LUKA 20

₁Ka le leng la matsatsi ao, Jesu o ne a ruta batho ka Tempeleng, a ba bolella molaetsa o molemo. Baprista ba baholo le Litsebi tsa Molao le baholo ba tla ho eena, ₂ba 'motsa, ba re: “Re bolelle hore na ke ka matla afe u etsang tsena, kapa na ea u neileng matla ana ke mang?”

₃A ba araba, a re: “Le 'na ke tla le botsa potso, 'me le nkarabe: ₄Na kolobetso ea Johanne e ne e e-tsoa leholimong kapa bathong?”

₅Ba buisana ba le bang, ba re: “Haeba re ka re: ‘Leholimong,’ o tla re: ‘Ke ka baka la'ng le sa kang la mo lumela?’ ₆Empa haeba re ka re: ‘Bathong,’ sechaba sohle se tla re tlepetsa ka majoe, hobane se khotsoe hore Johanne e ne e le moporofeta.”

₇Eaba ba araba ka hore ha ba tsebe moo e neng e e-tsoa teng.

₈Jesu a re ho bona: “Le 'na he, ha ke le bolelle hore na ke etsa tsena ka matla afe.”

₉Joale Jesu a bolella batho setšoantšo sena: “Motho e mong a na a lema tšimo ea morara, a e etsa seahlolo le balemi, 'me a eta nako e telele. ₁₀Ka nako ea teng, a rōma mohlanka ho balemi, hore ba tle ba mo nee karolo ea litholoana tsa tšimo, empa balemi ba mo khakhatha, ba mo khutlisa a se na letho. ₁₁A boela a rōma mohlanka e mong, empa le eo ba mo khakhatha, ba mo tlontlolla, ba mo khutlisa a se na letho. ₁₂A eketsa a rōma oa boraro, empa le eo ba mo ntša maqeba, ba mo lahlela kantle.

₁₃“Joale mong'a tšimo a re: ‘Ke tla etsa joang? Ke tla rōma mora oa ka eo ke mo ratang; mohlomong eena ba tla mo hlompha.’

₁₄“Empa ha balemi ba 'mona, ba buisana ba le bang, ba re: ‘Enoa ke mojalefa; a re 'molaeeng, hore lefa e tle e be la rōna.’ ₁₅Eaba ba mo lahlela kantle ho tšimo, baa 'molaea.

“Ekaba mong'a tšimo o tla ba etsa joang? ₁₆O tla tla, a timetse balemi bao, tšimo a e nee ba bang.”

Eare ha ba utloa hoo, ba re: “A ho se be joalo!”

₁₇A ba talima, a re: “Sena se ngotsoeng ke ho re'ng:

₁₉Litsebi tsa Molao le baprista ba baholo ba batla ho mo tšoara ka eona nako eo, hobane ba tsebile hore o boletse setšoantšo seo a lekanya bona, empa ba tšaba batho.

₂₀Ba lisa Jesu ka hloko, 'me ba rōma lihloèla tse iketsang e ka ke batho ba lōkileng, hore li tle li mo tšoare ka lipuo, li mo neele 'musisi. ₂₁Tsa 'motsa, tsa re: “Moruti, rea tseba hore seo u se buang le seo u se rutang se nepahetse. Ha u ee ka tšobotsi, empa u ruta tsela ea Molimo ka 'nete. ₂₂Na hoa lumelleha hore re ntšetse Sesare lekhetho kapa che?”

₂₃Empa a lemōha bophokojoe ba bona, a re ho bona: ₂₄“Mpontšeng chelete ea denare. E na le setšoantšo sa mang le mongolo oa mang?”

Ba re: “Ke tsa Sesare.”

₂₅A re ho bona: “Joale he, neang Sesare seng sa Sesare le Molimo seng sa Molimo.”

₂₆Ba sitoa ho mo tšoasa ka lipuo pontšeng ea sechaba, ba makalla karabo ea hae, 'me ba khutsa.

₂₇Joale ha tla ba bang ba Basaduke, ba latōlang tsoho ea bafu, ba 'motsa, ₂₈ba re: “Moruti, Moshe o re ngoletse hore: ‘Ha ngoan'abo monna a e-shoa a e-na le mosali, a se na bana, ngoan'abo mofu a kenele mohlolohali eo, a tsoalle ngoan'abo bana.’ ₂₉Ho ne ho e-na le bara ba motho ba supileng, eaba oa pele oa nyala, 'me a shoa a se na bana. ₃₀Oa bobeli, ₃₁le oa boraro, le bona ba mo kenela, ka mokhoa o joalo, ka bosupa ba bona ba e-shoa ba sa siee bana. ₃₂Qetellong le eena mosali a shoa. ₃₃Ha ho le joalo, tsohong ea bafu mosali e tla ba mohats'a ofe ho bona, kaha e bile mohats'a bona ka bosupa ba bona?”

₃₄Jesu a re ho bona: “Bana ba lefatše baa nyalana, baa nyalisoa, ₃₅empa ba nang le tokelo ea ho ba le kabelo tsohong ea bafu mehleng e tlang, bona ha ba nyalane, ha ba nyalisoe. ₃₆Ba ke ke ba hlola ba e-shoa hobane ba tšoana le mangeloi. Ke bana ba Molimo hobane ba tsositsoe bafung. ₃₇Ha e le hore bafu ba tla tsoha, le Moshe o ne a ngole litabeng tsa sehlahla se meutloa, moo a reng: ‘Morena ke Molimo oa Aborahama, Molimo oa Isaka, le Molimo oa Jakobo.’ ₃₈Molimo hase oa bafu, ke Molimo oa ba phelang, hobane bohle ba phela ka eena.”

₃₉Litsebi tse ling tsa Molao tsa araba, tsa re: “Moruti, u buile hantle,” ₄₀hobane li ne li ke ke tsa beta pelo ho 'motsa letho.

₄₁Jesu a re ho bona: “Batho ba ka le bolella hore Kreste ke mora oa Davida joang? ₄₂Bukeng ea Lipesalema Davida ka boeena o re:

₄₅Ha batho bohle ba ntse ba mametse, Jesu a re ho barutuoa ba hae: ₄₆“Hlokomelang Litsebi tsa Molao tse thabelang ho tsamaea li apere liaparo tse phuphuthang, tse ratang ho lumelisoa mabaleng a metse, le litulo tse hlomphehang matlung a thapelo, le litulo tse kapele meketeng, ₄₇tse jang matlo a basali ba bahlolohali, 'me li ntse li etsa lithapelo tse telele ka boikaketsi. Li tla ahlōloa ka ho fetisisa.”