JOSHUA 19

₁Joale ha tsoa lōtho la bobeli, la bana ba morabe oa Simeone, ho ea ka malapa abo bona. Naha ea bona e ne e le kahar'a naha ea bana ba Juda. ₂Naha eo ea bona e ne e le Beeresheba, le Sheba, le Molada, ₃le Hasere-Shuale, le Bala, le Eseme, ₄le Eletolade, le Bethule, le Horema, ₅le Sikelage, le Bete-Marakabote, le Hasere-Susa, ₆le Bete-Labaote, le Sharuhene. E ne e le metse e leshome le metso e meraro, le metsana ea eona. ₇Hape e le Aine, le Rimone, le Etere, le Ashane; metse e mene le metsana ea eona. ₈Le metse eohle e neng e pota-potile metse eo, ho ea fihla Baalate-Beere; le Rama e ka boroa.

Ena ke eona naha ea morabe oa bana ba Simeone, ho ea ka malapa abo bona. ₉Kaha karolo ea bana ba Juda e ne e le kholo ho feta palo ea bona, karolo e 'ngoe ea naha eo ea bana ba Juda e ile ea abeloa bana ba Simeone. Ka baka leo, naha ea bana ba Simeone e ne e le kahar'a naha ea bana ba Juda.

₁₀Joale ha tsoa lōtho la boraro la bana ba Sebulone, ho ea ka malapa abo bona. Moeli oa naha ea bona o ne o fihla Saride. ₁₁Moeli oa bona o ne o nyoloha ka bophirimela ho ea fihla Marala, le ho ea fihla Dabeshete, le ho ea fihla molatsoaneng o ka bochabela ho Jokoneame. ₁₂Ho tloha Saride o thinyetse ka bochabela, o e'o fihla moeling oa Kiselote-Tabore, ebe o fetela Daberate, o nyolohele Jafia. ₁₃Ho tloha moo o fetele nq'a bochabela, ho ea Gate-Hefere, le Itakasine; ebe o fetela Rimone-Metoare, o e'o fihla Nea. ₁₄Ka leboea moeli o thinyetse Hanatone, o e'o fella Khohlong ea Jifetahele. ₁₅Metse e ne e le Katate, le Nahalole, le Shimerone, le Jidala, le Betlelehema; e le metse e leshome le metso e 'meli, le metsana ea eona.

₁₆Ena ke naha ea bana ba Sebulone, le metse ena le metsana ea eona, ho ea ka malapa abo bona.

₁₇Lōtho la bone la tsoa e le la bana ba Isakare; ke ho re bana ba Isakare ho ea ka malapa abo bona. ₁₈Moeli oa bona o ne o fihla Jesereele, le Kesulote, le Shuneme, ₁₉le Hafaraime, le Shione, le Anahara, ₂₀le Rabite, le Kishione, le Ebese, ₂₁le Remete, le Ene-Gannime, le Ene-Hada, le Bete-Pasese. ₂₂Moeli o ne o fihla Tabore, le Shahasaime, le Bete-Shemeshe; o e'o fella Jorodane. E ne e le metse e leshome le metso e tšeletseng, le metsana ea eona.

₂₃Ena ke naha ea morabe oa bana ba Isakare, le metse le metsana ea eona, ho ea ka malapa abo bona.

₂₄Joale ha tsoa lōtho la bohlano, la bana ba morabe oa Ashere, ho ea ka malapa abo bona. ₂₅Moeli oa bona o ne o akarelelitse Helekate, le Hale, le Betene, le Akashafe, ₂₆le Alameleke, le Amade, le Mishale. Ka bophirimela o ne o fihla Karamele le Shihore-Lebenate. ₂₇O thinyetse ka nq'a bochabela, o lebe Bete-Dagone, o e'o fihla Sebulone le Khohlong ea Jifetahele, ka leboea ho Bete-Emeke le Neiele. O lopalle ho ea Kabule, ka ho le letšehali. ₂₈O ee Eberone, le Rehobe, le Hamone, le Kana, ho ea fihla Sidone e Kholo. ₂₉Joale moeli o thinyetse Rama, o e'o fihla motseng hahelelitsoeng oa Tire; ebe o thinyetsa Hosa, o ea fella leoatleng, ho tloha Mehebele ho ea Akasibe, ₃₀le Uma, le Afeke, le Rehobe. Metse e ne e le mashome a mabeli a metso e 'meli, le metsana ea eona.

