Ho hlōloa ha Jerusalema hoa porofetoa
1Lentsoe la Morena la fihla ho Jeremia nakong eo khosi Sedekiea a neng a rōmetse Pashahure, mora oa Malakiea, le moprista Sofonea, mora oa Maasiea. Ba re ho Jeremia: 2“Rea u kōpa: Ak'u re buelle ho Morena, hobane Nebukadenesare, khosi ea Babilona, oa re futuhela. Mohlomong Morena o tla re etsetsa mohlolo joalokaha a ne a etse ka nako e fetileng, 'me eo a se ke a hlola a re futuhela.”
3Eaba Jeremia o re ho bona: “Bolellang Sedekiea, le re: 4‘Morena Molimo oa Iseraele, o bua tjena: Le tla hlōloa. Lihlomo tsa lōna, tseo ka tsona le tla loantša khosi ea Babilona le Bakalatiea ba le etselitseng thibella, ke tla li nka, ke li bokelle, ke li bee bohareng ba motse. 5'Na ka seqō, ke tla le futuhela ka letsoho le otlolohileng, le matla, ke halefile, ke le bohale, khalefo ea ka e tlōkōma. 6Ke tla otla baahi ba motse ona le liphoofolo: Bohle ba tla bolaoa ke lefu la seoa. 7Hamorao,’ ho rialo Morena, ‘ke tla neelana ka Sedekiea, khosi ea Juda, le ka bahlanka ba hae, le ka sechaba sa hae, le ka masalla a sa bolaoang ke lefu la seoa, le ka ba sa bolaoang ka sabole, le ka ba sa bolaoang ke sekoboto; ke tla neelana ka bona matsohong a Nebukadenesare, khosi ea Babilona, le matsohong a lira tsa bona, le matsohong a ba batlang ho ba bolaea. Nebukadenesare o tla ba bolaea ka sabole. A ke ke a ba qenehela, leha e le ho ba utloela bohlōkō, kapa ho ba hauhela.’
8“U tle u re ho sechaba sena: ‘Morena o bua tjena: Bonang mona, ke re le ikhethele hore na le nka tsela e isang bophelong kapa le nka tsela e isang lefung. 9Ea tla sala motseng ona o tla bolaoa ka sabole, kapa a bolaoe ke sekoboto, kapa a bolaoe ke lefu la seoa. Empa ea tla tsoa a e'o ineela ho Bakalatiea ba le etselitseng thibella, eena o tla phela, a ikhapele bophelo ba hae. 10Ke reretse motse ona bobe e seng botle,’ ho rialo Morena. ‘Motse ona o tla oela matsohong a khosi ea Babilona, 'me eona e tla o chesa ka mollo.’
Ntlo ea bokhosi ea Juda ea ahlōloa
11“Hape bolella ba ntlo ea bokhosi ba Juda, u re: ‘Mamelang lentsoe la Morena. 12Oho, lōna ba ntlo ea Davida, Morena o bua tjena:
“ ‘Ahlōleng batho ka toka
hoseng ha letsatsi ka leng,
namolelang motlatlapuoa
matsohong a motlatlapi,
esere khalefo ea ka
ea laima malakabe,
ea tuka hoo
ho seng ea ka b'a e tima,
ka baka la bokhopo
ba liketso tsa lōna.
13Morena o re:
Lōna baahi ba khohlo
kea le futuhela,
lōna ba phelang
holim'a sehlaba se mafika,
lōna ba reng:
“Re ka futuheloa ke mang?
Liahelong tsa rōna
ho ka kena mang?”
14Morena o re:
Ke tla le otla
ho ea ka liketso tsa lōna,
ke hotetse hlaha merung ea lōna,
ke e chese,
tsohle tse le pota-potileng
li tla timela.’ ”
