Molaetsa oa Jeremia ho ba ntlo ea Juda
1Morena o bua tjena: “Theohela tlung ea khosi ea Juda, u e'o phatlalatsa molaetsa ona hona teng, 2u re: ‘Mamela lentsoe la Morena, uena khosi ea Juda, uena ea lutseng teroneng ea Davida, uena le bahlanka ba hao, le sechaba sa hao se kenang ka likhoro tsena. 3Morena o bua tjena: Ahlōlelang batho ka toka le ka nepo, le namolele ea tlatlapuoang matsohong a motlatlapi oa hae. Le se ke la etsa molichaba, khutsana kapa mohlolohali hampe, kapa la ba hlōkōfatsa, leha e le ho tšolla mali a se nang molato sebakeng sena. 4Haeba ruri tsena le ka li etsa, likhosi tse lutseng teroneng ea Davida li tla kena likhorong tsa motse ona, li palame kariki tsa ntoa le lipere, li tsamaea 'moho le bahlanka ba tsona, le sechaba sa tsona. 5Empa haeba le sa mamele mantsoe ana, kea le hlapanyetsa hore ntlo ena e tla fetoha lithako,’ ” ho rialo Morena.
6Morena o bua tjena malebana le ntlo ea khosi ea Juda:
“Le hoja ho 'na u ka Gileade,
u tšoana le tlhōrō ea Lebanone,
ruri ke tla u fetola lehoatata,
ke u fetole metse e hloka baahi.
7Ke tla u rōmela ba tla u timetsa,
motimetsi ka mong
a nkile hlomo tsa hae;
ba tla rema fate tsa hao tse ntle,
fate tsa hao tsa likedare,
ba li reme ba li lahlele mollong.
8“Lichaba tse ngata li tla feta pel'a metse ena, motho ka mong a botse oa habo, a re: ‘Ke ka lebaka la'ng ha Morena a entse ntho e tjee motseng o moholo hakaale?’ 9Ba tla araba, ba re: ‘Ke hobane ba furaletse selekane sa Morena Molimo oa bona, ba rapela melimo esele, ba e sebeletsa.’ ”
Molaetsa oa Jeremia ho Shalōme
10Se lleleng mofu,
le khutsana le se e roale,
le mpe le llele haholo ea thōpiloeng,
hobane ha a ka ke a hlola
a khutla hape,
leha e le ho bona
fatše la tsoalo ea hae.
11Morena o bua tjena malebana le Shalōme, mora oa Josiea, khosi ea Juda, ea ileng a hlahlama ntat'ae, ea e-ba khosi ea Juda, empa joale ea seng a tlohile sebakeng sena: “A ke ke a hlola a khutlela sebakeng sena hape. 12O tla shoela naheng eo a thōpetsoeng ho eona, 'me a ke ke a hlola a bona naha ena hape.”
Molaetsa oa Jeremia ho Jehoeakime
13“Ho malimabe ea hahang
ntlo ea hae ka bolotsana,
a hahe lisolloro tsa eona
ka bomènèmènè;
ea etsang hore mohahabo
a sebeletse lelea,
ea sa lefeng moputso
oa mosebeletsi oa hae.
14Ea reng: ‘Ke tla ikhahela
ntlo ea ka e kholo,
e nang le lisolloro tse batsi.’
A fela a e etsetsa lifesetere,
mabota a a manehe
mapolanka a likedare,
a b'a e lile ka mobu o mofubelu.
15“Na u tla busa
hobane u hahile ka likedare?
Na ntat'ao eena o n'a se je,
'me a sa noe?
Empa o 'nile a sebetsa
ka toka le ka ho loka,
eaba o phela hamonate,
a phela ka boiketlo.
16O il'a ahlōlela
mofutsana le mohloki,
eaba o phela hamonate,
a phela ka boiketlo.
Na hoo e n'e se hona ho ntseba?
ho rialo Morena.
17“Mahlo a hao le pelo
li busoa ke meharo ea hao,
li busoa ke ho tšolla mali
a se na molato,
li busoa ke khatello
le tlhōkōfatso ea batho.”
18Ka baka leo, Morena o bua tjena malebana le Jehoeakime, mora oa Josiea, khosi ea Juda:
“Ha ba ka ke ba mo llela,
ba re: ‘Jo 'na, ngoan'eso!
Jo 'na khaitseli ea ka!’
Ha ba ka ke ba mo llela,
ba re: ‘Jo 'na, mong'a ka!
Jo 'na, tlōtla ea hae!’
19Phupu ea hae
e tla tšoana le ea tonki,
a hulanngoe, a lahleloe kantle,
a akheloe thōko
ho khoro tsa Jerusalema.”
Molaetsa oa ho timetsoa ha Jerusalema
20“Nyolohela Lebanone,
u e'o hōoa hona teng,
u meketse, ntsoe la hao
le e'o utloahala Bashane,
u meketse haholo
u le thabeng tsa Abarime,
hoba baratuoa ba hao bohle
ba timelitsoe.
21Ka na ka bua le uena
ha u n'u sa atlehile,
eaba uena u re:
‘Nke ke be ka u mamela!’
Bona ke boitšoaro ba hao
ho tloha bocheng ba hao,
hore lentsoe la ka
u se ke ua le mamela.
22Moea o tla fefola
balisa ba hao bohle,
baratuoa ba hao bohle
ba tla thōpuoa.
Ruri u tla hlajoa ke lihlong,
u tlontlolohe, u tsielehe
ka baka la bokhopo ba hao bohle.
23Uena moahi ea phelang Lebanone,
ea phelang tlung
e hahiloeng ka likedare,
u tla lumaela hakae
ha mahlaba a u fihlela,
mahlaba a kang a mosali,
mosali a kena tlung!
Molimo o ahlōla Koniea
24“Kea le hlaphanyetsa,” ho rialo Morena, “leha eba uena Koniea, mora oa Jehoeakime, khosi ea Juda, u ne u ka ba lesale le monoaneng oa letsoho la ka le letona, ke ne ke tla u rōla. 25Ke tla neelana ka uena matsohong a ba batlang ho u bolaea, bona bao u ba tšabang, e leng matsohong a Nebukadenesare, khosi ea Babilona, le matsohong a Bakalatiea. 26Uena, le 'm'ao ea u tsoetseng, ke tla le lahlela kantle, naheng eo le sa tsoalloang ho eona, 'me le tla shoela hona teng. 27Empa ha e le naha eo le labalabelang ho khutlela ho eona, eona le ke ke la khutlela ho eona.”
28Na Koniea hase nkhoana
e nyatsehang, e matlèrè?
Na hase sejana seo
ho seng ea se thabelang?
Ke hobane'ng ha eena
le bana ba hae ba lelekiloe,
ba leleketsoe naheng
eo ba sa e tsebeng?
29Oho, uena lefatše,
uena lefatše, uena lefatše!
Ak'u mamele lentsoe la Morena!
30Morena o bua tjena:
“Ngolang hore monna enoa
ha a na bana,
ke motho ea ke keng a atleha
bophelong ba hae,
ha ho le ea mong oa bana ba hae
ea tla atleha,
ea tla lula teroneng ea Davida,
ea tla busa ba morabe oa Juda.
