Ho hloekisoa ha balepera
1Morena a bua ho Moshe, a re:
2“Ona e tla ba molao oa molepera, mohla a hloekisoang. O tla tlisoa ho moprista. 3Moprista o tla tsoela kantle ho liahelo, a mo hlahlobe. Haeba lefu la lepera le folile, 4moprista o tla laela hore ea tlil'o hloekisoa a tlise linonyana tse peli, tse phelang, tse hloekileng; thupa ea kedare, le khoele e khubelu, le lehlaku la hisopa. 5Moprista o tla mo laela hore e 'ngoe ea linonyana e bolaeloe ka sejaneng sa letsopa, se nang le metsi a sa tsoa khuoa selibeng. 6Moprista o tla nka nonyana e phelang, le thupa ea kedare, le khoele e khubelu, le lehlaku la hisopa, a li ine kaofela ka maling a nonyana e ileng ea bolaoa. 7Moprista o tla foka motho eo ea hloekisoang hasupa. O tla phatlalatsa hore motho eo o hloekile. O tla tlohela nonyana e phelang hore e fofele naheng.
8“Motho enoa ea tlil'o hloekisoa o tla hlatsoa liaparo tsa hae, a beole moriri oa hae kaofela, a tolle ka metsing; joale e tla ba o hloekile. Kamorao ho mona a ka kena ka liahelong, empa o tla lula kantle ho tente ea hae ka matsatsi a supileng. 9Ka letsatsi la bosupa o tla beola moriri oa hae kaofela, le litelu tsa hae, le lintši tsa hae, le moriri oohle oa hae. O tla hlatsoa le liaparo tsa hae, a tolle ka metsing; joale e tla ba o hloekile.
Linyehelo tsa ho hloekisoa
10“Ka letsatsi la borobeli o tla nka likonyana tse peli, tse tona, tse se nang sepha; le konyana ea sethojana e nang le selemo, e se nang sepha; le phofo e thumisehileng, e boima ba likilo tse tharo e lubiloeng ka ole, e le nyehelo ea phofo; le ole e ka etsang halofo ea lethara. 11Moprista ea etsang tšebeletso ea tlhoekiso o tla emisa motho eo ea hloekisoang, 'moho le linyehelo tsena tsohle, monyakong oa Tente ea Morena, kapele ho Morena.
12“Moprista o tla nka e 'ngoe ea likonyana tse tona, a nyehele ka eona, e le nyehelo e tlosang molato, hammoho le ole e ka etsang halofo ea lethara; a li akhōtse e le nyehelo e akhōletsoang Morena. 13Konyana e tona o tla e hlabela Sehalalelong, moo ho hlabeloang liphoofolo tsa nyehelo ea tefelo ea sebe, le tsa nyehelo ea secheso. Nyehelo ea tefelo ea sebe, joaloka nyehelo e tlosang sebe, ke ea moprista, 'me e halalela ka ho fetisisa. 14Moprista o tla nka mali a mang a nyehelo e tlosang molato, 'me ka 'ona a tlotse ntlha ea tsebe ea letsoho le letona ea motho eo ea tlil'o hloekisoa, le monoana o motona oa letsoho la hae le letona, le monoana o motona oa leoto la letsoho le letona. 15Moprista o tla nka ole e ka etsang halofo ea lethara, a e qapiletse kahar'a seatla sa letsoho la hae le letšehali; 16a ine monoana oa hae oa bosupa ka oleng eo, 'me ka eona a fōke hasupa kapele ho Morena. 17Ka ole e setseng ka seatleng sa hae, moprista o tla tlotsa ntlha ea tsebe ea letsoho le le tona ea motho ea tlil'o hloekisoa, le monoana o motona oa letsoho la hae le letona, le monoana o motona oa leoto la hae la letsoho le letona, a tlotse holim'a mali a phoofolo ea nyehelo e tlosang molato. 18Ka ole eohle e setseng ka seatleng sa hae, o tla tlotsa hlooho ea motho eo ea hloekisoang. Moprista o tla etsetsa motho eo tefelo ea sebe ho Morena.
