JOBO 4

₂“Ebe u tla teneha

ha motho a buisana le uena?

Empa ke mang

ea ka tšoarang leme la hae?

₃Hopola kamoo u rutileng

ba bangata kateng,

ua matlafatsa matsoho a tepeletse!

₄Polelo tsa hao

li tšehelitse ba khōptjoang,

ua matlafatsa mangoele a rèrèkèla.

₅Joale ha tsietsi e u tlela ua nyahama;

ere e u fihlela ebe ua thethèloa!

₆Ho tšaba Molimo ha hao

hase hona letšepa la hao,

ho hloka koli ha hao

eona ntšepeli ea hao?

₇“Ak'u nahane: Mohlokakoli ke ofe

ea kil'a lahleha?

Ba lokileng bona

ba kile ba timetsoa hokae?

₈Kamoo 'na ke seng ke bone kateng,

ba lemang bobe,

ba be ba jale bokhopo,

ba kotula hlanyelo e tšoana le tsona.

₉Ha Molimo a halefa baa timela,

fefo sa khalefo ea hae se ba felise.

₁₀Lekakuba lea puruma,

tautona e kharumake,

meno a litaoana a fetohe,

a fetohe likotoana.

₁₁Tautona e shoa

ke ho hloka sebolaoa,

taoana tsa tauhali

li phasaphase kahohle.”

₁₂“Ke ile ka nyenyeletsoa

ka lekunutu,

ka lōngoa tsèbè

ka ba ka hoesheletsoa.

₁₃Menahanong ea ka, ea litoro, bosiu,

ha phume sa boroko

batho se ba katela,

₁₄tšabo le thōthōmelo

tsa nkoela holimo,

masapo 'ohle a 'mele a kèqèmana.

₁₅Seriti sa falōla kapel'a mahlo a ka,

'meleng oa ka

mohoètè oa iketsa liqala!

₁₆Sa re themelele! ke ntse ke talimile,

sa sona sebopeho ke sa se tsebe!

Sa ema kapel'a mahlo a ka,

ha lilimala,

ka utloa lentsoe le nyenyetsa, le re:

₁₇‘Na ea shoang

a ka loka mahlong a Molimo,

a hloeka le mahlong a 'Mōpi oa hae?

₁₈Ha Molimo a sa tšepe

bahlanka ba hae,

mangeloi a hae

a a qōsetsa bohèlèhèlè;

₁₉a ka tšepa joang

ba meqhemeng ea makoètè,

ba bōpiloeng ka rōle la lefatše,

ba phetšeloang habonolo

joaloka tšoèlè?

₂₀Le ba chabela ba phela,

le likele ba felile,

ba timelle ruri,

ba sa natsoe ke motho.

₂₁Limapo tsa tente tsa bona

lia motsuloa,

ba be ba shoe ba hloka bohlale!’ ”