Literompeta tsa silefera
1Morena a bua ho Moshe, a re:
2“Etsa literompeta tse peli tsa silefera, u li etse ka silefera e thutsoeng. U tla li sebelisa ha u bitsa sechaba, leha ho tsoeloa pele leetong. 3Ha literompeta tsena li letsoa bobeli ba tsona, sechaba sohle se tla phuthehela ho uena, kapele ho monyako oa Tente ea Morena. 4Empa ha ho letsoa terompeta e le 'ngoe, mahosana, e leng lihlooho tsa merabe ea Iseraele, a tla phuthehela ho uena.
5“Ha u hlaba mokhosi oa pele ka terompeta, ba liahelong tse ka bochabela ba tla tsoela pele leetong. 6Ha u hlaba mokhosi oa bobeli ka terompeta, ba liahelong tse ka boroa ba tla tsoela pele leetong. Kamehla ha ho hlajoa mokhosi, ba tla tsoela pele maetong a bona. 7Empa ha sechaba se lōkela ho phutheha 'moho, u tla letsa terompeta, feela u se ke ua hlaba mokhosi.
8“Bara ba Arone, e leng baprista, ke bona ba tla letsa terompeta. Ho letsa literompeta e tla ba molao oa mehla eohle ho lōna, le ho melōko ea lōna.
9“Naheng ea lōna, ha le futuha, le e-ea ho loantša sera se le hateletseng, le tla hlaba mokhosi ka literompeta. Le tla hopoloa ke Morena Molimo oa lōna, 'me le tla pholosoa lireng tsa lōna. 10Mohl'a matsatsi a lōna a thabo, le mohl'a mekete ea lōna e khethehileng, le mohl'a likhoeli tsa lōna li thoasang, le tla letsetsa literompeta tsa lōna holim'a linyehelo tsa lōna tsa secheso, le holim'a mahlabelo a lōna a nyehelo ea teboho. Tsena e tla ba khopotso ea lōna kapele ho Molimo oa lōna. Ke 'na Morena Molimo oa lōna.”
Leeto la ho tloha Sinai
11Ka letsatsi la mashome a mabeli la khoeli ea bobeli, selemong sa bobeli, leru la phahama, la tloha holim'a Tente ea Morena e kentseng areka ea selekane. 12Bana ba Iseraele ba tloha lehoatateng la Sinai, ba tsoela pele leetong la bona, ba tsamaea ba hloma, ba hlomola, leru la ba la ea ema lehoatateng la Parane.
13Ba tsoela pele leetong la bona lekhetlo la pele, joalokaha Morena a ne a ba laetse ka Moshe. 14Ba nkileng mokhele oa Juda ba tloha pele, ho ea ka mabōtho a bona. Mookameli oa lebōtho la Juda e ne e le Naheshone mora oa Aminadabe. 15Mookameli oa lebōtho la morabe oa bana ba Isakare e ne e le Netanele, mora oa Suare. 16Mookameli oa lebōtho la morabe oa bana ba Sebulone e ne e le Eliabe, mora oa Helone.
17Eaba Tente ea Morena ea khokhotholloa, 'me bara ba Gereshone le bara ba Merari, ba neng ba jara Tente ea Morena, ba tsoela pele leetong. 18Joale ba nkileng mokhele oa liahelo tsa Rubene ba tsoela pele leetong, ho ea ka mabōtho a bona. Mookameli oa lebōtho la bona e ne e le Eleshure, mora oa Shedeure. 19Mookameli oa lebōtho la morabe oa bara ba Simeone e ne e le Shelōmiele, mora oa Surishadai. 20Mookameli oa lebōtho la morabe oa bana ba Gade e ne e le Eleasafo, mora oa Deuele.
21Joale ba morabe oa Kohate, ba neng ba jara lintho tse halalelang, ba tsoela pele leetong, 'me Tente ea Morena e ile ea hlongoa pele ba fihla.
22Ba nkileng mokhele oa liahelo tsa bana ba Efraime ba tsoela pele leetong, ho ea ka mabōtho a bona. Mookameli oa lebōtho la bona e ne e le Eleshama, mora oa Amihude. 23Mookameli oa lebōtho la morabe oa bana ba Manase e ne e le Gamaleele, mora oa Pedasure. 24Mookameli oa lebōtho la morabe oa bana ba Benjamine e ne e le Abidane, mora oa Gidoni.
25Joale ba nkileng mokhele oa liahelo tsa bana ba Dane, ba tsoela pele leetong, ho ea ka mabōtho a bona, ba le kamoraorao ho ba liahelo tsohle. Mookameli oa lebōtho la bona e ne le Ahiesere, mora oa Amishadai. 26Mookameli oa lebōtho la morabe oa bana ba Ashere e ne e le Pagiele, mora oa Okerane. 27Mookameli oa lebōtho la morabe oa bana ba Nafthali e ne e le Ahira, mora oa Enane. 28Ona e bile mokhoa oo bana ba Iseraele ba neng ba ee ba tsoele pele ka oona leetong, ho ea ka mabōtho a bona, ha ba tsamaea.
Moshe o bua le Hobabe
29Moshe a re ho Hobabe, mora oa Reuele oa Momidiane, e leng mohoe oa Moshe: “Re tsoela pele leetong la ho ea sebakeng seo Morena a ileng a re: ‘Ke tla le nea sona.’ Tsamaea le rōna, 'me re tla u etsetsa tse molemo, hobane Morena o tšepisitse Iseraele tse molemo.”
30Empa Hobabe a re ho Moshe: “Nke ke ka ea le lōna; ke tla ikela naheng ea heso le ho baheso.”
31Moshe a re ho Hobabe: “Se tlohe har'a rōna, kea u rapela, hobane ua tseba hore na liahelo tsa rōna re tla li hloma joang lehoatateng, 'me e tla ba uena mahlo a rōna. 32Haeba u e-ea le rōna, molemo oo Morena a re etsetsang oona, le rōna re tla u etsetsa oona.”
Ho fihloa lehoatateng
33Joale ba tloha thabeng ea Morena, ba tsamaea leeto la matsatsi a mararo. Areka ea selekane sa Morena ea ba etella pele ka matsatsi a mararo, ho ea ba batlela sebaka sa ho phomola. 34Leru la Morena le ne le ba okametse motšeare, ha ba tloha liahelong.
35Ha areka e tloha, Moshe o ne a ee a re:
“Tsoha, Morena,
lira tsa hao li qhalane!
Batho ba u hloileng
ba balehe kapele ho uena!”
36Ha areka e beoa fatše, Moshe o ne a ee a re:
“Oho, Morena, khutla,
khutlela ho ba likete tsa likete-kete
ba Iseraele!”
