JOBO 35

₂“Na u bona ho nepahetse

ha u re:

‘'Na ke lokile ho feta Molimo?’

₃U re ho eena:

‘Molemo ke ofe oo ke tla o bona?

Ke tla boelloa ke'ng

ka ho se etse sebe?’

₄“Joale 'na polelo tsa hao

ke tla li araba,

le tsona tsa metsoalle ea hao.

₅Lelalla maholimong u ke u bone,

talima maru a u phahametseng.

₆Ha u etsa sebe

Molimo u mo senyetsa eng?

Ha u ngatafatsa tšito tsa hao,

hoo hona ho mo etsetsa eng?

₇Haeba u lokile u mo nea eng?

Kapa o amohela eng

letsohong la hao?

₈Bokhopo ba hao

bo senyetsa ba joaloka uena,

ho loka ha hao

ho thusa ba joaloka uena.

₉“Batho ba llisoa

ke ho hatelloa haholo,

ba llela ho namoleloa

khōkeng tsa ramonatla.

₁₀Empa ha ho ea reng:

‘Molimo, 'Mōpi oa ka, o kae,

ea re khothatsang ka lifela bosiu,

₁₁ea re rutang

ho fetisa phoofolo tsa naha,

ea re hlalefisang

ho fetisa nonyana tse fofang?’

₁₂Leha ba ipiletsa,

eena ha a arabe,

ka baka la boikakaso

ba ba etsang bokhopo.

₁₃Ruri Molimo a ke ke

a mamela mafeela,

Ea Matla 'ohle

a ke ke a a natsa.

₁₄“A ka u mamela joang,

u re ha u 'mone;

u re nyeoe ea hao

e kapele ho eena,

uena u s'u lebeletse eena feela?

₁₅U ithetsa ka ho re

khalefo ea hae ke mosesetso,

esita le bokhopo

Molimo ha a bo natse.

₁₆Ka baka lena, Jobo o bua feela,

o pèpèta haholo,

feela a se na tsebo.”