19“Moprista o tla nyehela ka nyehelo e tlosang sebe, a etsetse motho eo ea hloekisoang tefelo ea sebe, ka baka la ho se hloeke ha hae. Kamora' mona o tla hlaba phoofolo ea nyehelo ea secheso. 20Moprista o tla nyehela ka nyehelo ea secheso, le ka nyehelo ea phofo holim'a aletare. O tla etsetsa motho eo tefelo ea sebe, 'me e tla ba o hloekile.
Sehlabelo sa molepera oa mofutsana
21“Motho ha a futsanehile, 'me a sitoa ho ntša ho lokelang, o tla nka konyana e le 'ngoe e tona, hore e be nyehelo e tlosang molato, e be e sebelisoe e le nyehelo e akhōtsoang ka baka la tefelo ea sebe sa hae; a nke le phofo e thumisehileng, e boima ba kilo e le 'ngoe, e lubiloeng ka ole, e le nyehelo ea phofo; le ole e ka etsang halofo ea lethara. 22A nke le maebana-khoroana a mabeli, kapa malinyane a mabeli a maeba, ao a ka a fumanang. Le leng e tla ba la nyehelo e tlosang sebe, 'me le leng e be la nyehelo ea secheso.
23“Ka letsatsi la borobeli o tla tlisa tsena ho moprista, monyakong oa Tente ea Morena, kapele ho Morena, ka baka la ho hloekisoa ha hae. 24Moprista o tla nka konyana ea nyehelo e tlosang molato, le ole e ka etsang halofo ea lethara, a li akhotse e le nyehelo e akhōtsoang kapele ho Morena. 25O tla hlaba konyana ea nyehelo e tlosang molato, a nke a mang a mali a eona, 'me ka 'ona a tlotse ntlha ea tsebe ea letsoho le letona la motho ea hloekisoang, le monoana o motona oa letsoho la hae le letona, le monoana o motona oa leoto la hae le letona. 26Moprista o tla qapiletsa ole ka seatleng sa letsoho la hae le letšehali, 27'me ka monoana oa bosupa oa letsoho la hae le letona a fōke ka ole eo hasupa kapele ho Morena. 28Ka ole e 'ngoe e ka seatleng sa hae, moprista o tla tlotsa ntlha ea tsebe ea letsoho le letona ea motho eo ea hloekisoang, le monoana o motona oa letsoho la hae le letona, le monoana o motona oa leoto la letsoho la hae le letona; a tlotse holim'a mali a phoofolo ea nyehelo e tlosang molato. 29Ka ole eohle e setseng ka seatleng sa hae, moprista o tla tlotsa hlooho ea motho eo ea hloekisoang, hore a mo etsetse tefelo ea sebe ho Morena. 30Ka maebana-khoroana ao a mabeli, kapa ka malinyane a mabeli a maeba, ao motho a tsebileng ho a fumana, 31moprista o tla etsa nyehelo e tlosang sebe ka le leng, 'me ka le leng a etse nyehelo ea secheso, a be a etse le nyehelo ea phofo. Moprista o tla etsetsa motho eo ea hloekisitsoeng tefelo ea sebe ho Morena. 32Ona ke molao o etselitsoeng motho ea tsoileng lepera, ea sitoang ho fumana tse hlokoang hore a hloekisoe.”
