NAHUME 3

₁Ho malimabe motse

o khanathetseng mali,

o tletseng thetso,

o tletseng le khapo,

motse o sa khaotseng ho lobela!

₂Ho lla sephali, makoloi aa kititsa,

lipere lia khema, ho lla tlhakō,

le kariki tsa ntoa lia khèhlèmana.

₃Bapalami ba lipere baa khōrōha,

sabole lia tsèkèma,

marumo aa phatsima!

Litōpō ke mofela, li robellane feela,

bongata ba tsona ha bo na palo,

batho ba khōthōmetseha

holim'a tsona.

₄Ninife e otloa joalo

hobane e le seotsoa,

boloi ba eona

bo ke ke ba ba ba boleloa,

ka bootsoa ba eona e hohela lichaba,

ka boloi ba eona

e fetole merabe makhoba.

₅“Uena Ninife, kea u loantša,”

ho rialo Morena oa mabōtho.

“Ke tla u hlōbōlisa, ke u tsolise.

Ke tla pepesetsa lichaba

bofeela ba hao,

mebuso e bone tse lihlong tsa hao.

₆Ke tla u silafatsa,

ke u hlabise lihlong,

ke u etse

sebonoang-se-bonoa-ke bohle.

₇Bohle ba u bonang

ba tla u baleha, ba re:

‘Motse oa Ninife o fetohile masupi,

ekaba ke mang ea tla o llela?’

Ke tla fumana mang

ea tla o tšelisa?”

₈Na u lokile ho feta Tebese,

e neng e hahiloe bōpong la Nile,

e neng e pota-potiloe ke metsi?

Leoatle le ne le e hahelelitse,

metsi a lona a e etselitse lerako.

₉Kushe le Egepeta li ne li e hlomella.

li e hlomella, ho se na moeli;

Pute le Lebia tsona li e thusetsa.

₁₀Empa le eona Tebese

e ile ea haptjoa,

chaba sa eona sa isoa bothōpuoeng.

Mateanong a literata tsohle,

bana ba eona ba pshatlakanngoa;

mahosana a eona a laoloa ka lōtho,

eaba bahlomphehi ba eona

baa tlangoa,

ba tlangoa ka mahlaahlela.

₁₁Le uena Ninife, u tla tahoa,

u tahoe, u be u thèkèsèlè,

u batle moo

u ka ipatelang sera teng.

₁₂Qhobosheane tsohle tsa hao

li ka fate tsa feiee,

fate tsa feiee tse butsoang pele:

Ha li hlōhlōroa, lia oa,

li oela ka hanong la moji oa tsona.

₁₃Ak'u talime mabōtho a hao,

kaofela a itšoanela le basali feela!

Likhoro tsa naha ea hao li ahlame,

li ahlametse

hore lira tsa hao li kene;

mollo o chesitse mekoallo ea tsona.

₁₄Ikhelle metsi,

u itokisetse thibella,

qhobosheane tsa hao u li matlafatse;

cheka letsopa, u lube seretse,

ebe joale u bōpa setene!

₁₅Mollo o tla u chesetsa hona teng,

sabole e u bolaele hona moo,

e u je sa litsie li kumōla lijalo.

Ata, u ikatise sa litsienyane,

u ikatise joaloka bookholane!

₁₆U ekelitse palo ea bahoebi ba hao,

ua e eketsa

ho feta naleli tsa leholimo.

Joalokaha litsie li ee li je,

ebe lia ikela,

le bona ba tla u ja, ebe baa ikela.

₁₇Balebeli ba hao

ba itšoanela le litsie,

bangoli ba hao

ba ka boieane ba litsie,

tse itšoarellang marakong

mohl'a mohatsela,

ere ha le chaba, li futhumala, li fōfe,

li fōfele moo

ho seng motho ea tsebang.

₁₈Oho, uena khosi ea Asiria,

babusi ba hao ba khalehile,

mahosana a hao a ipaqametse fatše.

Chaba sa hao

se qhalakane lithabeng,

ha ho le ea mong ea se phuthang.

₁₉Leqeba la hao ha le na pheko,

leōma la hao le isa lefung.

Bohle ba utloang

litaba tsena tsa hao,

ba opela ho oa ha hao mahofi.

Ke mang

ea phonyohileng sehlōhō sa hao,

sehlōhō sa hao se sa khaotseng?