JOHANNE 3

₁Ho ne ho e-na le monna oa Mofarisi, lebitso la hae e le Nikodema, e le 'musi oa Bajuda. ₂A tla ho Jesu bosiu, a re ho eena: “Rabbi, rea tseba hore u moruti ea tsoang ho Molimo, hobane ha ho ea ka etsang mehlolo ena eo u e etsang, ha Molimo a se na le eena.”

₃Jesu a araba, a re ho eena: “Kannete-nete, kea u bolella, ha motho a sa tsoaloe bocha, a ke ke a bona 'Muso oa Molimo.”

₄Nikodema a re ho eena: “Motho a ka tsoaloa joang a se a tsofetse na? Na a ka kena ka pōpelong ea 'm'ae khetlo la bobeli, 'me a tsoaloa?”

₅Jesu a araba, a re: “Kannete-nete, kea u bolella, ha motho a sa tsoaloe ka metsi le ka Moea, a ke ke a kena 'Musong oa Molimo. ₆Se tsoetsoeng ke nama ke nama, se tsoetsoeng ke Moea ke moea. ₇U se ke ua makala ha ke itse ho uena: Eka khona le tsoaloe bocha. ₈Moea o fokela moo o ratang teng, 'me u utloa molumo oa oona, empa ha u tsebe moo o tsoang teng le moo o eang teng; e mong le e mong ea tsoetsoeng ke Moea o joalo.”

₉Nikodema a mo araba, a re: “Tsee li ka etsahala joang?”

₁₀Jesu a mo araba, a re: “U moruti oa Iseraele, empa ha u utloisise litaba tsee? ₁₁Kannete-nete kea u bolella: Re bua seo re se tsebang, 'me re paka seo re se boneng, empa ha le amohele bopaki ba rōna. ₁₂Haeba le sa lumele ha ke le bolella tsa lefatše, le tla lumela joang ha ke le bolella tsa leholimo na? ₁₃Ha ho ea kileng a nyolohela leholimong, haese ea theohileng leholimong, e leng Mor'a Motho. ₁₄Joalokaha Moshe a ne a phahamise nōha feelleng, eka khona Mor'a Motho a phahamisoe joalo, ₁₅hore e mong le e mong ea lumelang ho eena a be le bophelo bo sa feleng.

₁₆“Molimo o ratile lefatše hoo a le neileng Mora oa hae ea tsoetsoeng a inotši, hore e mong le e mong ea lumelang ho eena, a se ke a timela, a mpe a be le bophelo bo sa feleng. ₁₇Molimo ha aa ka a rōma Mora oa hae lefatšeng ho ahlōla lefatše, empa e le hore lefatše le pholosoe ka eena. ₁₈Ea lumelang ho eena ha a ahlōloe; athe ea sa lumeleng o se a ahlōtsoe, kahobane a sa lumele ho Mora oa Molimo ea tsoetsoeng a inotši. ₁₉'Kahlōlo ke ena: Leseli le tlile lefatšeng, empa batho ba ratile lefifi ho e-na le leseli, hobane mesebetsi ea bona e ne e le mebe. ₂₀E mong le e mong ea etsang tse khopo o hloile leseli, 'me ha a tle leseling, esere mesebetsi ea hae ea hlahatsoa. ₂₁Empa ea etsang seo e leng 'nete o tla leseling, hore mesebetsi ea hae e bonahale hore o e entse a e-na le Molimo.”

₂₂Kamorao ho tsena Jesu le barutuoa ba hae ba ea naheng ea Judea; a hlola le bona teng, a kolobetsa. ₂₃Johanne o ne a kolobeletsa Enone, haufi le Saleme, kaha metsi a ne a le mangata teng, 'me batho ba ne ba e-tla, ba kolobetsoa, ₂₄hobane Johanne o ne a e-s'o kenngoe chankaneng.

₂₅Ha hlaha khang pakeng tsa barutuoa ba Johanne le Mojuda e mong ka tsa moetlo oa tlhoekiso. ₂₆Ba tla ho Johanne, ba re ho eena: “Rabbi, ea bileng le uena mose ho Jorodane, eo u mo pakileng, bona, oa kolobetsa, 'me bohle ba ea ho eena.”

₂₇Johanne a araba, a re: “Motho a ke ke a amohela letho haese ha a le neoa le e-tsoa leholimong. ₂₈Lōna ka sebele le ka mpakela hore ke itse: ‘'Na ha ke Kreste, empa ke rōmiloe ho mo etella pele.’ ₂₉Ea nang le monyaluoa ke monyali, empa motsoalle oa monyali, ea emeng pel'a hae, 'me a mo utloa, o ee a thabe haholo ka baka la lentsoe la monyali. Ha ho le joalo, thabo ena ea ka e phethahetse. ₃₀Eka khona eena a hōle, empa 'na ke nyenyefale.

₃₁“Ea tsoang holimo o kaholimo ho bohle; ea tsoang lefatšeng ke oa lefatše, 'me o bua tsa lefatše. Ea tsoang leholimong o kaholimo ho bohle; ₃₂seo a se boneng, a se utloa, oa se paka, empa ha ho ea amohelang bopaki ba hae. ₃₃Ea amohetseng bopaki ba hae, o tiisitse hore Molimo ke 'nete. ₃₄Eo Molimo a mo rōmileng o bolela lipolelo tsa Molimo, hobane Molimo o fana ka Moea ho se tekanyetso. ₃₅Ntate o rata Mora, 'me o beile tsohle matsohong a hae. ₃₆Ea lumelang ho Mora o na le bophelo bo sa feleng, empa ea sa mameleng Mora a ke ke a bona bophelo, 'me khalefo ea Molimo e tla ba holim'a hae kamehla.”