Lepera le ka matlung
33Morena a bua ho Moshe le ho Arone, a re: 34“Ha le fihla naheng ea Kanana, eo ke le neang eona hore e be ea lōna, haeba nka otla ntlo, eo le tla aha ho eona, ka lepera, 35mong'a ntlo eo o tla tla ho tsebisa moprista, a re: ‘Ho bonahala eka lelapa la ka le na le mofuta o itseng oa lefu.’ 36Moprista o tla laela hore ho ntšoe tsohle tse ka tlung eo, pele a ka kena ka ho eona ho ea hlahloba lefu leo, esere tsohle tse ka tlung tsa ba le sesila. Kamora' moo, moprista o tla tla ho hlahloba ntlo. 37Ha moprista a e hlahloba, 'me a fumana hore maboteng a ntlo ho na le matheba a matala kapa a mafubelu a lefu leo, a phobetseng ho feta lebota, 38moprista o tla tsoa ka tlung eo, 'me a e koale ka matsatsi a supileng. 39Ka letsatsi la bosupa moprista o tla khutlela teng ho ea hlahloba ntlo eo hape. Haeba a fumana hore lefu leo le anetse mabota a ntlo, 40o tla laela hore majoe ao a nang le lefu leo a qhebolloe, a lahleloe sebakeng se litšila, se kantle ho motse. 41Bokahare bohle ba ntlo bo tla theboloa, 'me mobu o thebotsoeng o qhalloe sebakeng se litšila, se kantle ho motse. 42Joale ho tla tlisoa majoe a macha, a hahelloe sebakeng sa majoe a khale, 'me ho lujoe seretse se secha, ho liloe mabota a ntlo.
43“Haeba lefu le hlaha hape kamora' hoba ho qhebolloe majoe, ho theboloe mabota, ho be ho liloe hape, 44moprista o tla tla hape, 'me a e hlahlobe. Haeba a fumana hore lefu le anetse ntlo, hona e tla ba ke lepera le tšoaetsang ka tlung eo, 'me ntlo eo e sesila. 45Ntlo eo e tla heletsoa, majoe a eona, le lithupa tsa eona, le seretse sohle sa eona, li lahleloe sebakeng se litšila, kantle ho motse.
46“Mang kapa mang ea kenang ka tlung eo ha e sa ntsane e koetsoe, o tla silafala ho fihlela ka phirimana. 47Mang kapa mang ea robalang, kapa ea jellang ka tlung eo o tla hlatsoa le liaparo tsa hae.
48“Empa ha moprista a e-tla ho tla hlahloba ntlo, 'me a fumana hore lefu ha lea anela ntlo, kamora' hore e liloe, moprista o tla phatlalatsa hore ntlo eo e hloekile, kaha lefu leo le phekolehile.
49“Hore a hloekise ntlo, moprista o tla nka linonyana tse peli, le thupa ea kedare, le khoele e khubelu, le lehlaku la hisopa. 50E 'ngoe ea linonyana o tla e bolaela ka sejaneng sa letsopa, se nang le metsi a sa tsoa khuoa selibeng. 51Joale o tla nka thupa ea kedare, le lehlaku la hisopa, le khoele e khubelu, 'moho le nonyana e ntseng e phela, ebe tsohle o li ina ka maling a nonyana e bolailoeng, le ka metsing a sa tsoa khuoa selibeng, 'me a foke ntlo hasupa. 52Kamora' hoba a etse nyehelo e tlosang sebe ka mali a nonyana, le ka metsi a sa tsoa khuoa selibeng, le ka nonyana e ntseng e phela, le ka thupa ea kedare, le ka lehlaku la hisopa, le ka khoele e khubelu, 53o tla tlohela nonyana e ntseng e phela hore e fofele naheng, kantle ho motse. Ha a se a etselitse ntlo ena nyehelo ea tefelo ea sebe, e tla ba e hloekile.”
54Ona ke molao oa mefuta eohle ea lefu la lepera, le oa 'mōkoana; 55le oa lepera le liaparong, le le ka matlung; 56le oa makukuma, le oa lekhoèkhoè, le oa mabali a benyang, le oa litlapeli.
57Ona ke molao oa lepera, ho re ruta ho tseba ha ntlo e le sesila, kapa e hloekile.
