Sera se tsoang lebōea
1Ka selemo sa bone sa puso ea Jehoeakime, mora oa Josiea, khosi ea Juda, e leng selemo sa pele sa puso ea Nebukadenesare, khosi ea Babilona, lentsoe la Morena la fihla ho Jeremia, malebana le sechaba sa Juda. 2Eaba moporofeta Jeremia o bua ho sechaba sohle sa Juda, le ho baahi bohle ba Jerusalema, o re: 3“Ho qala ka selemo sa leshome le metso e meraro sa puso ea Josiea, mora oa Amona, khosi ea Juda, ho fihlela kajeno, ke lilemo tse mashome a mabeli a metso e meraro lentsoe la Morena le ntse le mphihlela. Ke buile ho lōna ka makhetlo-khetlo, empa ha lea ka la mamela letho. 4Le hoja Morena a 'nile a le rōmela bahlanka ba hae bohle, e leng baporofeta, ha lea ka la mamela kapa la sekèha litsèbè tsa lōna. 5Baporofeta ba ile ba re: ‘Joale motho ka mong a khelohe litsela tsa hae tse khopo, a furalle liketso tsa hae tse khopo, a phele naheng eo Morena a e neileng lōna le bo-ntat'a lōna kamehla eohle. 6Le se ke la latela melimo esele, la e sebeletsa, la e khumamela; le se ke la mphephetsa, la nkhalefisa ka mesebetsi ea matsoho a lōna, 'me ha nka ke ka le hlōkōfatsa.
7“ ‘Empa ha lea ka la mamela,’ ho rialo Morena; ‘le mphephelitse, la nkhalefisa ka mesebetsi ea matsoho a lōna, 'me la ipitsetsa kotlo.’
8“Ka baka leo, Morena oa mabōtho o re: ‘Kahobane ha lea ka la mamela lentsoe la ka, 9ke tla bitsa lichaba tsohle tse ka lebōea,’ ho rialo Morena, ‘ke bitse le mohlanka oa ka Nebukadenesare, khosi ea Babilona, lichaba tseo li futuhele naha ena le baahi ba eona, li futuhele le lichaba tsohle tse ahelaneng le tsona, li li ripitle ho hang, li li etse setsoto, e be sekhobo, 'me li timelle ruri. 10Ke tla felisa mehoo ea thabo le ea nyakallo; ke felise lentsoe la monyali le lentsoe la monyaluoa; ke felise lerata la leloala ha ho siloa, ke time lebone. 11Naha ena eohle e tla ba nanaola le setsoto, 'me lichaba tsena li tla sebeletsa khosi ea Babilona ka lilemo tse mashome a supileng.
12“ ‘Etlare ha lilemo tse mashome a supileng li fetile, ke otle khosi ea Babilona le sechaba sa eona ka baka la bokhopo ba eona, naha ea Bakalatiea ke e fetole nanaola ea kamehla eohle,’ ho rialo Morena. 13‘Lintho tsohle tseo ke li boletseng ke tla li lihela holim'a naha ena, e leng tsohle tse ngotsoeng bukeng ena, tseo Jeremia a ileng a li porofetela linaha tsena tsohle. 14Bakalatiea le bona ba tla sebeletsa lichaba tse ngata le likhosi tse matla, ke ba otle ho ea ka liketso tsa bona le mesebetsi ea matsoho a bona.’
