MEETLO 7

₁“ ‘Ona ke molao oa nyehelo ea tefelo ea melato. E halalela ka ho fetisisa. ₂Moo phoofolo ea sehlabelo sa secheso e hlabeloang teng, le phoofolo ea nyehelo ea tefelo ea melato e tla hlabeloa teng; mali a eona a tla fōkoa aletareng ho e potoloha. ₃Ho tla nyeheloa ka mafura a eona 'ohle: mafura a mohatla, le mohlèhlo. ₄Liphieo tse peli, le tšōtso ea tsona e mahlakoreng, le phapohane, e tla tlosoa 'moho le liphieo. ₅Moprista o tla li chesetsa holim'a aletare, e le nyehelo ea secheso e etsetsoang Morena. Ke nyehelo e tlosang sebe. ₆E mong le e mong e motona oa baprista a ka ja nyehelo eo; a e jelle sebakeng se halalelang, hobane e halalela ka ho fetisisa.

₇“ ‘Molao oa sehlabelo sa ho tšoareloa libe, le oa nyehelo ea tefelo ea sebe o mong feela. Sehlabelo seo moprista a etsang tefelo ea sebe ka sona ke sa hae. ₈Letlalo la phoofolo eo moprista a etsetsang motho sehlabelo sa secheso ka eona, e tla ba la moprista eo. ₉Nyehelo ea lijo, e phehiloeng ka onto, le eohle e halikiloeng ka pane, kapa ka rosetere, e tla ba ea moprista ea etselitseng motho nyehelo ka eona. ₁₀Nyehelo ea lijo, e lubiloeng ka ole kapa e sa lujoang, e tla ba ea bara bohle ba Arone ka ho lekana.

₁₁“ ‘Ona ke molao oa sehlabelo sa teboho, seo motho a ka se etsetsang Morena.

₁₂“ ‘Ha sehlabelo e le sa teboho, motho a se tlise se e-na le maqebekoane a sa lomosoang, a lubiloeng ka ole; le moqathane o sa lomosoang, o tlotsitsoeng ka ole; le likuku tse entsoeng ka phofo e thumisehileng, e lubiloeng ka ole. ₁₃O tla etsa nyehelo ea hae ka maqebekoane a sa lomosoang 'moho le phoofolo ea sehlabelo sa teboho. ₁₄E 'ngoe ea likuku tsa sehlabelo sena e tla nyehelloa Morena, ka ho e akhōtsa. Ena e tla ba ea moprista ea fōkang mali a liphoofolo tsa linyehelo tsa teboho. ₁₅Nama ea phoofolo ea sehlabelo sa nyehelo ea teboho e tla jeoa hona mohl'a letsatsi leo la nyehelo; ho se ke ha ba e sieloang letsatsi la hosasane.

₁₆“ ‘Empa ha sehlabelo e le nyehelo ea boikano kapa ea boithaopo, se tla jeoa mohl'a letsatsi la nyehelo, 'me se ka salang se tla jeoa ka letsatsi la hosasane. ₁₇Nama ea sehlabelo, e ntseng e setse ka letsatsi la boraro, e tla chesoa ka mollo. ₁₈Haeba nama ea sehlabelo sa teboho e ka jeoa ka letsatsi la boraro, ha e ka ke ea amoheleha, esita le mong'a eona e ke ke ea mo tsoela molemo; e tla talingoa e le manyala, 'me ea e jang o tla ba molato.

₁₉“ ‘Nama e amang ntho e silafetseng ha e na ho jeoa, e tla chesoa ka mollo, empa bohle ba hloekileng, nama ena ba ka e ja. ₂₀Motho ea jang nama ea sehlabelo sa nyehelo ea teboho, e etselitsoeng Morena, a le sesila, ea joalo o tla khaoloa sechabeng sa habo. ₂₁Hape, ha motho a ama ntho efe le efe e silafetseng, ebang ke motho ea silafetseng, kapa phoofolo, kapa ntho efe le efe e khesehang, 'me eba o ja sehlabelo sa nyehelo ea teboho, e etselitsoeng Morena, motho eo le eena o tla khaoloa sechabeng sa habo.’ ”

₂₂Morena a bua ho Moshe, a re: ₂₃“Bua le bana ba Iseraele, u re: ‘Mafura afe kapa afe, e ka ba a khomo, kapa a nku, kapa a pōli, le se ke la a ja. ₂₄Mafura a phoofolo e ichoellang feela, le mafura a phoofolo e harotsoeng ke libatana, 'ona a ka sebelisoa mererong efe kapa efe, empa le se ke la ba la a ja. ₂₅Mang le mang ea jang mafura a phoofolo eo motho a e nyehellang Morena e le secheso, le eena motho eo o tla khaoloa sechabeng sa habo. ₂₆Liahelong tsa lōna tsohle le se ke la ba la ja bobete, e ka ba ba nonyana, kapa ba phoofolo. ₂₇Motho ofe le ofe ea jang bobete bofe le bofe, le eena o tla khaoloa sechabeng sa habo.’ ”

₂₈Morena a bua ho Moshe, a re: ₂₉“Bua le bana ba Iseraele, u re: ‘Motho ea nyehellang Morena sehlabelo sa hae sa teboho, o tla mo tlisetsa karolo ea sona e le nyehelo e khethehileng. ₃₀O tla tlisetsa Morena nyehelo ea secheso ka matsoho a hae; o tla tlisa mafura le sefuba hore a tle a se akhōtse kapele ho Morena, e le nyehelo e akhōtsoang. ₃₁Moprista o tla chesetsa mafura ao holim'a aletare, empa sefuba e tla ba sa Arone le bara ba hae. ₃₂Sehlabelong sa hao, sa nyehelo ea teboho, u tla nea moprista serope sa tsoho le letona, e le nyehelo e akhōtsoang. ₃₃E mong oa bara ba Arone, ea nyehelang ka mali le ka mafura a nyehelo ea teboho, eena seabo sa hae e tla ba serope sa tsoho le letona. ₃₄Sehlabelong sa nyehelo ea teboho, ea bana ba Iseraele, ke nkile sefuba sa nyehelo e akhōtsoang, le serope sa nyehelo e phahamisetsoang holimo, ke li neile moprista Arone le bara ba hae; ke molao oa mehla eohle’.”

₃₅Sena ke seabo sa Arone le bara ba hae, se tsoang linyehelong tsa secheso tsa Morena, seo ba se abetsoeng ho tloha mohla ba halaletsoang hore e be baprista ba Morena. ₃₆Mohla Morena a ba tlotsang, o ne a laele bana ba Iseraele hore ba ba fe seabo sena, 'me hona ke molao oa mehla eohle, oa melōko ea bona.

₃₇Ona ke molao oa secheso sa nyehelo ea lijo, le sa nyehelo e tlosang sebe, le sa nyehelo ea melato, le sa nyehelo ea khalaletso, le sa sehlabelo sa nyehelo ea teboho. ₃₈Tsena, Morena o ne a li laele Moshe ha a le thabeng ea Sinai, mohla a neng a laela bana ba Iseraele ho tlisetsa Morena linyehelo tsa bona, ha ba le lehoatateng la Sinai.