JOBO 23

₂“Le kajeno sello sa ka

se sa le bohlōkō;

le hoja ke bile ke feheloa hakaalo,

tsoho la Molimo

le ntse le nkimetse.

₃Hoja kea tseba

hore na nka mo fumana kae,

ke ne ke tla ema

kapel'a setulo sa hae,

₄nyeoe ea ka ke e rale kapel'a hae,

ka ho tlala

ke lokolise mabaka a ka.

₅Ke ne ke tla utloa ha a nkaraba,

ke utloisise

polelo tsa hae ho 'na.

₆Na Molimo a ka ntšōbōkella

ka bonatla ba hae?

Le ho ka!

a ka sekèha tsebe, a 'mamela!

₇Ea lokileng

a ka arabisana le eena moo;

ho Moahlōli oa ka

ke lōkōlleloe ruri.

₈“Ha ke e-ea bochabela

ha ke mo fumane,

ha ke e-ea bophirima

le teng ha ke mo fumane,

₉ha a le leboea

ha ke 'mone,

ha a sebetsa boroa

le teng ha ke 'mone.

₁₀Empa Molimo o tseba

metsamao ea ka;

ha a nteka ke tla tsoa

ke hloekile seka khauta.

₁₁Mehato ea ka

e holim'a mehato ea hae,

ke tsamaile tseleng ea hae,

ha kea e kheloha.

₁₂Taelo tse tsoang molomong oa hae

ha kea li kheloha,

ka pelong ea ka

ke bōlōkile polelo tsa hae.

₁₃“Ha a rerile o rerile,

a ka hanyetsoa ke mang?

O iketsetsa tsohle

ka ho rata ha hae;

₁₄seo a se rerileng

o se phetha ka 'na,

merero e kang ona

e mengata ho eena,

₁₅ka baka leo ke tšaba ho ema

kapele ho eena,

ha ke mo hopola

tsoalo lea nkhèkhètha.

₁₆Molimo o mphokolisitse,

ke hloka sebete,

Ea Matla 'ohle

o nkhèkhèthisa letsoalo;

₁₇empa lefifi le ke ke la nkhutsisa,

fifi la bo-nka-ntjana

le mphoufalitseng.”