Sehlabelo sa teboho
1“ ‘Ha motho a nyehela ka sehlabelo sa teboho, se tsoang mohlapeng oa hae oa likhomo, ebang ke e tona kapa e tšehali, o tla nyehella Morena ka eona e se na sepha. 2O tla bea letsoho la hae holim'a hlooho ea phoofolo eo, a e hlabele monyakong oa Tente ea Morena. Baprista, e leng bara ba Arone, ba tla fōka mahlakore 'ohle a mane a aletare, ka mali a eona. 3Sehlabelong sena sa teboho, seo e leng sa secheso se etsetsoang Morena, o tla nyehela ka mohlèhlo, le ka mafura 'ohle a likahare. 4Liphieo tse peli le tšōtso ea tsona e mahlakoreng, le phapohane, e tla tlosoa 'moho le liphieo. 5Joale bara ba Arone ba tla li chesetsa holim'a aletare, e leng holim'a patsi e tukang. Ke nyehelo ea secheso se monko o monate, se amohelehang ho Morena.
6“ ‘Haeba nyehelo oa hae ea sehlabelo sa teboho, se etsetsoang Morena, e e-tsoa mohlapeng oa likhutšoane, ebang e tona kapa e tšehali, o tla nyehela ka eona e se na sepha. 7Haeba motho a nyehela ka nku, o tla e tlisetsa Morena. 8O tla bea letsoho la hae holim'a hlooho ea eona, 'me a e hlabele kapele ho Tente ea Morena. Bara ba Arone ba tla fōka mahlakore 'ohle a mane a aletare, ka mali a eona. 9Sehlabelong sena sa teboho, seo e leng sa secheso se etsetsoang Morena, o tla nyehela ka mafura a eona, le mafura 'ohle a mohotla o khaoletsoeng nkatapeng, le mohlèhlo, le mafura 'ohle a likahare. 10Liphieo tse peli le tšōtso ea tsona e mahlakoreng, le phapohane, e tla tlosoa 'moho le liphieo. 11Joale moprista o tla li chesetsa holim'a aletare, e le secheso sa lijo se nyehelloang Morena.
12“ ‘Haeba motho a nyehela ka pōli, o tla e tlisetsa Morena. 13O tla bea letsoho la hae holim'a hlooho ea eona, a e hlabele kapele ho Tente ea Morena. Bara ba Arone ba tla fōka mahlakore 'ohle a mane a aletare, ka mali a eona. 14O tla nyehela ka mohlèhlo, le ka mafura 'ohle a likahare, e le secheso se etsetsoang Morena. 15Liphieo tse peli le tšōtso ea tsona e mahlakoreng, le phapohane, e tla tlosoa 'moho le liphieo. 16Joale moprista o tla li chesetsa holim'a aletare, e le nyehelo ea secheso sa lijo, se monko o monate. Mafura 'ohle ke a Morena.
17“ ‘E tla ba molao oa mehla eohle, melōkong eohle ea lōna, liahelong tsohle tsa lōna, hore le se ke la ja mafura kapa bobete.’ ”
