LUKA 22

₁Mokete oa bohobe bo sa lomosoang, o bitsoang Paseka, o ne o atametse. ₂Kaha baprista ba baholo le Litsebi tsa Molao ba ne ba tšaba batho, ba batla leqheka la ho bolaea Jesu. ₃Eaba Satane o kena ka ho Judase ea bitsoang Isekariota, eo e neng e le e mong oa ba leshome le metso e 'meli. ₄A ea buisana le baprista ba baholo le balaoli ba Tempele kamoo a ka ba neelang eena kateng. ₅Ba thaba, 'me ba lumellana le eena ho mo fa chelete. ₆A utloisisa, a ba a batla monyetla oa ho ba neela eena letšoele le le sieo.

₇Joale ha fihla letsatsi la bohobe bo sa lomosoang, leo konyana ea Paseka e neng eka khona e hlajoe ka lona. ₈Jesu a rōma Petrose le Johanne, a re: “E-eang, le re lokisetse Paseka, hore re tle re e je.”

₉Ba re ho eena: “U rata ha re e lokisetsa kae?”

₁₀A re ho bona: “Bonang, ha le kena motseng le tla khahlana le motho ea jereng nkho ea metsi; mo lateleng ho ea tlung eo a kenang ho eona. ₁₁Le re ho mong'a ntlo: ‘Moruti o re ho uena: Kamore e kae, eo nka jelang Paseka ho eona 'moho le barutuoa ba ka?’ ₁₂Motho eo o tla le bontša kamore e kaholimo, e kholo, e nang le thepa. Le lokisetse Paseka hona teng.”

₁₃Ba ea, ba fumana ho le joalokaha a ba boleletse, 'me ba lokisetsa Paseka.

₁₄Nako ha e fihlile, Jesu a qala ho ja le baapostola ba hae. ₁₅A re ho bona: “Ke lakalitse haholo ho ja Paseka ena le lōna, ke e-s'o hlōkōfatsoe, ₁₆hobane kea le bolella hore ha nka ke ka e ja ho fihlela e phethahatsoa 'Musong oa Molimo.”

₁₇A nka senoelo, a leboha, a re: “Se nkeng, 'me le se sielane, ₁₈hobane kea le bolella, ho tloha joale ha nka ke ka hlola ke e-noa se tsoang tholoaneng ea morara ho fihlela 'Muso oa Molimo o e-tla.”

₁₉A nka bohobe, a leboha, a bo ngoatha, a ba nea bona, a re: “Hona ke 'mele oa ka o fanoang ka baka la lōna; etsang hona hore le tle le nkhopole.”

₂₀Ha ba se ba jele, a etsa joalo le ka senoelo, a re: “Senoelo sena ke selekane se secha se tiisitsoeng ka mali a ka, a tšolleloang lōna. ₂₁Empa bonang, ea nkèkang o na le 'na mona tafoleng. ₂₂Ruri Mor'a Motho o ikela ho ea kamoo ho reriloeng kateng; leha ho le joalo, ho malimabe motho ea mo èkang.” ₂₃Ba qala ho botsana hore na ekaba ke ofe ho bona ea tla etsa hona.

₂₄Khang ea e-ba teng har'a bona, ea hore na ke ofe ho bona ea ka nkoang e le e moholo. ₂₅Empa Jesu a re ho bona: “Mahosi a lichaba aa li busa, 'me ba nang le matla holim'a tsona ba bitsoa bababalli. ₂₆Empa ho lōna ho se be joalo; e moholo har'a lōna a mpe a be joaloka e monyenyane, 'me ea tsamaisang a be joaloka ea sebeletsang. ₂₇Ana e moholo ke ofe: na ke ea jang kapa ea fepang? Na hase ea jang? Har'a lōna, 'na ke joaloka ea fepang. ₂₈Lōna le ba ileng ba ema le 'na ha ke ne ke lekoa. ₂₉Joalokaha Ntate a nkhethetse 'Muso, le 'na ke le khethela oona, ₃₀hore le je, le noe tafoleng ea ka 'Musong oa ka. Le tla lula literoneng le ahlōle melōko e leshome le metso e 'meli ea Iseraele.

₃₁“Simone, Simone, bona, Satane o le kōpile hore a le hlōkōle joaloka koro, ₃₂empa ke u rapeletse hore u se ke ua felloa ke tumelo. Joale uena, ha u se u bakile, u matlafatse bana beno.”

₃₃Simone a re ho eena: “Morena, ke itokiselitse ho ea le uena chankaneng le lefung.”

₃₄Empa Jesu a re: “Petrose, kea u bolella hore kajeno, pele mokōkō o lla, u tla be u se u ntatōtse hararo, u re ha u ntsebe.”

₃₅Jesu a re ho bona: “Ha ke ne ke le rōmile le se na sepache, mokotla, le meqathatso, na le ile la haelloa ke letho?”

Ba re: “Le letho.”

