JOBO 38

₂“U mang uena,

u fifatsang merero ea ka

ka ho pèpèta, empa u se na tsebo?

₃Itlame letheka, u eme senna,

ke u botse lipotso,

uena u nkarabe.

₄“Ha ke rala methèo ea lefatše

u n'u le kae?

Haeba u na le tsebo,

ak'u bolele he!

₅Kaha u tsebanyane:

Tekanyetso tsa lona

li reriloe ke mang?

Thapo e methang bonamo

e harolotsoe ke mang?

₆Tšiea tsa methèo ea lona

li epetsoe kae?

Lejoe la mantlha lona

la beoa ke mang,

₇mohl'a bo-Mphatlalatsane

ba binang ba le 'moho,

mangeloi 'ohle a hōoa ka thabo?

₈“Mohla leoatle le phatlohang

mohloling oa lona,

menyako e n'e tinketsoe ke mang

ho le thibela?

₉Ha ke ne ke le etsetsa

kobo ea maru,

ke le tlama mokhubu

ka fifi la bo-nka-ntjana;

₁₀ha ke ne ke le sehela

meeli ea lona,

ke le tinkeletsa

ka mamati le mekoallo,

₁₁ka na ka re:

‘Marèmèlo a metsi a hao ke ana,

maqhubu a hao a bilohang

a tla fella mona!’

₁₂“Haesale u tsoaloa

na u kil'a laolela meso linako,

ua laela mafube ho hlaha

ka nako ea 'ona,

₁₃hore pheletso tsa lefatše

a li aparele,

ba khopo ba be ba phasaphase?

₁₄Joalokaha 'mōpo oa tempe sa tiiso

o sala letsopeng,

seli le bonahatsa

bōpeho tsa lefatše hantle,

le li bonahatse

sa mokhabiso seaparong.

₁₅Ba khopo ba ke ke ba bona leseli,

matla a bona a tla felisoa.

₁₆“Na mehloling ea leoatle

u kil'a fihla?

Kapa khocheletsane tsa maliba

ua li tsamaea?

₁₇Na menyako ea ntlo ea lefu

u kil'a e bona?

Kapa ua bona

menyako ea Qalo ea Bafu?

₁₈Na bonamo ba lefatše

ua bo tseba?

Haeba tsena tsohle ua li tseba,

ak'u bolele!

₁₉“Tsela e eang habo leseli ke efe?

Lehae labo lefifi lona le hokae?

₂₀Na u ka li isa habo tsona?

Na tsela tse eang teng

ua li tseba?

₂₁Ua li tseba,

hoba u tsoetsoe pele ho tsona!

Lemo tsa ho phela ha hao li ngata!

₂₂“Na u kil'a kena matlung

a polokelo ea lehloa,

kapa ua bona matlo

a polokelo ea sefako,

₂₃tseo ke li boloketseng

nako ea litsietsi,

tsatsi la ho futuha le la lintoa?

₂₄Tsela e eang ntsoanatsatsi

eona e kae?

E eang habo moea oa bochabela

eona e kae?

₂₅“Metsi a likhōhōla

a cheketsoe molapo ke mang,

letōlō le thoathoaretsang

la ralloa tsela ke mang,

₂₆hore pula e nèlè nahathothe,

lehoatateng leo

ho seng baahi ho lona,

₂₇bataolo le likaka

li tle li noesetsoe,

mobung ho fupuhe joang

bo botalana?

₂₈Ntat'a pula ekaba eena ke mang?

Marotholi a phōka 'ona

a tsoetsoe ke mang?

₂₉Ekaba leqhoa

le tsoa ho ea mang pōpelo?

Rame sa leholimo se lalang

sona se tsoetsoe ke mang?

₃₀Metsi aa hoama,

a be sengangata joaloka lejoe,

leqhoa le aparele maliba kahohle.

₃₁“Na u ka tlamahanya

mahlaahlela a Selemela,

kapa ua lokolla

khoele tsa Makolobe?

₃₂Na u ka hlahisa linaleli

ka linako tsa tsona,

ua tsamaisa Bèrè

le naletsana tsa eona?

₃₃Melao e tsamaisang tsa leholimo

na ua e tseba?

Na le moo lefatšeng

u ka e sebelisa?

₃₄“Ka ntsoe la hao,

na maru u ka a laela hore a u apese

ka pula ea litloèbèlèlè?

₃₅Na ke uena ea ka laelang lehalima

ho thoakhatsa?

Na le ee le tle ho uena,

le re: ‘Ke 'na enoa?’

₃₆Pelo ea motho

bohlale e bo filoe ke mang?

Mohopolo oona

kutloisiso oa e neoa ke mang?

₃₇Mohlalefi ke ofe

ea tsebang ho bala maru,

ea ka thulamisang merifi,

merifi ea leholimo,

₃₈ha rōle la lefatše

le fetoha sengangata,

makoete a mōmana,

a etsa liqitikoe?

₃₉“Na u ka tsomela

tauhali linyamatsane,

kapa taoana tsa eona

ua li khorisa ha li lapile,

₄₀li ntse li qachame

lilaong tsa tsona,

kapa li laletse kahar'a lihlahla?

₄₁Ke mang

ea baballang lekhoaba ka lijo,

ha malinyane a lona

a ipiletsa ho Molimo,

a lelera hohle ke ho hloka lijo?”