MEETLO 15

₁Morena a bua ho Moshe le ho Arone, a re: ₂“Buang le bana ba Iseraele, le re ho bona: ‘Ha monna a e-na le lero le qhitsang botoneng ba hae, lero leo le na le sesila. ₃Ha a ntse a e-na le lero, sesila sa hae e tla ba sena: botona ba hae bo ka qhitsa lero, kapa bo ka thibana ke lero, o ntse a le sesila.

₄“ ‘Liphate tsohle tseo monna eo botona ba hae bo qhitsang lero a robalang ho tsona, li sesila; le eng kapa eng eo a lulang ho eona e sesila. ₅Mang kapa mang ea amang liphate tsa monna eo o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana. ₆Mang kapa mang ea lulang eng kapa eng e neng e lutsoe ke monna eo botona ba hae bo qhitsang, o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana.

₇“ ‘Mang kapa mang ea amang 'mele oa monna eo botona ba hae bo qhitsang, o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana.

₈“ ‘Haeba monna eo ea kulang a tšoèla motho ea hloekileng ka mathe, ea tšoetsoeng o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana.

₉“ ‘Qhana efe kapa efe eo monna eo ea kulang a palamang ka eona, e sesila. ₁₀Mang kapa mang ea amang ntho e neng e le katlas'a hae, o tla ba sesila ho fihlela ka phirimana. Mang kapa mang ea nkang ntho ea mofuta o joalo o tla hlatsoa liaparo tsa hae, a tole ka metsi, a sale a ntse a le sesila ho fihlela ka phirimana.

₁₁“ ‘Mang kapa mang eo monna ea kulang a mo amang ka matsoho a sa hatleloang o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana.

₁₂“ ‘Lijana tsa letsopa, tse amiloeng ke monna ea kulang li tla pshatloa, 'me ntho e 'ngoe le e 'ngoe e entsoeng ka lehong e tla hlatsuoa ka metsi.

₁₃“ ‘Ha monna enoa eo botona ba hae bo neng bo qhitsa lero a fola, o tla qeta matsatsi a supileng pele a ka hloekisoa. O tla hlatsoa liaparo tsa hae, a tole ka metsi a sa tsoa khuoa selibeng, 'me e tla ba o hloekile. ₁₄Ka letsatsi la borobeli o tla nka maebana-khōroana a mabeli, kapa malinyane a mabeli a maeba; a tle kapele ho Morena, monyakong oa Tente ea Morena, 'me a a nee moprista. ₁₅Moprista o tla nyehela ka 'ona, le leng e be la nyehelo e tlosang sebe, le leng e be la nyehelo ea secheso. Ka mokhoa o joalo, moprista o tla etsetsa monna eo nyehelo ea tefelo ea sebe ka baka la ho qhitsa lero hoo ha hae.

₁₆“ ‘Ha monna a hōshōtsa metsi a bonna ba hae, o tla tola 'mele oohle ka metsi, 'me o tla sala a ntse a le sesila ho fihlela ka phirimana. ₁₇Lesela lefe kapa lefe, kapa letlalo lefe kapa lefe le nang le metsi ana a bonna holim'a lona, le tla hlatsuoa ka metsi, 'me le sale le ntse le e-na sesila ho fihlela ka phirimana.

₁₈“ ‘Ha monna a kena likobong tsa mosali, bobeli ba bona ba tla tola ka metsi, 'me ba sale ba ntse ba le sesila ho fihlela ka phirimana.

₁₉“ ‘Ha mosali a e-na le lehatlelo, o tla ba sesila ka matsatsi a supileng. Mang kapa mang ea mo amang o tla ba sesila ho fihlela ka phirimana.

₂₀“ ‘Liphate tsohle tseo a robalang ho tsona, le eng kapa eng eo a lulang holim'a eona ha a ntse a le sesila, li tla ba sesila. ₂₁Mang kapa mang ea amang liphate tsa hae o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana. ₂₂Mang kapa mang ea amang setulo seo a neng a lutse holim'a sona, o tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana. ₂₃Haeba a le holim'a liphate kapa holim'a setulo ha tsena li angoa, mang kapa mang ea tla ama ntho e neng e le holim'a liphate, kapa holim'a setulo seo mosali eo a neng a se lutse, o tla ba sesila ho fihlela ka phirimana.

₂₄“ ‘Ha monna a ka robala le eena, o tla nka sesila sa mosali eo, 'me o tla ba sesila ka matsatsi a supileng. Liphate tseo a ka robalang ho tsona, le tsona li tla ba sesila.

₂₅“ ‘Ha mosali a e-ba le lehatlelo, empa e se ka nako ea lona, kapa haeba lehatlelo le nka nako e telele ho feta ea mehla, nakong eo le ntseng le tsoela pele o tla ba sesila, joalokaha a le sesila ka nako ea lehatlelo la hae. ₂₆Liphate life kapa life tseo a robalang ho tsona nakong ena ea lehatlelo li tla ba sesila, joalokaha li ne li tla ba sesila nakong ea lehatlelo la hae. Setulo sefe kapa sefe seo a lulang ho sona se tla ba sesila joaloka mohl'a nako ea lehatlelo la hae. ₂₇Mang kapa mang ea li amang o tla ba sesila. O tla hlatsoa liaparo tsa hae, a tole ka metsi, 'me a sale a ntse a le sesila ho fihlela ka phirimana.

₂₈“ ‘Ha lehatlelo lena le khaolitse, o tla qeta matsatsi a supileng, 'me kamorao ho moo o tla be a hloekile. ₂₉Ka letsatsi la borobeli o tla nka maebana-khōroana a mabeli, kapa malinyane a mabeli a maeba, a a tlise ho moprista, monyakong oa Tente ea Morena. ₃₀Moprista o tla nyehela ka le leng, e le nyehelo e tlosang sebe, le leng e le la nyehelo ea secheso. Ka mokhoa ona moprista o tla mo etsetsa nyehelo ea tefelo ea sebe ho Morena, ka baka la lehatlelo le ileng la 'makela sesila.

₃₁“ ‘Hlokomelisa bana ba Iseraele sesila sa bona, esere ka ho silafatsa Tente ea ka, e teng har'a bona, sesila sena sa bona sa ba bolaea.’ ”

₃₂Ona ke molao o etselitsoeng monna ea qhitsang lero botoneng ba hae, kapa ea hōshōtsang metsi a bonna, 'me eba o ba sesila. ₃₃Ebile ke molao o etselitsoeng mosali ka nako ea lehatlelo la hae, kapa ea nang le seso se qhitsang. Ke molao o etselitsoeng monna le mosali, le o etselitsoeng monna ea robalang le mosali ea sesila.