Likhosi li keneloa ke letsoalo
1Ha likhosi tsohle tsa Baamore tse neng li le ka bophirimela, mose ho Jorodane, le likhosi tsohle tsa Bakanana tse neng li le pel'a leoatle, li utloa kamoo Morena a ileng a pshesa metsi a Jorodane kapele ho bana ba Iseraele kateng, ho fihlela ba tšetse, tsa nyahama lipelo, tsa felloa ke sebete ho hang, ka baka la ho tšaba bana ba Iseraele.
Baiseraele ba bōlōtsoa hape
2Ka eona nako eo, Morena a re ho Joshua: “Iketsetse lithipa ka lejoe la moralla, u boele u bōlōtse bana ba Iseraele.” 3Joshua a iketsetsa lithipa ka lejoe la moralla, a boela a bōlōtsa bana ba Iseraele ha ba le Gibeata-Haralote.
4Lebaka leo Joshua a neng a ba bōlōtsa ka lona ke lena: Batho bohle ba neng ba tsoe Egepeta, ba batona, e leng banna bohle ba bahlabani, ba ne ba shoele lehoatateng, ba le tseleng, kamora' hoba ba tsoe naheng ea Egepeta. 5Batho bohle ba neng ba tsoe Egepeta ba ne ba bolotse, empa batho bohle ba ileng ba tsoalloa lehoatateng, ha ba le tseleng, ba e-tsoa Egepeta, e ne e le maqai. 6Ka lilemo tse mashome a mane bana ba Iseraele ba ne ba 'nile ba lelera lehoatateng, ho fihlela chaba sohle se timela, esita le bahlabani ba ileng ba tsoa Egepeta, hobane ba ne ba sa ka ba mamela lentsoe la Morena. Morena o ne a ile a ba hlapanyetsa hore a ke ke a ba lumella ho bona naha eo Morena a ileng a hlapanyetsa bo-ntat'a bona hore o tla re nea eona, e leng naha e phallang lebese le mahe a linotši. 7Bara ba bona, bao Molimo a ileng a thiba likheo tsa bo-ntat'a bona ka bona, ke bona bao Joshua a ileng a ba bolōtsa. E ne e le maqai, hobane ba ne ba sa ka ba bōlōtsoa ha ba le tseleng.
8Eare ha sechaba sohle sa banna se se se bōlōlitsoe, sa lula libakeng tsa sona moo liahelong, ho fihlela se fola. 9Morena a re ho Joshua: “Kajeno ke tlositse sekhobo sa Egepeta ho lōna.” Ka baka leo, sebaka seo se bitsoa Gilegale ho fihlela kajeno-ea-bokajeno.
Mokete oa Paseka
10Bana ba Iseraele ba 'na ba hlola Gilegale, 'me ka letsatsi la leshome le metso e mene la khoeli eo, ka phirimana, ba keteka mokete oa Paseka liphuleng tsa Jeriko. 11Hoseng, ka letsatsi le hlahlamang la mokete oa Paseka, ba e-ja tse behiloeng ke naha, e leng likuku tse sa lomosoang, le liqhōme tsa koro, ba li ja ka lona letsatsi leo. 12Ka letsatsi leo ka lona ba jeleng thōkō ea tse behiloeng ke naha, manna a khaotsa ho ba teng, 'me eaba bana ba Iseraele ha ba sa fumana manna, empa selemong seo ba ja litholoana tsa naha ea Kanana.
Ho thibelloa Jeriko
13Eare ha Joshua a le Jeriko a phahamisa mahlo, a talima, 'me a bona monna ea emeng kapele ho eena, a tšoere sabole. Joshua a ea ho eena, 'me a re ho eena: “U oa habo rōna, kapa u oa lireng?”
14Monna eo a re: “Che! 'Na ke molaoli oa lebōtho la Morena. Joale ke se ke le teng.”
Joshua a itihela fatše ka sefahleho, a obamela fatše, a re ho eena: “Morena oa ka o re'ng ho mohlanka oa hae?”
15Molaoli oa lebotho la Morena a re ho Joshua: “Rōla meqathatso ea hao, hobane sebaka seo u emeng holim'a sona sea halalela.” Joshua a etsa joalo.
