Senyepa se entsoeng ka lesela la lene
1Morena o ile a bua tjena ho 'na: “Tsamaea u e'o ithekela senyepa se entsoeng ka lesela la lene, u itlame ka sona thekeng, empa u se ke ua se hlatsoa.” 2Eaba ke reka senyepa joalokaha Morena a ne a ntaetse, 'me ka itlama ka sona thekeng.
3Lentsoe la Morena la mphihlela khetlo la bobeli, la re: 4“Nka senyepa seo u ileng ua se reka, seo u itlammeng ka sona thekeng, 'me u tsamaee, u ee nōkeng ea Euferatese, u e'o se pata lefarung le lefikeng.” 5Eaba kea tsamaea, ke se pata pel'a Euferatese, joalokaha Morena a ile a ntaela.
6Hoba ho fete matsatsi a mangata Morena a re ho 'na: “Tsamaea, u ee Euferatese, u e'o lata senyepa seo ke ileng ka re u e'o se pata teng.” 7Eaba ke ea Euferatese, ke fihla ke ntša senyepa moo ke neng ke se patile teng, empa joale se ne se se se senyehile, se se na thuso ho hang.
8Joale lentsoe la Morena la fihla ho 'na, la re: 9Morena o bua tjena: “Joalokaha senyepa sena se senyehile, le boikhantšo ba Juda, le boikhantšo bo boholo ba Jerusalema, ke tla bo felisa joalo. 10Sechaba sena se khopo, se hanang ho mamela lipolelo tsa ka, se latelang litakatso tsa lipelo tsa sona tse manganga, se latelang melimo esele, se e sebeletsang, se e khumamelang, se tla ba joaloka senyepa sena se seng se hloka thuso ho hang. 11Joalokaha senyepa se tlamelloa thekeng la motho, ke ile ka tlamella ntlo ea Iseraele le ntlo ea Juda ho 'na,” ho rialo Morena, “hore e be sechaba sa ka se tla ntumisa, se nthorise, se ntlōtle. Empa ha sea ka sa mamela.
Makuka a veine
12“Ka baka leo, u tle u bolelle sechaba seo, u re: ‘Morena Molimo oa Iseraele, o bua tjena: Makuka 'ohle a veine a tlatsoe veine,’ empa sona se tla re ho uena: ‘U re ha re tsebe hore makuka 'ohle a tšoanetse ho tlatsoa veine?’ 13Ebe uena u re ho sona: ‘Morena o bua tjena: Bonang mona, baahi bohle ba naha ena, esita le likhosi tse lutseng teroneng ea Davida, le baprista, le baporofeta, le baahi bohle ba Jerusalema, bohle ke tla ba tlōpa veine. 14Ke tla ba thulanya ka lihlooho, esita le bo-ntat'a le bara ba bona,’ ho rialo Morena. ‘Ha ke na ho ba le kutloelo-bohlōkō, kapa lereko; ke tla ba timetsa!’ ”
Jeremia o khalemella sechaba boikhōhōmōso
15Theang tsebe le mamele,
le se ke la ikakasa,
hoba ke Morena ea seng a buile.
16Tlotlisang Morena,
Morena Molimo oa lōna,
mo tlotliseng a e-s'o tlise lefifi,
maoto a lōna
a e-s'o khōthōmetsehe,
a khōthōmetseha
holim'a thaba tse lefifi.
Lōna le lebeletse leseli,
Morena o tla le fetola
fifi le letšo-letšo,
a le fetole
fifi la bo-nka-ntjana!
17Empa haeba le ke ke le mamela,
ke tla llela
boikhōhōmōso ba lōna sephiring,
mahlo a ka a keleketle likeleli,
hobane mohlape oa Morena
o tla b'o thōpiloe.
18E-re ho khosi
le ho mofumahali, 'makhosi:
“Theohang literoneng le ikokobetse,
hoba le rolisitsoe
mefapahlooho ea tlōtla.”
19Metse e ka Boroa
e etselitsoe thibella,
ha ho le ea mong
ea kenang ho eona,
baahi bohle ba Juda baa thōpuoa,
baa thōpuoa, e ba khōrōlakoqo.
20Phahamisang mahlo a lōna,
le bone ba le futuhelang
ba e-tsoa lebōea.
O kae mohlape oo u neng u o lisa,
mohlape oa hao o neng o khahleha?
21U tla re'ng
ha bao u n'u re ke metsoalle,
ba u hloesoa holimo,
e e-ba babusi ba hao?
Na ha u na ho tšoaroa ke mahlaba,
u tšoaroe ke mahlaba
sa mosali a kena tlung?
22Ha u ka ipotsa ka pelong ea hao,
ua re: “Ke ka baka la'ng
ha tsee li ntlhahetse?”
Ka baka la libe tsa hao
tse ngata-ngata,
mese ea hao e il'a apōleloa holimo,
'mele oa hao oa sala o le feela.
23Na Mokushe
a ka fetola lebala la hae,
kapa lengau
la fetola maroboko a lona?
Haeba ho joalo,
le lōna ba itloaelitseng tse mpe
le ka 'na la tseba ho etsa tse ntle!
24“Kahoo ke tla ba hasanya
sa 'mōkō o fefoha,
o fefoloa ke moea oa lehoatata.
25Lena ke lona lefa la hao,
ke seabo seo ke se abetseng uena,
hobane uena u il'a ntebala,
ua itšepela melimo ea bohata.”
ho rialo Morena.
26“Kahoo ke apōtse mese ea hao,
ka e apōlela holimo,
ke u koahetse ka eona mahlong,
bofeela ba hao bo lepalapaleng.
27Bofèbè ba hao ke bo bone hantle,
le ho lla ha hao
ho kang ha pere e palesitse!
Ke bone liketso tsa bootsoa ba hao,
le manyala a hao
holim'a maralla le masimong.
U malimabe hakaakang,
uena Jerusalema!
U tla ba sesila ho fihlela neng?”
