Metse ea Balevi
1Lihlooho tsa malapa a Balevi tsa tla ho moprista Eleasare, le ho Joshua mora oa Nune, le lihlooho tsa merabe ea bana ba Iseraele. 2Tsa bua le bona ba le Shilo, naheng ea Kanana, tsa re: “Morena o ile a laela ka molomo oa Moshe, hore re neoe metse eo re tla phela ho eona, le makhulo a eona, moo likhomo tsa rōna li tla fula teng.” 3Ho ea ka taelo ea Morena, bana ba Iseraele ba nea Balevi metse ena e naheng ea bona, 'moho le makhulo a eona.
4Lōtho la malapa a Kohate la tsoa. Bana ba moprista Arone, e leng Balevi, ba abeloa ka lōtho metse e leshome le metso e meraro, e tsoang ho ba morabe oa Juda, le ho ba morabe oa Simeone, le ho ba morabe oa Benjamine. 5Bana ba Kohate ba setseng ba abeloa ka lōtho metse e leshome, e tsoang malapeng a morabe oa Efraime, le a morabe oa Dane, le a karolo e 'ngoe ea morabe oa Manase.
6Naheng ea Bashane bana ba Gereshone ba abeloa ka lōtho metse e leshome le metso e meraro, e tsoang malapeng a morabe oa Isakare, le a morabe oa Ashere, le a morabe oa Nafthali, le a karolo e 'ngoe ea morabe oa Manase.
7Bana ba Merari, ho ea ka malapa abo bona, ba abeloa metse e leshome le metso e 'meli, e tsoang ho ba morabe oa Rubene, le ho ba morabe oa Gade, le ho ba morabe oa Sebulone.
8Bana ba Iseraele ba abela Balevi metse ena le makhulo a eona ka lōtho, joalokaha Morena a ne a laetse ka molomo oa Moshe.
9Metseng ea morabe oa bana ba Juda, le metseng ea morabe oa bana ba Simeone, Balevi ba abeloa metse ena, e boleloang ka mabitso. 10E ne e le litlōhōlō tsa Arone, tsa malapa a Kohate, tseo e neng e le bana ba Levi, hobane lōtho la pele e ne e le la bona.
11Ba ba nea Motse oa Areba o naheng e maralla ea Juda, e leng Heborone, le makhulo a eona a e pota-potileng. Areba e ne e le ntat'a Anake. 12Empa masimo a motse oo, le metsana ea oona, 'ona ba a abela Kalebe, mora oa Jefune, hore e be a hae.
13Bara ba moprista Arone ba neoa motse oa Heborone, oo babolai ba tšabelang ho oona, hore e be oa bona hammoho le makhulo a oona, le motse oa Lebena le makhulo a oona, 14le Jatire le makhulo a eona, le Eshetemoa le makhulo a eona, 15le Holone le makhulo a eona, le Debiri le makhulo a eona, 16le Aine le makhulo a eona, le Juta le makhulo a eona, le Bete-Shemeshe le makhulo a eona. Ea e-ba metse e robong, e tsoang merabeng eo e 'meli.
17Naheng ea morabe oa Benjamine ea e-ba Gibeone le makhulo a eona, le Geba le makhulo a eona, 18le Anatote le makhulo a eona, le Alamone le makhulo a eona. Ea e-ba metse e mene.
19Metse eohle ea bana ba Arone, e leng baprista, e ne e le metse e leshome le metso e meraro le makhulo a eona.
20Malapa a bana ba Kohate, e leng Balevi, ke ho re bana ba bang ba Kohate, metse eo a ileng a e abeloa ka lōtho e ne e e-tsoa morabeng oa Efraime.
21Ba ba abela motse oo babolai ba tšabelang ho oona, e leng Shekeme e naheng e maralla ea Efraime, le makhulo a eona, le Gesere le makhulo a eona, 22le Kibesaime le makhulo a eona, le Bete-Horone le makhulo a eona. Ea e-ba metse e mene.
