JOBO 8

₂“U tla bua ntho tsee

ho fihlela neng?

Polelo tsa hao

li ka moea oa sefefo!

₃Na Molimo

a ka sokamisa kahlōlo,

Ea Matla 'ohle

a sokamisa ho loka?

₄Haeba bara ba hao ba mo sitetsoe,

o ba otlile

ho ea ka ho sitoa ha bona.

₅Haeba u ka fela ua batla Molimo,

ua ithapella ho Ea Matla 'ohle;

₆haeba u hloekile, 'me u lokile,

ruri le eena o tla u hlokomela,

lapa la hao a le tsose

e le sesupo sa ho loka ha hao.

₇Maruo a pele e n'e le linyane,

a marao 'ona e tla ba boieane.”

₈“Ak'u fuputse ho melōko ea pele,

u batlisise litsebo tsa bo-ntat'a eona.

₉Rōna ba maobane re hloka tsebo;

matsatsi a rōna ho lena lefatše

a ka moriti ha o falōla.

₁₀Ba tla u joetsa, ba u rupele,

ba u khōkhōthele bohlale ba bona.

₁₁“Na loli le ka mela

ho se na mokhoabo,

lehlaka la ata

ho se na mohlaka?

₁₂Ha le sa heloe le sa le letalana,

le pona pele joang bo omella.

₁₃Tsela tsa bohle

ba lebalang Molimo li joalo,

letšepa la ea khopo

le fela joalo;

₁₄tšepo ea hae ea thekesela,

letšepa la hae

le ka bolepo ba sekho;

₁₅o itšetleha ka bona,

bo hana ho tsitsa,

o itšoarella ka bona,

ha bo tšoarehe.

₁₆O ka fate se tlōkōmang

ha tsatsi le chabile,

seo makala a sona

a thathallang le tšimo eohle.

₁₇Metso ea sona

e rarahana har'a qubu ea majoe,

e itšoarella holim'a matlapa.

₁₈Ha se fōthōloa bakeng seo,

baka seo se tla latola, se re:

‘'Na ha ke u tsebe!’

₁₉Bophelo ba sona bo fela joalo,

mela tse ling

li mela hape mobung oo.

₂₀“Molimo a ke ke a lahla

ea se nang molato,

kapa a thusa ba etsang bokhopo;

₂₁o tla boela a etsa hore u tšehe,

molomo oa hao o hōoe ka thabo.

₂₂Ba u hloileng

ba tla apesoa lihlong,

malapa a ba khopo

a nyamelle ruri.”