1Mehleng ea puso ea Jotame, le Akase, le Hesekiea, likhosi tsa Juda, lentsoe la Morena la fihla ho 'Mikiea oa Moreshete. Morena a 'montša ka pono tse tla hlahela Samaria le Jerusalema.
Kahlōlo ea Samaria le Jerusalema
2Lōna lichaba tsohle, mamelang!
Uena lefatše, sekeha tsèbè!
Le tsohle tse ho uena
li sekehe tsebe!
Morena Molimo o tla le qōsa
a le ka Tempeleng ea hae,
Tempele e halalelang.
3Bonang!
Morena o tsoa ka leahong la hae;
o tla theoha,
a hate thlōrōng tsa lithaba.
4Lithaba li tla qhibiliha
tlas'a maoto a hae,
fatše le peperane,
ho hlahe likhohlo;
lithaba li qhibilihe
sa tšotso e utloa mollo,
li phorosele
sa metsi a theoha mothipōlōheng.
5Tsena tsohle li bakiloe
ke libe tsa Jakobo,
li bakiloe
ke libe tsa ntlo ea Iseraele.
Libe tsa Jakobo li bakiloe ke mang?
Li bakiloe ke baahi ba Samaria.
Ho khumamela melingoana
ho bakiloe ke mang Judea?
Ho bakiloe ke baahi ba Jerusalema.
6“Ka baka leo,
Samaria ke tla e fetola lesupi,
lirapa tsa morara li lengoe teng;
majoe a eona
ke tla a akhela ka khohlong,
methèo ea eona e sale pōeaneng.
7Melingoana eohle ea Samaria
e tla pshatloa,
limpho tsohle
tse lefshoang liotsoa li chesoe.
melimo eohle ea bohata
ke tla e timetsa,
hobane e bokeletsoe
e le moputso oa bootsoa,
'me e tla 'ne e be moputso,
moputso oa bootsoa.”
8Eaba 'Mikiea o re:
“Kahoo ke tla lla, ke bokolle,
ke tsamaee ke hlobotse,
maotong ke sa roala;
ke tla ngaea sa phokojoe ha e ngaea,
ke purume sa mpshe ha e puruma.
9Qeba la Samaria lea petla,
ha le na pheko,
le petlile la ea tšoaetsa le Juda,
la ea fihla le khorong
ea chaba sa ka,
la ba la ea fihla le Jerusalema.”
Sera se atamela Jerusalema
10Le se ke la e bolela Gate,
le ho bokolla le se ke la bokolla;
baahi ba Bete-Leafera
le ipitike lerōleng.
11Lōna baahi ba Shafire
fetang ka tsela
le fete le le feela, le le lihlong.
Baahi ba Saanane
ba hana ho tsoa motseng.
Ha le utloa ba Bete-Esele ba lla,
le tle le tsebe
hore ha le sa sirelelitsoe.
12Baahi ba Marote
ba lebeletse ho lopolloa,
hoba Morena o ba lihetse koluoa,
a e liha, ea ea fihla
le khorong ea Jerusalema.
13Lōna baahi ba Lakishe
panang lipere,
le pane lipere kariking tsa ntoa;
ke lōna ba baketseng
Morali oa Sione sebe,
tšito tsa Iseraele
li fumanoe ho lōna.
14Kahoo le tla phahla
le phahlele Moreshete-Gate,
motse oa Akasibe e tla ba thetso,
e be thetso ho likhosi tsa Iseraele.
15Lōna baahi ba Maresha
ke tla le neella ka seqhobane,
eo e leng tlōtla ea Iseraele o tla tla,
o tla tla lehaheng la Adulame.
16Beolang lihlooho,
le li etse lekōrana,
le llele bana bao le ba ratang;
le phumohe mafatla,
le tšoane le tlake,
hoba bana ba tla le siea,
ba ee bothōpuoeng.
