Mesebetsi e abetsoeng Balevi
1Morena a bua ho Moshe le ho Arone, a re: 2“Har'a Balevi balang bara ba Kohate kaofela, ka malapa abo bona, le ka matlo a bo-ntat'a bona; 3ho tloha ka ba lilemo tse mashome a mararo ho ea holimo, ho ea fihla ho ba lilemo tse mashome a mahlano; bana bohle e be bona ba tla sebeletsa ka Tenteng ea Morena.
4“Ona ke mosebetsi oa bara ba Kohate, ka Tenteng ea Morena: tsohle tse halalelang ka ho fetisisa li tla hlokomeloa ke bona. 5Etlare ha ho tlohuoa moo ho neng ho hlomiloe teng, Arone le bara ba hae ba theole lesira la seotloana, 'me ka lona ba koahele areka ea selekane. 6Ba e koahele le ka letlalo la qibi, ba ale lesela le leputsoa kaholimo, ebe ba e khoesa mefenng ea eona.
7“Holim'a tafole e beang bohobe bo halalelang, ba ale lesela le leputsoa, 'me holim'a lona ba bee mafiso, le mafisoana, le mepotjoana, le linoelo tse sebelisoang ha ho nyeheloa. Bohobe ba nyehelo bo be holim'a tafole. 8Holim'a tsona ba ale lesela le lefubelu, 'me ba koahele ka letlalo la qibi, ebe ba khoesa tafole mefenng ea eona.
9“Ba nke lesela le leputsoa, ba koahele seluloana sa lebone, le mabone a sona, le matlao a sona, le lithōtōbōlō tsa sona, le lijana tsohle tse tšelang ole, tseo ba sebeletsang ka tsona. 10Ba se phuthele hammoho le lijana tsohle tsa sona ka letlalo la qibi, ba se bee holim'a lempara la sona.
11“Holim'a aletare ea khauta ba ale lesela le leputsoa, 'me ba e koahele ka letlalo la qibi, ebe ba e khosa mefenng ea eona.
12“Hape ba nke lijana tsohle tsa ho sebeletsa, tse ka Sehalalelong, ba li phuthele ka lesela le leputsoa, le ka letlalo la qibi, ebe ba li bea holim'a lempara la eona.
13“Ha ba se ba fietse molora o holim'a aletare, ba ale lesela le perese holim'a eona. 14Ba bee lijana tsohle tsa aletare holim'a eona, tseo ba sebeletsang ka tsona, e leng lithōtōbōlō, le lifereko, le likharashoana, le likotlolo, le lijana tsohle tsa aletare, ebe ba li koahela ka letlalo la qibi, ba nt'o e khoesa mefenng ea eona.
15“Ha Arone le bara ba hae ba qetile ho koahele Sehalalelo, le lijana tsohle tsa sona, 'me ho tlohuoa moo ho neng ho hlomiloe teng, bara ba Kohate ba tla tla, ba nke Sehalalelo, empa ba se ke ba ama lintho tse halalelang, esere ba e-shoa. Ena ke mesebesi ea bara ba Kohate ka Tenteng ea Morena.
16“Eleasare, mora oa moprista Arone, eena o tla hlokomela ole ea lebone, le mokubetso o monko o monate, le nyehelo ea lijo, le ole e tlotsang; a hlokomele le Tente ea Morena, le tsohle tse ka ho eona. Hape a hlokomele le Sehalalelo, le thepa ea sona.”
17Morena a bua ho Moshe le ho Arone, a re: 18“Le hlokomele hore ba lelōko la Kohate ba se ke ba fela har'a Balevi. 19Hore ba tle ba phele, ba se ke ba e-shoa, ere ha ba atamela lintho tse halalelang ka ho fetisisa le ba etse tjena: Arone le bara ba hae ba kene ka Sehalalelong, ba abele e mong le e mong oa bona mosebetsi oa hae, le seo a tla se jara, 20empa ba se ke ba kena ho seba lintho tse halalelang leha e le ka motsotsoana feela, esere ba e-shoa.”
21Morena a bua ho Moshe, a re: 22“Bala le bara ba Gereshone ho ea ka matlo a bo-ntat'a bona, le ka malapa abo bona; 23ho tloha ka ba lilemo tse mashome a mararo, ho ea fihla ho ba lilemo tse mashome a mahlano; bana bohle e be bona ba tla sebeletsa ka Tenteng ea Morena.
