Matla a Molimo le bofokoli ba motho
1Jobo a araba, a re:
2“Ruri kea tseba,
ho fela ho le joalo;
motho a ka loka joang
mahlong a Molimo?
3Haeba motho
a ka phea khang le Molimo,
Molimo a ka 'motsa potso
li le sekete,
motho a palloa ke ho araba
leha e le 'ngoe.
4Molimo o bohlale, o bile o matla:
Ke mang ea ka mo hanyetsang,
eaba oa atleha?
5Hang-hang o suthisa lithaba,
ha a halefile a li phethole.
6O sisinya lefatše malulong a lona,
litšiea tsa lona li be li reketle.
7O laela letsatsi, le se ke le chaba,
a b'a fifatse khanya ea linaleli.
8Ke eena ea sarolotseng maholimo,
a a sarolla a le mong,
a tsamaea le holim'a maqhubu,
maqhubu a leoatle;
9a etsa Bèrè e Kholo,
le Makōlōbe, le Selemela,
a etsa le molala
ka boroa ho leholimo.
10O etsa likhōlō
tse fetang tlhalōhanyo ea motho,
o etsa limakatso
tse ke keng tsa baloa.
11“Ha a feta pel'a ka
ha nke be ke 'mone,
ha a itsamaela
le teng ha ke lemohe.
12Ha a inkela,
a ka thibeloa ke mang?
Ke mang ea ka reng ho eena:
‘Joale u etsa joang?’
13Molimo ha a halefile
eba o halefile,
mahlahana a Rahaba
a tjapaletse maotong a hae.
14“Joale 'na
ekaba nka mo arabisa joang?
Mantsoe a likhang
ke a khethe joang?
15Leha ke se na molato
ke ne nke ke ka mo araba,
haese feela ho kōpa mohau
ho Moahlōli oa ka.
16Leha nka mo isa khōtla,
eaba oa tla,
ha ke lumele
a ka ntšekèhèla tsèbè.
17A ka mpilila ka sefefo sa khanyapa,
a nkekeletsa maqeba ho se lebaka.
18A ke ke a ntumella
ka phefumoloha,
a ka ntšithabetsa
ka tse bohlōkō.
19Haeba ho uoa ka matla,
eena ke seqhobane!
Haeba ho uoa ka toka,
eena o tla qōsoa ke mang?
20Leha eba ke se molato,
ke tsuoa ke molomo oa ka,
leha eba ke se na koli,
oona o tla nthoesa molato.
21“Le hoja ke se na koli,
ke se ke itenne;
ke nyelisa bophelo ba ka,
kea bo nyatsa.
22Ke litšoantšoang feela;
ke ka hona ke reng:
‘O timetsa ba lokileng le ba khopo.’
23Ha kotlo e bolaea ka ho tsometsa,
o tla tšeha
ha ba otloa ba se molato.
24Lefatše le matsohong a ba khopo,
o koahela baahlōli ba lona
ka lesira mahlong;
haeba e se eena,
ebe joale ke mang?
25“Tšiu tsa ka li lebelo
ho feta semathi,
li baleha li e-s'o bone molemo;
26li fefoha joaloka sekèpè sa lehlaka,
joaloka ntsu
ha e ubella phofu ea eona.
27Ha nka re:
‘Ke tla lebala pelaelo tsa ka,’
fahleho sa ka se tla èla,
ke bobothèhè.
28Tlokotsi tsa ka tsohle
kea li tšaba,
kea tseba
u ke ke ua re ha ke molato.
29Kaha ke fumanoe ke le molato,
ke hobane'ng ha ke sebeletsa lelea?
30Leha eba nka itlhatsoa ka lehloa,
ka sesepa matsoho a ka ka a hatlela,
31uena u tla nkakhela ka tebetebeng,
aparo tsa ka le tsona
li be li 'nyonye!
32“Molimo hase motho joaloka 'na,
ka hona nke ke ka ba ka mo araba,
fahleho bobeli tsa thulana
re le ka khōtla.
33Hoja pakeng tsa rōna
'moelanyi o teng,
a sebelisa matla a hae holim'a rōna;
34thup'a Molimo e ke e shape fatše,
khalefo ea hae e se ke ea ntšosa;
35ke bue ka bolokolohi
ke se na tšabo,
athe hona joale
'na ke tletsoe ke tšabo.”