₃₁Ena ke eona naha ea bana ba morabe oa Ashere, le metse le metsana ea eona, ho ea ka malapa abo bona.

₃₂Lōtho la botšelela la tsoa e le la bana ba morabe oa Nafthali; ke ho re ba Nafthali ho ea ka malapa abo bona. ₃₃Moeli oa bona o ne o tloha Helefe, le sefateng se seholo sa Saananime, le Adami-Nekebe, le Jabeneele, ho ea fihla Lakume, 'me o fella Jorodane. ₃₄Ebe moeli oo o thinyetsa ka bophirimela, o e'o fihla Asenote-Tabore. Ho tloha moo o ee Hukoke, o e'o fihla Sebulone, ka nq'a boroa; o be o e'o fihla le Ashere ka bophirimela; ka nq'a bochabela o e'o fihla Juda le Jorodane. ₃₅Metse e neng e hahelelitsoe e ne e le Sidime, le Sere, le Hamate, le Rakate, le Kinerete, ₃₆le Edama, le Rama, le Hasore, ₃₇le Kedeshe, le Ederei, le Ene-Hasore, ₃₈le Jirone, le Migedale-Ele, le Horeme, le Bete-Anate, le Bete-Shemeshe. E ne e le metse e leshome le metso e robong, le metsana ea eona.

₃₉Ena ke eona naha ea morabe oa bana ba Nafthali, le metse le metsana ea eona, ho ea ka malapa abo bona.

₄₀Lōtho la bosupa la tsoa e le la bana ba morabe oa Dane, ho ea ka malapa abo bona. ₄₁Moeli oa bona o ne o akaretsa Sora, le Eshetaole, le Ire-Shemeshe, ₄₂le Shaalebine, le Aiealone, le Jitela, ₄₃le Elone, le Timina, le Ekerone, ₄₄le Eleteke, le Gibetone, le Baalate, ₄₅le Jehude, le Bene-Berake, le Gathe-Rimone, ₄₆le Me-Jarekone, le Rakone, le naha e tobaneng le Jafo.

₄₇Bana ba Dane ba ne ba haelloa ke naha ea bona, 'me ba nyoloha, ba futuhela Lesheme. Ba e hapa, ba bolaea baahi ba eona ka sabole, ea e-ba ea bona. Ba aha ho eona, eaba Lesheme ba se ba e bitsa Dane ka ho e reella ntat'a bona Dane.

₄₈Ena ke eona naha ea morabe oa bana ba Dane, le metse le metsana ea eona, ho ea ka malapa abo bona.

₄₉Ha Baiseraele ba qetile ho aba naha eo e leng lefa, ka ho seha meeli ea eona, eaba bana ba Iseraele ba nea Joshua, mora oa Nune, naha ea hae kahar'a ea bona. ₅₀Ho ea ka taelo ea Morena, ba mo nea motse oo a o kōpileng, e leng Timina-Sera, e naheng e maralla ea Efraime. A tsosa motse oo, 'me a aha teng.

₅₁Ena ke naha e ileng ea ajoa ke moprista Eleasare, le Joshua mora oa Nune, le bao e leng lihlooho tsa malapa a bo-ntat'a bona, ba merabe ea bana ba Iseraele; ba e aba ka lōtho ba le Shilo, kapele ho Morena, monyakong oa Tente ea Morena. Eaba joale ba qetile ho aba naha.