Juditha, mohlolohali oa Moiseraele
1Matsatsing 'ona ao Juditha a utloa ka tse etsahetseng. E ne e le morali oa Merari, mora oa Okese, mora oa Josefa, mora oa Osiele, mora oa Helkia, mora oa Ananiase, mora oa Gidione, mora oa Rafaime, mora oa Ahitobe, mora oa Elia, mora oa Hilkia, mora oa Eliabe, mora oa Nathanaele, mora oa Salamiele, mora oa Sarasadai, mora oa Iseraele. 2Monna oa hae, Manase, oa leloko le mofuta oa habo, a na a hlokahala ha ho heloa harese. 3Ha a ntse a lekola mosebetsi oa ba tlamang mangata masimong, a bataoloa ke letsatsi hloohong; a robala liphateng, a ba a hlokahala Bethulia, motseng oa habo. A bolokoa le bo-ntat'ae, tšimong e pakeng tsa Dotane le Balamone.
4Mohlolohali Juditha a lula ha hae lilemo tse tharo le khoeli tse 'ne. 5Marulelong a ntlo ea hae o ne a iketselitse lephephe. O ne a itlama ka lesela le mahoashe thekeng, 'me a apara liaparo tsa bahlolohali. 6O ne a itima lijo ka matsatsi 'ohle a bohlolohali ba hae, haese ka tsatsi la hlekelo ea sabatha le ka letsatsi la sabatha ka bolona, ka tsatsi la hlekelo ea ho thoasa ha khoeli le tsatsing la ho thoasa ha eona, le ka matsatsi a mekete le a boithabiso a ntlo ea Iseraele. 7O ne a le motle haholo, sebopeho sa hae se hohela mahlo. Monna oa hae Manase o ne a mo sietse khauta le silefera, bahlanka le makhabunyane, likhomo le masimo, 'me o ne a phela har'a maruo ana a hae. 8Ho ne ho se motho ea neng a ka mo bua hampe, hobane o ne a tšaba Molimo haholo.
Juditha o kopana le baholo ba motse
9Juditha a utloa hore sechaba se ile sa korotlela ramotse, hobane se nyahame lipelo ka baka la khaello ea metsi. A utloa le tseo Usiea a li boleletseng batho, ebile a ikanne hore o tla neela motse ho Baasiria ka mora' matsatsi a mahlano. 10Juditha a romela lekhabunyane la hae le neng le hlokomela maruo 'ohle a hae ho mema Usiea, le Kaberise le Karemise, baholo ba motse.
11Eitse ha bao ba fihla, Juditha a re ho bona: “Mamelang, lona baetapele ba baahi ba Bethulia. Le entse phoso ha le bua le batho joalokaha le entse kajeno, 'me ha le phephetsa Molimo ka ho ikana ho neelana ka motse ho lira tsa rona, haeba Morena a sa le phallela ka morao ho matsatsi a mahlano. 12Le bo-mang hoo le ka lekang Molimo kajeno, 'me la nka sebaka sa Molimo har'a bana ba batho? 13Hajoale le nonya Morena ea matla 'ohle; empa le ke ke la tseba letho le ka mohla! 14Ha le ka ke la phenyekolla tse botebong ba pelo ea motho, kapa la nyebokolla menahano ea kelello ea hae. Joale le ka phenyekolla joang Molimo ea entseng tsena tsohle, la tseba kelello ea hae, 'me la utloisisa menahano ea hae? Che, bana beso, se phephetseng khalefo ea Morena Molimo oa rona. 15Haeba e se thato ea hae ho re phallela ka har'a matsatsi ao a mahlano, o na le matla a ho re sireletsa matsatsing ao ka 'ona a ratang ho etsa joalo, kapa a ho re timetsa ka pele ho lira tsa rona. 16Empa lona, ha le na tokelo ea ho bea eng kapa eng paneng ho fetola merero ea Morena Molimo oa rona; hobane Molimo ha a tšosoe, leha e le ho qekisoa joaloka motho. 17Ka lebaka lena, ha re ntse re lebeletse pholoho e tsoang ho eena, a re ipiletseng ho eena hore a re phallele, 'me o tla utloa lentsoe la rona haeba a khahloa joalo. 18Ha e le 'nete, mehleng ena ea morao, esita le kajeno ha ho e-s'o ka ba leha e le moloko kapa seboko, leha e le setereke kapa motse oa habo rona, o ileng oa khumamela melimo e entsoeng ka matsoho a batho, joalokaha ho ne ho etsahale mehleng ea khale. 19Hona e ne e le lebaka leo ka lona bo-ntat'a rona ba ileng ba neelloa sabole le khapo, 'me ba oeloa ke koluoa ka lira tsa bona. 20Empa rona ha rea ka ra lumela ho molimo o mong, haese Morena; ka hona re ka tšepa hore a ke ke a re khesa kapa a furalla moloko ona oa habo rona.