Molimo o ahlōla lichaba
15“Morena Molimo oa Iseraele, o bua tjena ho 'na, o re: ‘Nka senoelo sena sa veine ea khalefo se ka letsohong la ka, 'me u etse hore lichaba tsohle tseo ke u rōmang ho tsona li se noe. 16Li tla se noa, li thekesele, li hlanye ka baka la sabole eo ke tla li bolaea ka eona.’ ”
17Eaba ke nka senoelo se ka letsohong la Morena, ke se noesa lichaba tsohle tseo Morena a nthōmmeng ho tsona, 18e leng tse Jerusalema le metseng ea Juda le likhosi tsa eona, le mahosana a eona, hore li tle li fetohe nanaola, setsoto, sekhobo le thōhako, joalokaha ho le joalo kajeno; 19le Faro, khosi ea Egepeta, le bahlanka ba hae, le mahosana a hae, le sechaba sohle sa hae, 20le melata eohle e Egepeta, le likhosi tsohle tsa naha ea Use, le likhosi tsohle tsa naha ea Filesitiea, le Ashekelone, le Asa, le Ekerone, le masalla a Ashedode, 21le Edomo, le Moabe, le bana ba Amone, 22le likhosi tsohle tsa Tire, le likhosi tsohle tsa Sidone, le likhosi tsohle tsa linaha tse lebopong la leoatle, 23le Dedane, le Tema, le Buse, le tsohle tse libakeng tse hōle, 24le likhosi tsohle tsa Arabia, le likhosi tsohle tsa merabe esele e ahileng lehoatateng, 25le likhosi tsohle tsa Simeri, le likhosi tsohle tsa Elame, le likhosi tsohle tsa Media, 26le likhosi tsohle tsa lebōea, tse hōle le tse haufi, ka ho hlahlamana ha tsona, le mebuso eohle e teng mona lefatšeng, 'me qetellong ho tla noa khosi ea Sheshake.
27“Joale u tle u re ho bona: ‘Morena oa mabōtho, Molimo oa Iseraele, o bua tjena: Noang, le tahoe, le hlatse, le oe, le se ke la hlola le tsoha, ka baka la sabole eo ke tla le bolaea ka eona.’ 28Empa haeba ba hana ho nka senoelo se ka letsohong hore ba noe, uena u tle u re ho bona: ‘Morena oa mabōtho o bua tjena: Le sa tle be le noe! 29Bonang, joale ke qala ho lihela koluoa hodim'a motse ona o bitsoang ka lebitso la ka; ebe na lōna le ke ke la otloa ho hang? Le tla otloa, hobane baahi bohle ba lefatše ke tla ba bolaea ka sabole,’ ho rialo Morena oa mabōtho.
30“Joale ba porofetele mantsoe ana 'ohle, u re ho bona:
“ ‘Morena o tla puruma a le holimo,
a hōoeletse a le sehalalelong sa hae,
a kharumele lefatše la hae.
O tla hōoa sa batho
ba tlhōtlang morara,
a hōoeletse baahi bohle ba lefatše.
31Rata le tla fihla
pheletsong tsa lefatše,
hoba chaba tsohle
Morena o tla li qōsa,
batho bohle le bona a ba ahlōle,
ba khopo a ba bolaee ka sabole,’ ”
ho rialo Morena.
32Morena oa mabōtho o bua tjena:
“Koluoa e tla aparela lichaba!
Leholiotsoana le tla tsoha,
le tla tsoha pheletsong tsa lefatše!”
33Mohl'a tsatsi leo, bao Morena a ba bolaileng ba tla fumanoa hohle, ho tloha pheletsong e 'ngoe ea lefatše ho ea fihla ho e 'ngoe. Ha ba ka ke ba lleloa, litōpō tsa bona ha li ka ke tsa phuthoa leha e le ho epeloa; li tla tšoana le khapane e tletsa-tletseng har'a naha.
34Lōna balisa llang,
le bokolle haholo,
lōna beng ba mohlape
ipitikeng holim'a molora;
nako ea ho bolaoa ha lona e fihlile,
nako ea ho qhalanngoa ha lōna
e phethahetse;
le tla oa, le pshatlehe
sa lefiso le letle-letle!
35Balisa ha ba ka ke
ba fumana setšabelo,
beng ba mohlape le bona
ba sitoe ho phonyoha.
36Seboko sa balisa se tla utloahala,
le sello sa beng ba mehlape,
sello sa pohomèla,
hobane makhulo a bona
Morena o a sentse!
37Metse ea bona ea khotso
e fetohile masupi,
ka baka la khalefo ea Morena,
khalefo e tlōkōmang.
38Morena o joaloka tau
e tsoile selaong,
kahoo naha ea bona
e fetohile nanaola,
ka baka la bohale ba sabole,
sabole ea motlatlapi,
ka baka la khalefo ea Morena
khalefo e tlōkōmang.
