JOBO 5

₁“Meketsa, Jobo!

Ua arabeloa ke mang?

Har'a mangeloi

u tla ipiletsa ho mang?

₂Sethoto se bolaoa

ke ho koma-koma ha sona,

sehlohoane sona

se bolaoa ke mōna.

₃Ke bone thoto se mela,

methapo'a sona e nama;

ha ntši e panya,

leaho la sona la neoa thōhako.

₄Bana ba sona

ha baa sireletsoa ke motho,

ba robokelloa khotla,

ba hloka manamolela;

₅kotulo ea sona

e jeoa ke ea lapileng a ituletse,

a e honyōlle

leha e le kahar'a meutloa,

batupi bona

ba nyoretsoe leruo la sona.

₆Lerōle hase lona

mohloli oa litlokotsi,

tsietsi ha li ke li rōpōha

li hlaha fatše;

₇motho litsietsi o tsoaloa a li apere,

seka tetema

e qhōmisetsa litlhase holimo.”

₈“Hoja ke uena

nka be ke ipiletsa ho Molimo,

kapele ho Molimo

ke ipēha ka taba ea ka;

₉eena o etsa likhōlō,

mafeta-kutloisiso-ea-motho,

o etsa limakatso,

ntlhoka-palo ke boieane.

₁₀Lefatše o le nesetsa pula,

pula litloèbèlèlè,

metsi a phutsalle,

a tlale lithōta kahohle;

₁₁ba eisehang

a ba hloesetse holim'a litlhōrō,

ba bofifing bona a ba tšelise.

₁₂O nyōpisa merero,

bo-ramasene ba e rerile,

ba be ba hloke katleho;

₁₃ka marab'a bona

o tšoasa bo-ramasene,

maqheka a bona a fetoha lefeela.

₁₄Ba apareloa ke lefifi

tsatsi le ba chabetse,

ere tali e anyesa

ba phothasele seka-bosiu.

₁₅Molimo o namolela mafutsana

puong tse hlabang,

a a lopolle matsohong a ba likhōka;

₁₆kahoo mafutsana a ruile letšepa,

molomo oa bokhopo oa koaleha,

o lilimale.”

₁₇“Ho lehlohonolo

eo Molimo a mo tšoaeang phoso,

kahoo se nyatse

ha Ea Matla a u khalema.

₁₈Molimo oa hlatha,

a be a tlame leqeba;

tsoho la hae lea otla,

le bile lea folisa;

₁₉o tla u phemisa lioa

li o hloele holimo,

ka makhetlo-khetlo

bobe bo ke ke ba u ama.

₂₀Nakong ea sekoboto

o tla u namolela lefung,

nakong ea lintoa

sabole a e thithibanye bohale.

₂₁U tla sireletsoa puong

tsa monyefoli,

timelo u ke ke ua e tšaba

ha e fihlile;

₂₂u tla tšeha timelo le sekoboto,

batana tsa fatše lena

u ke ke ua li tšaba.

₂₃Majoe a ke ke a o sitisa

ho lema masimo,

batana tsa naha

li tla phela ka khotso le uena.

₂₄U tla bona lapa la hao

le phela ka khotso,

u fumane tsohle tsa hao

li ntse li feletse.

₂₅Bana ba hao

u tla bona ba ngatafala,

tlōhōlō tsa hao

li ata seka joang naheng.

₂₆U tla ea lebitleng

lemo tsa hao li ngatafetse,

joaloka koro e eang seotlong

e s'e butsoitse.

₂₇“Tsena li fupulitsoe,

ho fela ho lutse joalo;

li utloe, u li tsebe,

u li fōle molemo.”