MATHEU 5

₁Eare ha Jesu a bona matšoele, a nyolohela thabeng, 'me hoba a lule, barutuoa ba hae ba tla ho eena; ₂a qala ho ba ruta, a re:

₁₁“Le lehlohonolo ha le hlapaoloa, le hlorisoa, le etseletsoa ka mekhoa eohle ka baka la ka. ₁₂Thabang, le nyakalle, hobane moputso oa lōna o moholo maholimong; etsoe baporofeta ba bileng teng pele ho lōna ba hlorisitsoe joalo.”

₁₃“Le letsoai la lefatše, empa ha letsoai le ka tapa, le ka tsoaifatsoa ka'ng? Ha le sa na thuso, haese hore le lahleloe kantle, le hatakeloe ke batho.

₁₄“Le leseli la lefatše. Motse o hahiloeng holim'a thaba o sitoa ho pateha; ₁₅lebone le lona ha le ke be le hotetsoe le koaheloe ka nkho, empa le beoa seluloaneng sa lona, le khantšetse bohle ba ka tlung. ₁₆Leseli la lōna le ke le khanyetse batho joalo, ba tle ba bone mesebetsi e metle ea lōna, ba be ba tlotlise Ntat'a lōna ea maholimong.”

₁₇“Le se ke la nahana hore ke tlile ho felisa Molao kapa Baporofeta; ha kea tla ho li felisa, ke mpa ke tlile ho li phethahatsa. ₁₈Kannete kea le bolella: ho fihlela leholimo le lefatše li fela, ha ho ka ke ha fetoha tlhakunyana e le 'ngoe leha e le letšoaonyana le le leng Molaong, ho fihlela tsohle li etsahala. ₁₉Ha ho le joalo, mang le mang ea tlōlang leha e le 'ngoe ea litaelo tsena tse nyenyane, 'me a ruta batho ho etsa joalo, o tla bitsoa e monyenyane 'Musong oa maholimo, empa mang le mang ea li phethang, 'me a li ruta, eena o tla bitsoa e moholo 'Musong oa maholimo. ₂₀Kea le bolella, ha ho loka ha lōna ho sa fete ha Litsebi tsa Molao le Bafarisi, ha le ka ke la kena 'Musong oa maholimo.

₂₁“Le utloile hore ho ile ha thoe ho ba boholo-holo: ‘U se ke ua bolaea; mang le mang ea bolaeang o tla tšoaneloa ke kahlōlo.’ ₂₂Empa 'na ke re ho lōna: Mang kapa mang ea halefelang ngoan'abo o tla tšoaneloa ke kahlōlo, 'me ea reng ho ngoan'abo: ‘Sethoto tooe!’o tla tšoaneloa ke ho isoa khotla; ha e le ea reng: ‘Tseketseke tooe!’o tla tšoaneloa ke ho ea mollong oa lihele.

₂₃“Ha ho le joalo, ha u nyehela ka mpho ea hao aletareng, 'me teng u hopola hore ngoan'eno o na le lisuoa le uena, ₂₄siea mpho ea hao moo pel'a aletare, u e'o boelana le ngoan'eno pele, u ntan'o khutla ho tla nyehela ka mpho ea hao.

₂₅“U utloane kapele-pele le eo le tsekisanang le eena le sa ntse le le tseleng, esere mohlomong ea u tsekisang a u neela moahlōli, moahlōli a u neela lepolesa, ua hlahleloa chankaneng; ₂₆kannete kea u bolella, ha u ka ke ua tsoa teng ho fihlela ha u lefile cheletana ea ho qetela.

₂₇“Le utloile hore ho ile ha thoe: ‘U se ke ua feba.’ ₂₈Empa 'na ke re ho lōna: Mang kapa mang ea talimang mosali ka ho mo lakatsa o se a mo febile pelong ea hae. ₂₉Haeba leihlo la hao le letona le u lihela sebeng, le honye, u le lahle, hobane ho molemo ho uena ha ho ka timela setho se le seng sa hao, ho e-na le hore 'mele oohle oa hao o lahleloe liheleng, ₃₀'me haeba letsoho la hao le letona le u lihela sebeng, le pōme, u le lahle, hobane ho molemo ho uena ha ho ka timela setho se le seng sa hao, ho e-na le hore 'mele oohle oa hao o ee liheleng.

₃₁“Ho ile ha thoe: ‘Mang le mang ea hlalang mosali oa hae a mo fe lengolo la tlhalo.’ ₃₂Empa 'na ke re ho lōna: Mang kapa mang ea hlalang mosali oa hae, haese ka taba ea bohlola, oa mo febisa, 'me ea nyalang mosali ea hlaliloeng oa feba.

₃₃“Le utloile hape hore ho ile ha thoe ho ba boholo-holo: ‘U se ke ua ikana ka leshano, u mpe u phethe likano tsa hao ho Morena.’ ₃₄Empa 'na ke re ho lōna: Le se ke la hlapanya le hanyenyane, leha e le ka leholimo, kahobane ke terone ea Molimo; ₃₅leha e le ka lefatše, kahobane ke bonamelo ba maoto a hae; leha e le ka Jerusalema, kahobane ke motse oa Khosi e kholo; ₃₆leha e le ka hlooho ea hao, kahobane u sitoa ho soeufatsa kapa ho ntšofatsa qōba leha e le 'ngoe ea moriri. ₃₇Ha le re ‘e’, le re ‘e’; ha le re ‘che’, le re ‘che’; ha e le ho fetang hoo, ho tsoa ho E Mobe.

₃₈“Le utloile hore ho ile ha thoe: ‘Leihlo le tla phetetsoa ka leihlo, leino ka leino!’ ₃₉Empa 'na ke re ho lōna: Le se ke la hanyetsa motho e mobe, empa ea u jabelang lerameng le letona, u mo retelletse le le letšehali; ₄₀ea ratang ho u qosa le ho nka seaparo sa hao, u mo tlohelle le eona kobo, ₄₁'me ea u qophellang ho tsamaea le eena mehato e sekete, u ee le eena mehato e kete li peli. ₄₂Fa ea u kōpang, 'me u se ke ua furalla ea ratang ho alima ho uena.

₄₃“Le utloile hore ho ile ha thoe: ‘Rata oa heno, u hloee sera sa hao.’ ₄₄Empa 'na ke re ho lōna: Ratang lira tsa lōna, le rapelle ba le hlorisang, ₄₅hore le be bana ba Ntat'a lōna ea maholimong, hobane o chabisetsa ba khopo le ba molemo letsatsi la hae, 'me o nesetsa ba lokileng le ba sa lokang pula. ₄₆Haeba le rata ba le ratang feela, le ka ba le moputso oa eng? Ana balekhetho le bona ha ba etse joalo na? ₄₇Le teng haeba le lumelisa bana babo lōna feela, le feta ba bang ka eng? Ana bahedene le bona ha ba etse joalo na? ₄₈Ha ho le joalo, phethehang joalokaha Ntat'a lōna ea maholimong a phethehile.