MEETLO 19

₁Morena a bua ho Moshe, a re:

₂“Bua le sechaba sohle sa bana ba Iseraele, u re ho sona: ‘Le halalele, hobane 'na, Morena Molimo oa lōna, kea halalela.

₃“ ‘E mong le e mong oa lōna a hlomphe ntat'ae le 'm'ae, le bōlōke lisabatha tsa ka. Ke 'na Morena Molimo oa lōna.

₄“ ‘Le se ke la sebeletsa melimo ea bohata, le se ke la iketsetsa melimo e bōpiloeng ka tšepe. Ke 'na Morena Molimo oa lona.

₅“ ‘Ha le etsetsa Morena sehlabelo sa teboho, le se etse hore le tle le amohelehe ho eena. ₆Mohla letsatsi leo le etsang sehlabelo seo ka lona, le se je, le be le se je le ka letsatsi le hlahlamang, empa se ka salang, sa fihleloa ke letsatsi la boraro, le se chese ka mollo. ₇Haeba le ka se ja ka letsatsi la boraro, e se e le manyala, se ke ke sa amoheleha. ₈Mang kapa mang ea se jang, o tla jara bokhopo ba hae, hobane o tla be a silafalitse ntho e halalelang ea Morena. Motho eo o tla khaoloa sechabeng sa habo.

₉“ ‘Ha le kotula masimo a lōna, le se ke la kotulisisa ho ea fihla meeling, 'me le se ke la khoahlapisa moo le seng le kotutse teng. ₁₀U se ke ua khoahlapisa tšimo ea hao ea morara, 'me u se ke ua thonaka morara o oetseng fatše; u o siele mofutsana le moeti. Ke 'na Morena Molimo oa hao.

₁₁“ ‘Le se ke la utsoa, le se ke la etsetsana bolotsana, kapa la bolellana mashano.

₁₂“ ‘Le se ke la hlapanyetsa leshano ka lebitso la ka, 'me ka mokhoa oo la silafatsa lebitso la Molimo oa lōna. Ke 'na Morena.

₁₃“ ‘U se ke ua hatella mohaeno, kapa ua mo hanyapetsa.

“ ‘U se ke ua lula ka moputso oa letsatsi oa mosebeletsi oa hao, ho fihlela letsatsi le hlahlamang.

₁₄“ ‘U se ke ua rohaka tsebetutu; u se ke ua bea sekhōpi tseleng ea sefofu, empa u tšabe Molimo oa hao. Ke 'na Morena.

₁₅“ ‘U se ke ua ahlola ka leeme. Ha u ahlola u se ke ua sekamela ka ho mofutsana, kapa ua tlōtla ea phahameng; u ahlole mohaeno ka toka.

₁₆“ ‘U se ke ua tsamaisa leshano har'a sechaba sa heno; u se ke ua tšabella mohaeno ha a bolaoa. Ke 'na Morena.

₁₇“ ‘U se ke ua jara ngoan'eno ka pelo. U khalemele mohaeno, esere ua itjarisa sebe ka baka la hae.

₁₈“ ‘U se ke ua iphetetsa, kapa ua ntšetsa lisuoa baneng ba sechaba sa heno, empa u rate oa heno joalokaha u ithata. Ke 'na Morena.

₁₉“ ‘Le bōlōke melao ea ka.

“ ‘U se ke ua hoelisa liphoofolo tsa hao ka tsa mofuta osele.

“ ‘U se ke ua jala mefuta e 'meli ea peō tšimong ea hao, 'me u se ke ua apara seaparo se mefuta e 'meli ea masela.

₂₀“ ‘Ha monna a kena likobong tsa ngoanana oa lekhoba ea seng a neiloe monna e mong, feela ngoanana eo a e-s'o lefelloe chelete ea topollo, 'me a e-s'o lokolohe, ba tla ahloloa, empa ba ke ke ba bolaoa, hobane ngoanana eo ha a e-s'o lokolohe. ₂₁Monna eo o tla tlisetsa Morena pheleu ea nyehelo bakeng sa molato oa hae, a e tlise monyakong oa Tente ea Morena. ₂₂Kapele ho Morena, ka pheleu ena, moprista o tla mo etsetsa nyehelo ea tefelo e tlosang sebe, ka baka la sebe seo a se entseng, 'me o tla tšoareloa.

₂₃“ ‘Ha le fihla naheng ea Kanana, 'me le lema sefate sefe kapa sefe se jeoang, le tla ila litholoana tsa sona. Ka lilemo tse tharo le tla li ila, le se ke la li ja. ₂₄Ka selemo sa bona litholoana tsohle tsa sona li tla abeloa Morena, e le mpho e halalelang ea teboho. ₂₅Empa ka selemo sa bohlano le ka ja litholoana tsa sefate seo, hore se tle se le behele litholoana tse ngata. Ke 'na Morena Molimo oa lōna.

₂₆“ ‘Le se ke la ja letho le nang le mali. Le se ke la sebelisa litaola kapa bonohe.

₂₇“ ‘Le se ke la khatla tlopo, kapa la sekola litelu tsa lōna.

₂₈“ ‘Le se ke la iphatsa ha le llela mofu, le se ke la etsa mokhōra. Ke 'na Morena.

₂₉“ ‘U se ke ua silafatsa morali oa hao ka ho mo etsa seotsoa, esere naha ea tlala bootsoa le bokhopo bo bongata.

₃₀“ ‘Le bōlōke Lisabatha tsa ka, le hlomphe Sehalalelo sa ka. Ke 'na Morena.

₃₁“ ‘Le se ke la batla thuso ho mathuela kapa linohe; le se ke la ea ho bona, esere ba le silafatsa. Ke 'na Morena Molimo oa lōna.

₃₂“ ‘U eme ka maoto ha u bona raputsoe, u hlomphe leqheku, 'me u tšabe Molimo oa hao. Ke 'na Morena.

₃₃“ ‘Ha molichaba a jakile naheng ea habo lōna, le se ke la mo sōtla. ₃₄Empa molichaba ea jakileng har'a lōna, a be joaloka letsoalloa la naha; le mo rate joalokaha le ithata, hobane le lōna le ne le le balichaba naheng ea Egepeta. Ke 'na Morena Molimo oa lōna.

₃₅“ ‘U se ke ua etsa bolotsana ha u metha bolelele ba lintho, kapa boima ba tsona, kapa ha u metha ntho e mokelikeli. ₃₆U be le sekala se nepahetseng sa ho metha boima, le bolelele, le ntho e mokelikeli. Ke 'na Morena Molimo oa lōna, ea le ntšitseng naheng ea Egepeta.

₃₇“ ‘Le bōlōke melao ea ka eohle, le litaelo tsa ka tsohle, 'me le li phethe. Ke 'na Morena.’ ”