Elehu o re Jobo a mo mamele
1“Ka baka lena,
kea u rapela, Jobo:
Ak'u mamele polelo ea ka,
mantsoe a ka 'ohle
u a sekèhèlè tsèbè.
2Mamela! Joale ke lekhatheng
la ho bua,
mantsoe a s'a le lelemeng la ka.
3Mantsoe a ka ke a pelo
e se nang mano,
molomo oa ka o bua 'nete
eo ke e tsebang.
4'Na ke entsoe ke Moea
oa Molimo,
mophefumoloho oa Ea Matla 'ohle
o etsa hore ke phele.
5“Haeba u ka khona, ak'u nkarabe;
rala mabaka a hao,
ebe u nthula ka 'ona.
6Kapel'a Molimo ke tšoana le uena,
ke bōpiloe ka letsopa joaloka uena.
7Lebaka la hore u ntšabe ha le eo,
ho ba teng ha ka
ho ke ke ha u imela.”
Molimo hase sera sa Jobo
8“Ruri u buile
moo ke ntseng ke utloa,
molumo oa mantsoe a hao
ka o mamela:
9‘'Na ke hloekile, ha ke na sebe,
ke hlatsoehile, ha ke na bokhopo,
10empa joale Molimo o mpea libatō,
o ntalima ke le sera sa hae.
11Maoto a ka oa tlamile
ka mahlaahlela,
tselana tsa ka tsohle
oa li lekōla.’
12“Tabeng ena u fositse;
ke u araba ka ho re:
Molimo o moholo ho feta motho.
13Ke ka baka la'ng
ha u phea khang le eena,
u re polelo tsa hao ha a li arabe?
14Molimo o bua
ka mekhoa e le mengata,
empa ha ho ea keng a hlokomele.
15Torong le ponong tsa bosiu,
ha phume sa boroko
batho se ba katetse,
phateng tsa bona ba khalehile,
16Molimo o nyenyeletsa
tsebeng tsa batho,
a ba tšose ka keletso tsa hae,
17hore tsela tse khopo
ba li khelohe,
boikakaso bo be hōle le bona.
18Molimo o phemisa motho
ho theohela lebitleng,
a mo phemise ho bolaoa ka sabole.
19O khalemela motho
ka ho mo robatsa phateng tsa lefu,
a opise masapo a hae 'ohle
ho se khaotso;
20joale takatso ea lijo
ebe ea fela,
a nyonye le limonate
tseo a li ratang.
21O ee a fetohe moketa,
a motele linama,
e sale e le masatsoane,
paloa-likhōpo.
22Moea oa hae o atamela lebitla,
phelo ba hae bo atamele babolai.”
Molimo o mohau
23“Haeba lengeloi le leng
la a sekete,
le le hlakoreng la hae,
e le 'moelanyi,
le ruta motho seo e leng toka,
24le tla mo hauhela,
le bue, le re:
‘Mo hauhele,
a se theohele lebitleng,
hobane ke se ke mo fumanetse
se mo lopollang.’
25Nam'a hae e tla nchafala,
e tšoane le ea lesea,
a okōlōhe, a tšoane
le mehleng ea bocha ba hae.
26O tla rapela Molimo,
eena a mo rekolohele,
fahleho sa hae a tl'a se bone
a nyakaletse,
hobane Molimo o 'museletsa
ho loka ha hae.
27O tla binela batho,
ebe o re ho bona:
‘Ke entse sebe,
ka khopamisa ho loka,
empa sebe seo sa ka
ha kea se otleloa.
28O pholositse moea oa ka
o se ee lebitleng,
ke tla boela ke phele,
ke 'ne ke bone leseli.’
29“Tsena tsohle
Molimo o li etsa ho motho,
a ka li etsa habeli,
a ka li etsa hararo,
30hore a phemise motho
ho theohela lebitleng,
seli la bophelo
le tle le 'monese.
31“Hlokomela, Jobo,
u ke u 'mamele;
ak'u khutse, 'me 'na ke tla bua.
32Haeba u na le puo, ak'u nkarabe;
bua, ke kholoe hore ha u na molato.
33Haeba u sa re letho,
eka khona u 'mamele;
ak'u khutse,
'me ke tla u ruta bohlale.”
