MATHEU 10

₁Hoba Jesu a bitse barutuoa ba hae ba leshome le metso e 'meli, a ba nea matla a ho leleka meea e litšila, le a ho folisa mafu le maloetse 'ohle.

₂Mabitso a baapostola ba leshome le metso e' meli ke ana: oa pele ke Simone ea bitsoang Petrose, le Andrease ngoan'abo, le Jakobo mora oa Sebedea, le Johanne ngoan'abo, le ₃Filipi le Baretholome, le Thomase le Matheu molekhetho, le Jakobo mora oa Alefiose le Thadaose, le ₄Simone Mochesehi le Judase Isekariota, ea bileng a èka Jesu.

₅Jesu a rōma bao ba leshome le metso e 'meli, a ba laela, a re: “Le se ke la ea linaheng tsa bahedene, leha e le ho kena metseng ea Basamaria; ₆le mpe le ee linkung tse lahlehileng tsa ntlo ea Iseraele. ₇Le ee, le ntse le phatlalatsa, le re: ‘'Muso oa maholimo o atametse.’ ₈Folisang bakuli, tsosang bafu, hloekisang balepera, lelekang bademona; le amohetse feela, fanang feela. ₉Le se ke la nka chelete ea khauta, ea silefera, kapa ea lethose lipacheng tsa lōna. ₁₀Maetong a lōna le se ke la nka thōtō, leha e le seaparo sa bobeli, kapa meqathatso, kapa lere. Ea sebetsang o lokeloa ke lijo tsa hae.

₁₁“Motseng kapa motsaneng ofe le ofe oo le kenang ho oona, le batle ea ka le amohelang, 'me le hlole teng ho fihlela le tloha. ₁₂Ha le kena ka tlung, le lumelise; ₁₃haeba ntlo eo e hlile e lokela, khotso ea lōna e be ho eona; athe ha e sa lokele, khotso ea lōna e khutlele ho lōna. ₁₄Ha mang kapa mang a sa le amohele le ho mamela lipolelo tsa lōna, tsoang tlung eo kapa motseng oo, le hlōhlōre lerōle maotong a lōna. ₁₅Ruri kea le bolella, ka letsatsi la kahlolo litaba tsa fatše la Sodoma le Gomora li tla ba bobebe ho feta tsa motse oo.”

₁₆“Bonang, ke le rōma joaloka linku har'a liphiri; ha ho le joalo le be masene joaloka linōha, 'me le hloke mano joaloka maeba. ₁₇Hlokomelang batho, hobane ba tla neelana ka lōna makhotleng, ba le shape matlung a bona a thapelo. ₁₈Le tla huleloa kapele ho babusi le mahosi ka baka la ka, hore e be bopaki ho bona le ho bahedene. ₁₉Ha ba neelana ka lōna, le se ke la itšoenya ka hore na le tla bua joang, le re'ng. Ka eona nako eo le tla neoa hore na le re'ng, ₂₀hobane ho tla be ho sa bue lōna, empa e tla be e le Moea oa Ntat'a lōna o buang ka lōna.

₂₁“Motho o tla neelana ka ngoan'abo hore a bolaoe, ngoana ka ntat'ae; bana ba tla fetohela batsoali, ba etse hore ba bolaoe. ₂₂Le tla hlouoa ke bohle ka baka la lebitso la ka, empa ea tla tiisetsa ho isa qetellong, o tla pholosoa. ₂₃Ha ba le hlorisa motseng o mong, balehelang ho o mong, hobane ruri kea le bolella, ha le ka ke la qeta metse ea Iseraele Mor'a Motho a e-s'o tle.

₂₄“Morutuoa ha a kaholimo ho moruti oa hae, le lekhoba ha le kaholimo ho mong'a lona. ₂₅Ho lekane ho morutuoa hore a be joaloka moruti oa hae, le lekhoba joaloka mong'a lona. Ha mong'a ntlo a bitsoa Beele-Sebule, ba ntlo ea hae bona ba tla bitsolloa hampe hakaakang!

₂₆“Ka baka leo, le se ke la ba tšaba; hobane ha ho letho le koahetsoeng le ke keng la koaholloa, le le patiloeng le ke keng la tsejoa. ₂₇Seo ke le bolellang sona lefifing, le se phete leseling; seo le se utloang le se nyenyeletsoa, le se phatlalatse le le holim'a lihlōhlōlō. ₂₈Le se ke la tšaba ba bolaeang 'mele, empa ba ke ke ba bolaea moea; le mpe le tšabe ea nang le matla a ho timetsa moea le 'mele liheleng. ₂₉U ka reka lirōbele tse peli ka sente, empa ha ho le se seng se ka oelang fatše Ntat'a lōna a sa tsebe. ₃₀Ha e le lōna, esita le liqōba tsa moriri oa lihlooho tsa lōna li baliloe kaofela. ₃₁Kahoo le se ke la tšaba; lōna le ba bohlokoa ho feta lirōbele tse ngata.

₃₂“Mang le mang ea mpakang pel'a batho, le 'na ke tla mo paka pel'a Ntate ea maholimong, ₃₃empa ea ntatolang pel'a batho, le 'na ke tla mo latola pel'a Ntate ea maholimong.”

₃₄“Le se ke la hlōma eka ke tlisitse khotso lefatšeng; ha kea tlisa khotso, ke tlisitse sabole.

₃₇“Ea ratang ntat'ae kapa 'm'ae ho mpheta ha a ntōkele; ea ratang mora kapa morali ho mpheta ha a ntōkele, ₃₈'me ea se nkeng sefapano sa hae a ntatela ha a ntōkele. ₃₉Ea qenehelang bophelo ba hae bo tla mo senyehela, athe ea senyeheloang ke bophelo ka baka la ka o tla bo fumana.”

₄₀“Ea le amohelang oa nkamohela, 'me ea nkamohelang o amohela ea nthōmileng. ₄₁Ea amohelang moporofeta kahobane e le moporofeta, o tla fumana moputso oa moporofeta, 'me ea amohelang ea lokileng kahobane e le ea lōkileng, o tla fumana moputso oa ea lokileng. ₄₂Ea fang e mong oa ba banyenyane bana mohope oa metsi a pholileng kahobane e le morutuoa, ruri kea le bolella, ha a ka ke a hloka moputso oa hae.”