23Naheng ea morabe oa Dane ba abeloa Eleteke le makhulo a eona, le Gibetone le makhulo a eona, 24le Aiealone le makhulo a eona, le Gate-Rimone le makhulo a eona. Ea eba metse e mene.
25Naheng ea karolo e 'ngoe ea morabe oa Manase ba baeloa Taanake le makhulo a eona, le Gate-Rimone le makhulo a eona. Ea e-ba metse e 'meli.
26Metse eohle e ileng ea abeloa malapa a bana ba bang ba Kohate e ne e le metse e leshome le makhulo a eona.
27Naheng ea karolo e 'ngoe ea morabe oa Manase bana ba Gereshone, ba malapa a Balevi, ba abeloa motse oo babolai ba tšabelang ho oona, e leng Golane e Bashane le makhulo a eona, le Beshetera le makhulo a eona. Ea e-ba metse e 'meli. 28Naheng ea morabe oa Isakare ba abeloa Kishione le makhulo a eona, le Deberate le makhulo a eona, 29le Jaremute le makhulo a eona, le Ene-Gannime le makhulo a eona. Ea e-ba metse e mene. 30Naheng ea morabe oa Ashere ba abeloa Mishale le makhulo a eona, le Abadone le makhulo a eona, 31le Helekate le makhulo a eona, le Rehobe le makhulo a eona. Ea e-ba metse e mene. 32Naheng ea morabe oa Nafthali ba abeloa motse oo babolai ba tšabelang ho oona, e leng Kadeshe e Galelea, le makhulo a eona, le Hamote-Dore le makhulo a eona, le Karatane le makhulo a eona. Ea e-ba metse e meraro. 33Metse eohle ea morabe oa Gereshone, ho ea ka malapa abo bona, e ne e le leshome le metso e meraro hammoho le makhulo a eona.
34Naheng ea morabe oa Sebulone, malapa a bana ba Merari, e leng a mang a Balevi, a abeloa Jokoneame le makhulo a eona, le Karata le makhulo a eona, 35le Dimena le makhulo a eona, le Nahalole le makhulo a eona. Ea e-ba metse e mene. 36Kamose ho Jorodane, naheng ea morabe oa Rubene, ba abeloa motse oo babolai ba tšabelang ho oona, e leng Besere e lehoatateng le holim'a sehlaba, le makhulo a eona, le Jahase le makhulo a eona, 37le Kademote le makhulo a eona, le Mefaata le makhulo a eona. Ea e-ba metse e mene. 38Naheng ea morabe oa Gade ba abeloa motse oo babolai ba tšabelang ho oona, e leng Rama e Gileade, le makhulo a eona, le Mahanaime le makhulo a eona, 39le Heshebone le makhulo a eona, le Jasere le makhulo a eona. Metse eo kaofela ea e-ba e mene. 40Metse ena eohle e ne e le ea bana ba Merari, ho ea ka malapa abo bona, e leng ba bang ba malapa a Balevi. Metse eo ba ileng ba e abeloa ka lōtho ea e-ba leshome le metso e 'meli.
41Metse eohle ea Balevi, e neng e le kahar'a naha ea bana ba Iseraele, e ne e le metse e mashome a mane a metso e robeli, le makhulo a eona. 42Motse o mong le o mong oa metse ena o ne o e-na le makhulo a oona a o pota-potileng, 'me ho ne ho le joalo metseng ena eohle.
43Morena a nea Baiseraele naha eohle eo a neng a hlapanye hore o tla e nea bo-ntat'a bona, 'me ea e-ba ea bona, ba aha ho eona. 44Morena a ba nea phomolo hohle, ho ea ka tsohle tseo a neng a li hlapanyetse bo-ntat'a bona, 'me ha se ke ha e-ba le ea mong oa lira tsa bona ea emang kapele ho bona. Morena a neelana ka lira tsa bona matsohong a bona. 45Ha se ke ha haella letho la tse molemo, tseo Morena a neng a buile ka tsona ho ba ntlo ea Iseraele. Tsohle tsa phethahala.