21“Haeba ruri ba hapa rona, Judea eohle e tla haptjoa le eona, Qalo ea rona e halalelang e tla ripitloa, 'me Molimo o tla batla mali a rona ho lefella tšilafatso eo. 22Polao ea bana babo rona, teleko naheng ea habo rona, ho ripitloa ha naha eo e leng lefa la rona, e tla ba kahlolo eo Molimo a re lihelang eona lichabeng tseo re tla ba makhoba a tsona. Ba re hapileng ba tla re nka re le sesomo le sekhobo. 23Bokhoba ba rona bo ke ke ba re tlisetsa mohau oa batho, 'me Morena Molimo oa rona o tla bo fetola tlontlollo ea rona.
24“Joale he, ba heso, a re bontšeng ba habo rona hore bophelo ba bona bo liatleng tsa rona, 'me le Sehalalelo le Tempele le aletare li boikarabellong ba rona. 25Leha ho le joalo, a re leboheng Morena Molimo oa rona, ea re nonyang joalokaha a ne a etse ho bo-ntat'a rona. 26Hopolang seo a neng a se etse ho Aborahama, kamoo a ileng a nonya Isaka kateng, le tsohle tse ileng tsa hlahela Jakobo, Mesopotamia e Siria, ha a ntse a alosa linku tsa Labane, malom'ae. 27Joalokaha a ba nontse habohloko ho fumana tse ka pelong ho bona, ka mokhoa o joalo Molimo ha a batle ho iphetetsa ho rona, empa ke ka sepheo sa ho ba hlokomelisa a otlang ba mo hlomphang.”
28Usiea a araba Juditha, a re: “Tsohle tseo u li buileng, u li boletse ka pelo e ntle, 'me ha ho ea ka u hanyetsang. 29Hase lekhetlo la pele bohlale ba hao bo totobalang; ho tloha bonyenyaneng ba hao, batho bohle ba tsebile kamoo u leng bohlale le pelo e ntle kateng. 30Feela, ka ho qetoa ke lenyora, sechaba se ile sa re qobella ho se etsetsa tšepiso eo, le ho itlama ka kano eo re sitoang ho e furalla. 31Joale ak'u re rapelle, hobane u mosali oa morapeli, 'me Morena o tla re nesetsa pula ho tlatsa matamo a rona, hore re se hlole re fokolloa ke matla.”
32Juditha a ba fetola, a re: “Mamelang, ke ikemiselitse ho etsa seo litloholo tsa moloko oa habo rona li tlang ho se hopola ka mengoaha le mengoaha. 33Bosiung bona le eme khorong ea motse. Ke tla tsoa le lekhabunyane la ka, 'me pele matsatsi ao le a beileng ho neelana ka motse ho lira a feta, Morena Molimo oa rona o tla ntšebelisa ho pholosa Iseraele. 34Empa ha e le lona, le se mpotse hore na ke tla etsa joang. Nke ke be ka le bolella ho fihlela ke entse joalo.”
35Usiea le beng ba motse ba re ho eena: “E-ea ka khotso. Morena Molimo a ke a u etelle pele ho iphetetsa lireng tsa rona.” 36Eare hoba ba theohe lephepheng la hae, ba khutlela liqalong tse boikarabellong ba bona.
