Lelōko la Jesu Kreste
1Lelōko la Jesu Kreste, mor'a Davida, mor'a Aborahama. 2Aborahama a tsoala Isaka, Isaka a tsoala Jakobo, Jakobo a tsoala Juda le bana babo, 3Juda a tsoala Farese le Sara ka Tamare, Farese a tsoala Heserone, Heserone a tsoala Arame, 4Arame a tsoala Aminadabe, Aminadabe a tsoala Nashone, Nashone a tsoala Salema, 5Salema a tsoala Boase ka Rahaba, Boase a tsoala Obede ka Ruthe, Obede a tsoala Jese, 6Jese a tsoala khosi Davida.
Davida a tsoala Solomone ka mohats'a Uriea, 7Solomone a tsoala Roboame, Roboame a tsoala Abiea, Abiea a tsoala Asa, 8Asa a tsoala Jehoshafate, Jehoshafate a tsoala Jorame, Jorame a tsoala Usiea, 9Usiea a tsoala Jotame, Jotame a tsoala Akase, Akase a tsoala Hesekia, 10Hesekia a tsoala Manase, Manase a tsoala Amose, Amose a tsoala Josiea, 11Josiea a tsoala Jekoneea le bana babo ka nako ea ho fallisetsoa ha Bajuda Babilona.
12Joale, kamora' ho fallisetsoa ha bona Babilona, Jekoneea a tsoala Salatiele, Salatiele a tsoala Sorobabele, 13Sorobabele a tsoala Abihude, Abihude a tsoala Eliakime, Eliakime a tsoala Asore, 14Asore a tsoala Sadoke, Sadoke a tsoala Akime, Akime a tsoala Eleude, 15Eleude a tsoala Eleasare, Eleasare a tsoala Matane, Matane a tsoala Jakobo, 16Jakobo a tsoala Josefa, mohats'a Maria, mosali ea ileng a tsoala Jesu ea bitsoang Kreste.
17Ha ho le joalo, melōko eohle, ho tloha ho Aborahama ho isa ho Davida, e bile leshome le metso e mene; ho tloha ho Davida ho isa nakong ea ho fallisetsoa ha Bajuda Babilona, melōko e leshome le metso e mene, 'me ho tloha nakong ea ho fallisetsoa ha bona Babilona ho isa ho Kreste, melōko e leshome le metso e mene.
Tsoalo ea Jesu Kreste
18Tsoalo ea Jesu Kreste e bile joaana: 'M'ae Maria, ha a se a lebelelitsoe ke Josefa, ba e-s'o ka ba phela 'moho, a fumaneha e le moimana ka matla a Moea o Halalelang. 19Erekaha Josefa, mohats'a Maria, a ne a lokile, 'me a sa rate ho mo hōbōsa, a rera ho mo hlala ka lekunutu.
20Eare a sa hopotse joalo, lengeloi la Morena la iponahatsa ho eena torong, la re: “Josefa, mor'a Davida, u se ke ua tšaba ho inkela Maria mohats'a hao, hobane se emotsoeng ke eena se tsoa ho Moea o Halalelang; 21o tla tsoala mora, 'me u tla mo rea lebitso la Jesu, hobane o tla pholosa sechaba sa hae libeng tsa sona.”
22Joale tsena tsohle li etsahetse hore ho tle ho phethahale ho boletsoeng ke Morena ka moporofeta, ha a re:
23“Bonang, moroetsana o tla emola,
a tsoale mora,
'me mora eo o tla reoa
lebitso la Emmanuele,”
e leng ho re: Molimo o na le rōna.
24Ha Josefa a tsoha borokong, a etsa kamoo lengeloi la Morena le mo laetseng kateng, a inkela mohats'a hae; 25'me ha aa ka a kena likobong tsa hae ho fihlela a beleha mora; Josefa a mo rea lebitso la Jesu.
