Mesebetsi ea baprista le Balevi
1Morena a re ho Arone: “Uena le bara ba hao, le ba lelapa la ntat'ao, le tla ikarabella bakeng sa bokhopo bo ka silafatsang Sehalalelo. Uena le bara ba hao le tla jara bokhopo ba boprista ba lōna. 2U tlise le bana beno, ba morabe oa Levi, e leng morabe oa bo-ntat'ao; u ba atametse pel'a hao, ba tle ba u thuse, ba u sebeletse kapele ho Tente ea Morena e kentseng areka ea selekane. 3Ba tla le hlokomela, ba hlokomele le Tente ea Morena eohle. Feela ba se ke ba atamela lijana tsa Sehalalelo, leha e le ho atamela aletare; e le hore ba se ke ba e-shoa, le uena u se ke ua shoa.
4“Ba tla u thusa ho sebeletsa, ba hlokomele Tente ea Morena, tšebeletsong eohle ea eona. Ho se be e mong osele ea ka atamelang ho lōna. 5Le tla hlokomela Sehalalelo, le hlokomele le aletare, hore khalefo ea Morena e se hlole e oela bana ba Iseraele holimo. 6Bona, ke ikhethetse bana beno, Balevi, har'a bana ba Iseraele, e le mpho ea hao e neiloeng Morena, hore ba sebeletse ka Tenteng ea Morena. 7Uena le bara ba hao le tla sebeletsa le baprista mesebetsing eohle ea aletare, le ho tsohle tsa ka Sehalalelong se halalelang ka ho fetisisa. Ke u nea boprista e le mpho, empa e mong osele ea ka atamelang, a bolaoe.”
Seabo sa baprista
8Morena a re ho Arone: “Bona, u tla hlokomela linyehelo tsa ka; ke u neile lintho tsohle tse halalelang tsa bana ba Iseraele, e le seabo sa hao le sa bara ba hao. Hona ke taelo ea mehla eohle.
9“Lintho tsohle tsa tse halalelang ka ho fetisisa, tse sa angoang ke mollo, tsena e tla ba tsa hao. Nyehelo e 'ngoe le e 'ngoe ea bona, e ka ba nyehelo e 'ngoe le e 'ngoe ea bona ea lijo, le nyehelo e 'ngoe le e 'ngoe ea bona e tlosang sebe, le nyehelo e 'ngoe le e 'ngoe e tlosang molato, tseo ba tla 'nyehella ka tsona, e le lintho tse halalelang ka ho fetisisa, e tla ba tsa hao le tsa bara ba hao. 10Le li jelle sebakeng se halalelang ka ho fetisisa. Motho e mong le e mong e motona a ka li ja. Ho uena lia halalela.
11“Tsena e tla ba tsa hao: mpho ea bona ea nyehelo e phahamisoang, le nyehelo tsohle tse akhōtsoang tsa bana ba Iseraele. Ke u neile tsona, uena le bara ba hao, le barali ba hao, e le molao oa mehla eohle. Bohle ba lelapa la hao ba hloekileng ba tla li ja.
12“Ole e ntle ka ho fetisisa, le veine e monate ka ho fetisisa, le koro e ntle ka ho fetisisa, e leng lilopotsiea tseo ba li abelang Morena, tsona ke u nea tsona. 13Litholoana tsa lilopotsiea tse butsoitseng tsa naha ea bona, tseo ba li tlisetsang Morena, e tla ba tsa hao. Bohle ba lelapa la hao ba hloekileng ba tla li ja.
14“Tsohle tse abetsoeng Morena e tla ba tsa hao. 15Letsibolo le leng le le leng la libōpuoa tsohle le nyehelloang Morena ke la hao; e ka ba la motho kapa la phoofolo. Leha ho le joalo, letsibolo la motho u tla le lopolla, le letsibolo la phoofolo e sa hloekang le lona u tla le lopolla. 16Tseo tse lokelang ho lopolloa u tla li lopolla ha li e-na le khoeli, ka silefera e etsang boima ba likeramo tse mashome a mahlano a metso e mehlano tse lekantsoeng ka tekanyo e sebelisoang ka Sehalalelong. Ligera tse mashome a mabeli ke likeramo tse leshome le motso o le mong.
