JOBO 13

₁“Tsena tsohle ke li bone

ka mahlo a ka,

ka tsèbè tsa ka ka li utloa,

ka li utloisisa.

₂Ke tseba tsena

joalokaha le lōna le li tseba,

etsoe le hona ha le mphete ka letho!

₃Ke lakatsa ho bua le Ea Matla 'ohle,

ho ipiletsa ho Molimo

ke ho chesehela haholo.

₄Lōna le baqapi ba mashano

a se na litsoako,

kaofela ha lona

le bo-ngakana-kea-hetla.

₅Eka le ka khutsa ho bua,

la khutsetsa ruri!

Hoo e n'e tla b'e le bohlale,

e le bohlale ho lōna!

₆Joale mamelang ha ke ikarabella,

le utloe ha ke ipuella

ka molomo oa ka.

₇Na le buella Molimo

ka ho bua bokhopo?

Na le ka 'muella

ka ho bua mashano?

₈Ebe le leka ho sekamela

ka ho Molimo,

kapa le iketsa babuelli

ba hae nyeoeng?

₉Ha a le hōqisa ka lipotso

ho tla ba joang?

Le tla mo soma

joalokaha le soma motho?

₁₀Ruri o tla fela a le khaleme,

ha le sebetsa leeme ka lekunutu.

₁₁Na tlōtla ea hae

ha e tl'o le kenya letsoalo,

khalefo ea hae

e tsubellele holim'a lōna?

₁₂Maele a lōna

a tšoana le molora hantle,

boitšireletso ba lōna

bo tšoana le ba letsopa.

₁₃“Khutsang, le 'na ke tsebe ho bua,

se ntlhahelang

se mpe se ntlhahele.

₁₄Ke kena kotsing ke ntse ke talimile,

bophelo ba ka

ke bapala liketo ka bona!

₁₅Haeba a mpolaea

ke tla 'ne ke mo tšepe,

ke tla buella metsamao ea ka

thaka li talimane.

₁₆Hona e tla ba eona pholoho ea ka:

Moetsalibe a ke ke a ema

kapele ho eena.

₁₇Mamelang mantsoe ana a ka

le a mamele ka hloko,

polelo tsena tsa ka

le li sekèhèlè tsebè.

₁₈Bonang joale,

nyeoe ea ka ke e ralile,

kea tseba

ke tla fumanoa ke se molato.

₁₉Ke mang ea ka tsekisanang le 'na?

Ha a le teng ke tla khutsa,

ke ichoelle.

₂₀“Oho, Molimo,

ak'u ntumelle ka ntho li le peli,

'me nke ke be ka ipatela uena:

₂₁Ak'u tlosetse tsoho la hao

hōle le 'na,

khalefo ea hao

e se ke ea ntšosa;

₂₂nkise khōtla ke tle ke u arabe,

u ntumelle ke bue,

le uena u nkarabe.

₂₃Ke entse makhopo

le libe li le kae?

Ak'u ntsebise tšito tsa ka

le sebe sa ka.

₂₄Ke hobane'ng

ha u mpatela fahleho sa hao,

u ntalima ke se ke le sera sa hao?

₂₅U tla lelekisana le lehlaku,

lehlaku le feferetseha le moea,

u lelekisane le 'mōkō o omeletse?

₂₆U nqōsa ka tse bohlōkō,

u nkotlela makhopo

a bocha ba ka.

₂₇Maoto a ka

a tlamiloe ka mahlaahlela,

tselana tsa ka tsohle

ua li lekōla,

bohato ba maoto a ka

ua bo thaleha.

₂₈“Kahoo motho o motela

sa ntho e bolile,

o naphōha sa kobo

e jeloe ke tšoèlè.”