JONASE 3

₁Lentsoe la Morena la fihla ho Jonase khetlo la bobeli, la re: ₂“Tsamaea, u ee Ninife, motseng o moholo, u e'o o phatlalletsa molaetsa oo ke u bolellang oona.”

₃Eaba Jonase oa tsamaea, o ea Ninife, joalokaha Morena a ne a mo laetse. Ninife e ne e le motse oa setlètlèhali; motho o ne a nka matsatsi a mararo ho tsoela ka nq'ane ho oona. ₄Jonase a tsamaea har'a motse ka letsatsi la pele. A nt'o hōoa, a re: “Kamora' matsatsi a mashome a mane feela, Ninife e tla be e timelitsoe!”

₅Batho ba Ninife ba lumela molaetsa oa Molimo. Ba laela hore ho itingoe lijo, 'me bohle ba baholo le ba banyenyane ba apara tse mahoashe.

₆Ha molaetsa o fihla ho khosi ea Ninife, ea raoha teroneng ea eona, ea hlōbōla seaparo sa eona sa bokhosi, ea apara tse mahoashe, 'me ea lula moloreng. ₇Eaba khosi e etsa phatlalatso har'a motse oa Ninife, e re:

“Khosi, e e-na le mahosana a eona, e laela hore: Ho se be motho ea tla latsoa letho, a je kapa a noe; le tsona liphoofolo le likhomo kapa likhutšoane, li se ke tsa fula kapa tsa e-noa metsi. ₈Empa motho a apare tse mahoashe, esita le eona phoofolo. Motho e mong le e mong a ipiletse ka matla ho Molimo, a furalle metsamao ea hae e khopo le liketso tsa hae tsa likhōka. ₉Ho ka tseba mang haeba Molimo a ka 'na a hauha, a khutla khalefong ea hae e tukang, e le hore re se ke ra timela?”

₁₀Eare ha Molimo a bona liketso tsa bona, le kamoo ba baketseng bokhopo ba bona kateng, a ba utloela bohlōkō, 'me a se ke a ba otla joalokaha a ne a itse o tla ba otla. A fela a se ke a ba otla.