₃₆A re ho bona: “Empa joale, ea nang le sepache a se nke, le oona mokotla ka mokhoa o joalo. Ea hlokang sabole a rekise seaparo sa hae, a e reke. ₃₇Kea le bolella hore se ngotsoeng, se reng: ‘O baleletsoe le baetsalibe’, eka khona se phethahale ho 'na, hobane se ngotsoeng ka 'na se tla phethahala.”

₃₈Eaba ba re: “Morena, bona, lisabole tse peli ke tsena.”

A re ho bona: “Ho lekane.”

₃₉Jesu a tsoa, a ea Thabeng ea Mehloaare ka tloaelo ea hae, 'me barutuoa ba hae ba mo latela. ₄₀Eare ha a fihla sebakeng seo, a re ho bona: “Rapelang, hore le se kene molekong.” ₄₁A sutha pel'a bona, sebaka se ka bang kaa ka sa lejoe ha le betsoa, 'me a khumama, a rapela, ₄₂a re: “Ntate, ha u rata, ak'u tlose senoelo sena ho 'na; feela ho etsoe thato ea hao, e seng ea ka.” ₄₃Lengeloi la hlaha ho eena le e-tsoa leholimong, la mo matlafatsa. ₄₄Ha a le litlallong tsa lefu a rapela ka ho fetisisa, 'me mofufutso oa hae oa e-ba joaloka marotholi a mali a rothelang fatše.

₄₅Ha a rapetse a ea ho barutuoa, a ba fumana ba khalehile ke masoabi, ₄₆'me a re ho bona: “Le robaletse'ng? Tsohang le rapele, hore le se kene molekong.”

₄₇Eare Jesu a sa bua, ha hlaha letšoele, 'me e mong oa ba leshome le metso e 'meli ea bitsoang Judase, o ne a le eteletse pele. Eaba o atamela ho Jesu, hore a mo ake. ₄₈Jesu a re ho eena: “Judase, na u ka èka Mor'a Motho ka kako na?”

₄₉Eare ha ba pota-potileng Jesu ba bona se tla etsahala, ba re: “Morena, re ba hlathe ka sabole?” ₅₀Eaba e mong oa bona o se a hlatha mohlanka oa Moprista e Moholo, a mo pōma tsebe ea letsoho le letōna.

₅₁Jesu a re: “Tlohelang, ho lekane!” Eaba o ama tsebe ea hae, oa mo folisa.

₅₂Joale Jesu a re ho baprista ba baholo le balaoli ba Tempele ba tlileng ho mo tšoara: “Na ebe ke senokoane ha le tlile ka lisabole le likoto tjee? ₅₃Ke ne ke ntse ke e-na le lōna ka matsatsi 'ohle ka Tempeleng, ha lea ka la ntšoara! Empa nako ena ke ea lōna le ea Matla a Lefifi.”

₅₄Eare hoba ba mo tšoare, ba mo isa ha Moprista e Moholo. Petrose a latela a le sebakana. ₅₅Ha ba se ba besitse mollo har'a lebala, 'me ba lutse hammoho, Petrose a lula har'a bona. ₅₆Lekhabunyane le leng ha le 'mona a lutse mollong, la mo talimisisa, la re: “Le enoa o ne a e-na le eena.”

₅₇Empa a latōla, a re: “Hela, mosali, ha ke mo tsebe!”

₅₈Ho se hokae e mong a 'mona, a re: “Le uena u oa bona.”

Petrose a re: “He, monna, ha ke eena!”

₅₉Ha ho fetile nako e ka bang hora, e mong hape a tiisa, a re: “Kannete le enoa o ne a e-na le eena, etsoe ke Mogalelea.”

₆₀Empa Petrose a re: “Hela, monna, ha ke tsebe seo u se bolelang.” Hang-hang, a sa bua, mokōkō oa lla. ₆₁Eaba Morena oa reteleha, o talima Petrose, 'me Petrose a hopola polelo ea Morena, kamoo a ileng a re ho eena kateng: “Kajeno, pele mokōkō o lla, u tla be u se u ntatōtse hararo.” ₆₂A tsoela kantle a lla habohlōkō.

₆₃Banna ba tšoereng Jesu ba mo soma, ba mo otla. ₆₄Ba ne ba mo khurumetsa sefahleho, ba 'motsa, ba re: “Porofeta! Ke mang ea u otlileng?” ₆₅Ba 'muela le tse ling tse ngata ka ho mo nyefola.

₆₆Ha bo sele, lekhotla la baholo ba sechaba la phutheha, le baprista ba baholo le Litsebi tsa Molao. Ba tlisa Jesu khotleng la bona, ₆₇ba re: “Haeba u le Kreste, re bolelle.”

A re ho bona: “Ha nka le bolella, ha le ka ke la ntumela, ₆₈'me ha nka le botsa, ha le ka ke la nkaraba. ₆₉Empa ho tloha joale, Mor'a Motho o tla lula ka letsohong le letona la Molimo ea matla 'ohle.”

₇₀Joale bohle ba re: “Ha ho le joalo, na u Mora oa Molimo?”

Eena a re ho bona: “Lea bolela, ke eena.”

₇₁Ba re: “Re sa hloka bopaki ba eng? Re ikutloetse molomong oa hae.”