JOBO 30

₁“Ba banyenyane ho 'na

joale baa ntšoma,

bao bo-ntat'a bona

ke neng ke ba nyelisa,

ke neng nke ke ka ba lisisa

mohlape le ntja tsa ka.

₂Matla a bona

a n'a sa nthuse ka letho,

kaha bokoakoariri

bo ne bo ba feletse.

₃Ke mekojoane ea bofuma

le sekoboto,

ba phela ka ho ja metsuntsunyane,

bosiu ba lelera mahalaopeng.

₄Ba kha bolilalilane har'a lihlahla,

metso ea tšinabele ke lijo tsa bona.

₅Ba lelekoa har'a batho ba bang,

ba kueletsoe

joalokaha eka ke masholu.

₆Ba phela ka mangopeng a likhōhōla,

ka malumeleng le kahar'a mafika;

₇ba bokolla ba le kahar'a lihlahla,

ba sunyame 'moho katlas'a bobatsi.

₈Ke bana ba maoatla,

bo-mohloka-lebitso,

ba lelekiloe lefatšeng, har'a batho.

₉“Joale ke bona ba ntlakang ka pina,

ke se ke fetohile sesomo ho bona.

₁₀Ba se ba 'nyonya

ba bile ba nkoekoetla,

fahleho sa ka

ba se tšoela ka mathe.

₁₁Kahoba Molimo a mphokolisitse,

a ntšotlile,

ha ba sa itšoara

leha ba le pel'a ka.

₁₂Ka ho le letona

ba mphutuhela ka sekhakhatha,

ha ke baleha ba mpea merebele,

ba haha metero

ho nketsetsa thibella.

₁₃Ba chekile mamena tseleng ea ka,

ba atlehisoa ke tšenyeho ea ka,

ba re: ‘Ha a na mothusi!’

₁₄Ba kena joalokaha eka rako le oele,

ba subuhlellana har'a masupi!

₁₅Matšabeho 'ohle

a nkoetse holimo,

a ntlositse seriti

ka ho panya ha ntši,

maruo a ka a felile sa mouoane.

₁₆“Moea oa ka

o qhashoha kahare ho 'na,

matsatsi a ho hlōkōfatsoa

a mphihletse;

₁₇ke lala ke chobeloa

ke masapo bosiu,

bohlōkō bo nkōkōnang

ha bo mphe sebaka.

₁₈Matla a bohlōkō ba ka

a senya aparo tsa ka,

a nkhama joaloka molala

oa hempe ea ka.

₁₉Molimo o nkakhetse kahar'a seretse,

ke se ke tšoana le lerōle

le oona molora.

₂₀“Ke ipiletsa ho uena, Molimo,

empa ha u nkarabe;

ke ema kapel'a hao,

empa u ntalima feela!

₂₁U mphutuhela u se na mohau,

tsoho la hao le matla

lea ntoantša.

₂₂U mphahamisetsa holimo, moeeng,

ka sefefo

u nkakholetse koana le koana.

₂₃Kea tseba hoba

u tla nkisa lefung,

tlung e khethetsoeng bohle,

bohle ba phelang.

₂₄“Ha ke re ea shoang

o otlolla letsoho la hae,

ha a llela thuso tlokotsing ea hae?

₂₅Na ha kea ka ka llela

ba litsietsing?

Moea oa ka ha o utloela

ba masoabing bohlōkō?

₂₆Ha ke ne ke lebeletse molemo,

ka tleloa ke bobe;

ha ke ne ke lebeletse leseli,

ka tleloa ke lefifi.

₂₇Mala a ka aa qhuqhuma,

a hloka phomolo,

matsatsi a litlokotsi

a tobane le 'na.

₂₈Ke tsamaea ke nyahame pelo,

ho se na leseli;

ke ema har'a mokhōpi

ho ikōpela thuso.

₂₉Ke se ke fetohile

ngoan'abo phokojoe,

ke molekane oa malinyane a mpshe.

₃₀Tlalo la ka le letšo

ke ho khakhapheha,

masapo a ka aa chesa

ke ho opeloa.

₃₁Harepa ea ka e letsa koli-ea-malla,

meloli ea kolilo la ka e fetohile lillo.”