LUKA 24

₁Ka letsatsi le qalang beke ba ea lebitleng e sa le kameso, ba nkile litlolo tseo ba li lokisitseng. ₂Ba fumana lejoe le phikoloselitsoe thōko le lebitla. ₃Ha ba kena, ba se ke ba fumana setōpō sa Morena Jesu. ₄Eare ba sa tsielehile ke hoo, bonang, banna ba babeli ba liaparo tse halimang, ba ema pel'a bona. ₅Eare ha ba tšoha, 'me ba talima fatše, banna bao ba re ho bona: “Ea phelang le 'matlela'ng har'a bafu? ₆Ha a eo mona, o tsohile bafung. Hopolang kamoo a neng a le bolelle kateng a sa le Galelea, ₇ha a re: ‘Eka khona Mor'a Motho a neeloe matsohong a baetsalibe, 'me a thakhisoe, a nt'o tsoha ka tsatsi la boraro.’ ” ₈Ba hopola lipolelo tsa Jesu.

₉Hoba ba khutle lebitleng, ba tsebisa ba leshome le motso o mong le ba bang bohle litaba tseo tsohle. ₁₀E ne e le Maria oa Magadala, le Johanna, le Maria, 'm'a Jakobo, le basali ba bang ba neng ba e-na le bona, ba neng ba bolella baapostola litaba tseo. ₁₁Lipolelo tseo ea ka tšōmo ho bona, 'me ba se ke ba ba kholoa. ₁₂Empa Petrose a ema, a mathela lebitleng; ha a fihla a nyarela, a bona masela feela; eaba o tloha a maketse ke se etsahetseng.

₁₃Ka lona letsatsi leo barutuoa ba babeli ba ne ba e-ea motsaneng o bitsoang Emmause, o bohōle ba likilomethara tse leshome le motso o mong ho tloha Jerusalema. ₁₄Ba ne ba qoqa ka liketsahalo tseo tsohle. ₁₅Ha ba ntse ba qoqa joalo, ba buisana, Jesu ka sebele a atamela, a tsamaea le bona, ₁₆empa mahlo a bona a rebeha, ba se ke ba mo tseba.

₁₇A re ho bona: “Litaba tseo le tsamaeang le buisana ka tsona ke life?”

Ba ema tlekelele! Ba soabile. ₁₈E mong oa bona, ea bitsoang Keleopase, a mo araba, a re: “Na ebe ke uena feela u leng moeti moo Jerusalema, ea sa tsebeng tse etsahetseng teng matsatsing aa?”

₁₉A re ho bona: “Life?”

Ba re ho eena: “Tsa Jesu oa Nasaretha, eo e neng e le monna oa moporofeta ea matla liketsong le lithutong pel'a Molimo le pel'a sechaba sohle, ₂₀kamoo baprista ba baholo le babusi ba rōna ba neelaneng ka eena hore a ahlōleloe lefu kateng, ba bileng ba mo thakhisa. ₂₁Rōna re ne re tšepile hore ke eena ea tla lopolla Iseraele. Ntle ho tsena tsohle, lena ke letsatsi la boraro tsena li etsahetse. ₂₂Empa basali ba bang ba habo rōna ba re makalitse. Ba ile ba tsohella lebitleng, ₂₃feela ba se ke ba fumana setōpō sa hae. Ba khutla ba re ba bone mangeloi a reng oa phela. ₂₄Le ba bang ba neng ba e-na le rōna ba ile ba ea lebitleng, 'me ba fumana ho le joalokaha basali ba ile ba bolela, empa eena ha baa ka ba 'mona.”

₂₅A re ho bona: “Jo, lithoto tse pelo li liehang ho lumela tsohle tseo baporofeta ba ileng ba li bolela! ₂₆Na Kreste o ne a sa tlameha ho hlōkōfatsoa tjee, a nt'o kena tlōtleng ea hae?” ₂₇A qala ka Moshe le ka Baporofeta bohle, a ba qaqisetsa tse amanang le eena, tse Mangolong 'ohle.

₂₈Ha ba atamela motsaneng oo ba eang ho oona, Jesu a etsa sa mokana a fetela pele. ₂₉Ba mo qophella, ba re: “Hlola le rōna, hobane letsatsi le se le rapame, 'me e se e tla ba mantsiboea.” Eaba oa kena, o hlola le bona.

₃₀Eitse ha a le lijong le bona, a nka bohobe, a boka, a bo ngoatha, a ba nea bona. ₃₁Joale ha re etlō! mahlong, 'me ba mo tseba, empa a ba nyamella. ₃₂Ba botsana, ba re: “Ana pelo tsa rōna li ne li sa chese ka ho rōna ha a bua le rōna tseleng, a ntse a re hlalosetsa Mangolo na?”

₃₃Ba ema ka eona nako eo, ba khutlela Jerusalema. Ba fumana ba leshome le motso o mong le ba nang le bona ba phuthehile, ₃₄ba bile ba bolela hore Morena o fela a tsohile, 'me o iponahalitse ho Simone. ₃₅Le bona ba pheta tse etsahetseng leetong la bona, le kamoo ba ileng ba mo tseba kateng, ha a ngoatha bohobe.

₃₆Eare ba sa bua joalo, Jesu a ema har'a bona, a re ho bona: “Khotso e be le lōna!”

₃₇Empa ba tšoha, ba tšaba, ba hopola hore ba bona sethotsela. ₃₈A re ho bona: “Le ferekanetse'ng? Ke ka baka la'ng le hlaheloang ke lipelaelo lipelong tsa lōna? ₃₉Bonang matsoho a ka le maoto a ka, hore ke 'na ka sebele. Ntoboketseng le utloe, hobane sethotsela ha se na nama le masapo, kamoo le mponang ke e-na le tsona kateng.”

₄₀Hoba a rialo, a ba bontša matsoho le maoto a hae. ₄₁Eare ha ba ntse ba sa lumele ke thabo, ba maketse, a re ho bona: “Na le na le ho ka jeoang moo?” ₄₂Ba mo nea leqa la tlhapi e besitsoeng. ₄₃A le nka, a le ja ba mo shebile.

₄₄Joale a re ho bona: “Ke 'ona mantsoe a ka, ao ke ileng ka le bolella 'ona ha ke sa na le lōna, hore eka khona ho phethahale tsohle tse ngotsoeng Molaong oa Moshe, le Baporofeteng, le Lipesalemeng ka 'na.”

₄₅Eaba o ba bula likelello hore ba utloisise Mangolo. ₄₆A re ho bona: “Ho ngotsoe joalo hore eka khona Kreste a hlōkōfatsoe, a tsohe bafung ka tsatsi la boraro, ₄₇le hore ka lebitso la hae, lichaba tsohle li phatlalletsoe pako le tšoarelo ea libe, ho qala Jerusalema. ₄₈Lōna le lipaki tsa litaba tsena. ₄₉Bonang, 'na ke tla le rōmella seo Ntate a le tšepisitseng sona, empa le lule motseng mona ho fihlela ha le apesoa matla a tsoang holimo.”

₅₀Joale Jesu a ba isa kantle ho motse, a ea le bona ho ea fihla Bethania, a phahamisa matsoho, a ba hlohonolofatsa. ₅₁Eitse ha a ntse a ba hlohonolofatsa, a tloha ho bona, a nyolleloa leholimong. ₅₂Hoba ba mo khumamele, ba khutlela Jerusalema ka nyakallo e kholo, ₅₃'me ba 'na ba e-ba ka Tempeleng ka nako tsohle, ba boka Molimo.