17“Empa ha e le letsibolo la khomo, kapa letsibolo la nku, kapa letsibolo la pōli, 'ona ha u ka ke ua a lopolla, aa halalela. Ka mali a 'ona u fōke holim'a aletare. Mafura a 'ona, 'ona u a chesetse holim'a aletare, e le nyehelo ea secheso e monko o monate, e amohelehang ho Morena. 18Nama ea matsibolo ana e tla ba ea hao, joalokaha sefuba sa nyehelo e akhōtsoang, le joalokaha serope sa eona sa letsoho le letona e le tsa hao. 19Linyehelo tsohle tse phahamisoang tsa lintho tse halalelang, tseo bana ba Iseraele ba nyehellang Morena ka tsona, ke u neile tsona, uena le bara ba hao, le barali ba hao. Ena ke taelo ea mehla eohle. Ke selekane sa letsoai sa mehla eohle kapele ho Morena, ho uena le ho litlōhōlō tsa hao.”
Seabo sa Balevi
20Eaba Morena o re ho Arone: “U se ke ua ba le lefa naheng ea bona, u se ke ua ba le seabo har'a bona. Ke 'na seabo sa hao, le lefa la hao har'a bana ba Iseraele.
21“Bona mona, bana ba Balevi ke ba neile karolo e le 'ngoe ho tse leshome la tse bōkeletsoeng ke bona ba Iseraele e le lefa la bona. Ke moputso oa tšebeletso ea bona eo ba e etsang ka Tenteng ea Morena. 22Ho tloha joale, bana ba Iseraele ba se hlole ba atamela Tente ea Morena, esere ba jara sebe, 'me ba shoela moo. 23Empa Balevi ba tla sebeletsa ka Tenteng ea Morena, 'me ba tla jara makhopo a bona. Ena e tla ba taelo ea mehla eohle melōkong ea lōna. Ha e le kahar'a bana ba Iseraele teng, ba ke ke ba e-ba le lefa. 24Karolo e le 'ngoe ho tse leshome, eo bana ba Iseraele ba nyehellang Morena ka eona, ke e neile Balevi e le lefa; ke ka baka leo ke itseng ho bona: ba ke ke ba e-ba le lefa har'a bana ba Iseraele.”
Karolo e le 'ngoe ho tse leshome ke ea Balevi
25Morena a bua ho Moshe, a re: 26“Hape bolella Balevi, u re ho bona: ‘Ha le nka karolo e le 'ngoe ho tse leshome ho bana ba Iseraele, eo ke le neang eona e le lefa le tsoang ho bona, le etsetse Morena nyehelo ka karolo e le 'ngoe ho tse leshome, e tsoang karolong eo. 27Nyehelo ea lōna e tla nkoa e le e tsoang ho lōna, joalokaha e ka ke koro e tsoang seotlong, le joalokaha e ka ke veine e tsoang setlhotlelong. 28Le tla nyehella Morena ka nyehelo ea likarolo tsohle tsa lōna tse tsoang ho tse leshome, tseo le li amohetseng li e-tsoa ho bana ba Iseraele. Ho tsona le nee moprista, Arone, nyehelo ea Morena. 29Limphong tsohle tsa lōna tseo le li amohelang le ntšetse Morena nyehelo eo e leng ea hae. Har'a tsohle tse ntle ka ho fetisisa, le tla mo nyehella ka karolo e halalelitsoeng.’
30“U re ho bona: ‘Ha le nyehela ka karolo e ntle ka ho fetisisa, ena e tla ba seabo sa Balevi, joalokaha e ka ke koro e tsoang seotlong, le joalokaha e ka ke veine e tsoang setlhotlelong. 31Lōna le ba malapa a lōna le ka se jella libakeng tsohle, hobane ke moputso oa lōna oa tšebeletso ea lōna ka Tenteng ea Morena. 32Ha le ka ke la jara sebe haeba le nyehetse ka karolo e ntle ka ho fetisisa. Le se ke la silafatsa lintho tse halalelang tsa bana ba Iseraele, esere la shoa.’ ”