24“Ona ke mosebetsi oa malapa a Gereshone: ho sebeletsa le ho jara. 25Ba tla jara masira a Tente ea Morena, le Tente ka boeona, le masela a e koahetseng; hammoho le letlalo la qibi le e koahetseng kaholimo; le lesira la monyako oa seotloana sa Tente ea Morena; 26le masira a seotloana, le lesira la monyako oa seotloana se pota-potileng Tente ea Morena, le aletare, le likhoele tsa masira ao, le lijana tsohle tse sebeletsang. Tsohle tse lokelang ho etsoa ka tsona ba tla li etsa. 27Tšebeletso ea bara ba Gereshone e tla ba tlas'a taolo ea Arone le bara ba hae, e leng tsohle tseo ba tla li jara, le tsohle tseo ba tla li sebetsa. U tla abela e mong le e mong mosebetsi oa ho jara oo a tla o etsa. 28Ona he, ke mosebetsi oa malapa a bara ba Gereshone ka Tenteng ea Morena, 'me ba tla ba tlas'a taolo ea Itamare, mora oa moprista Arone.
29“U tla bala bara ba Merari, ho ea ka malapa abo bona, le ho ea ka matlo a bo-ntat'a bona; 30ho tloha ka ba nang le lilemo tse mashome a mararo, ho ea fihla ho ba lilemo tse mashome a mahlano; bana bohle e be bona ba tla sebeletsa ka Tenteng ea Morena. 31Tsena ke tseo ba tla li jara, ha ba sebeletsa ka Tenteng ea Morena: litšiea tsa lithupa tse hlongoang tsa Tente ea Morena, le maballo a eona, le mefeng ea eona, le litšiea tsa eona, le litšehetso tsa tsona, 32le litšiea tsa seotloana tse se pota-potileng, le litšehetso tsa tsona, le limapo tsa tsona, le likhoele tsa tsona, le lijana tsohle tsa tsona. U tla abela e mong le e mong lintho tsohle tseo a tla sebetsa ka tsona, 'me a li jare. 33Ona he, ke mosebetsi oohle oa malapa a bara ba Merari ka Tenteng ea Morena, 'me ba tla ba tlas'a taolo ea Itamare, mora oa moprista Arone.”
Ho baloa Balevi
34Eaba bo-Moshe, le Arone, le mahosana a sechaba, ba bala bara ba Kohate, ho ea ka malapa abo bona, le ho ea ka matlo a bo-ntat'a bona; 35ho tloha ka ba lilemo tse mashome a mararo ho ea holimo, ho ea fihla ho ba lilemo tse mashome a mahlano; ba bala e mong le e mong ea ka sebeletsang ka Tenteng ea Morena. 36Ba baliloeng ho ea ka malapa abo bona ea e-ba likete tse peli le makholo a supileng le mashome a mahlano. 37Bana ke ba baliloeng ba malapa a bara ba Kohate, e leng bohle ba neng ba sebeletsa ka Tenteng ea Morena, ba baliloeng ke bo-Moshe le Arone, ho ea ka taelo eo Morena a e neileng Moshe.
38Joale ha baloa bara ba Gereshone, ho ea ka malapa abo bona, le ho ea ka matlo a bo-ntat'a bona; 39ho tloha ka ba lilemo tse mashome a mararo ho ea holimo, ho ea fihla ho ba lilemo tse mashome a mahlano, e leng bohle ba neng ba ka sebeletsa ka Tenteng ea Morena. 40Ba baliloeng ho ea ka malapa abo bona, le ho ea ka matlo a bo-ntat'a bona, ea e-ba likete tse peli le makholo a tšeletseng le mashome a mararo. 41Bana ke ba baliloeng ba malapa a bara ba Gereshone, e leng bohle ba neng ba sebeletsa ka Tenteng ea Morena, ba baliloeng ke bo-Moshe le Arone, ho ea ka taelo ea Morena.
42Eaba ho baloa ba malapa a bara ba Merari ho ea ka malapa abo bona, le ho ea ka matlo a bo-ntat'a bona; 43ho tloha ka ba lilemo tse mashome a mararo ho ea holimo, ho ea fihla ho ba lilemo tse mashome a mahlano, e leng bohle ba neng ba ka sebeletsa ka Tenteng ea Morena. 44Ba baliloeng ho ea ka malapa abo bona ea e-ba likete tse tharo le makholo a mabeli. 45Bana ke ba baliloeng ba malapa a bara ba Merari, ba baliloeng ke bo-Moshe le Arone, ho ea ka taelo eo Morena a e neileng Moshe.
46Balevi bohle ba baloa ke bo-Moshe, le Arone, le mahosana a Baiseraele le a Balevi, ba ba bala ho ea ka malapa abo bona, le ho ea ka matlo a bo-ntat'a bona; 47ho tloha ka ba lilemo tse mashome a mararo ho ea holimo, ho ea fihla ho ba lilemo tse mashome a mahlano, e leng bohle ba neng ba etsa mosebetsi, ba jara lintho tse ka Tenteng ea Morena. 48Ba baliloeng ea e-ba likete tse robeli le makholo a mahlano le mashome a robeli. 49Moshe a abela e mong le e mong mosebetsi oa hae, le seo a tla se jara, ho ea ka taelo ea Morena, 'me ba baloa joalokaha Morena a ne a laetse Moshe.
