hae, 'me a itšilafatsa; 30kapa ha moea oa lefufa o kenela monna, hoo a belaellang mosali oa hae, o tla isa mosali eo kapele ho Morena, 'me moprista o tla phethahatsa molao ona oohle holim'a hae. 31Monna o tla hloka molato, empa mosali eena o tla jara molato oa hae.’ ”
