Molevi le mosali oa hae oa lefielo
1Ka nako eona eo, ha Baiseraele ba ntse ba se na khosi, Molevi e mong ea neng a jakile ka nq'ane ho naha e maralla ea Efraime, a inkela mosali oa lefielo motseng oa Betlelehema e Juda. 2Mosali eo oa hae oa lefielo a mo qaka ka ho iphetola seotsoa. A mo tlohela, a khutlela tlung ea ntat'ae, Betlelehema e Juda, a lula teng nako ea khoeli tse 'ne. 3Monna oa hae a ema, a mo latela, a mo qekisa hore a khutlele ho eena. Monna eo o ne a ile le mohlanka oa hae, le litonki tse peli. Mosali a mo isa ka tlung ea ntat'ae, 'me ntat'a mosali eo a thaba ha a bona Molevi eo. 4Mohoe oa hae, e leng ntat'a ngoanana eo, a mo tšoarella, a ba a hlola le eena matsatsi a mararo. Eaba baa ja, baa noa, ba robaletsa moo.
5Ka letsatsi la bone, ba tsoha ka malungoalungoana, ba tsohela tseleng. Ntat'a ngoanana a re ho mokhoenyana oa hae: “Ak'u je thathana ea bohobe, u nt'o tsamaea.” 6Ba lula fatše, bobeli ba bona ba e-ja, ba e-noa. Ntat'a ngoanana a re ho monna eo: “Kea u rapela: Khotsofalla ho hlola mona bosiu bohle, u ithabise.”
7Monna eo a ema, a re oa tsamaea, empa mohoe oa hae a mo qophella, a ba a robaletsa moo hape. 8Ka letsatsi la bohlano a tsoha ka malungoalungoana, a re oa tsamaea. Ntat'a ngoanana a re ho eena: “Ak'u je pele, kea u rapela u lule mona ho fihlela letsatsi le sekama.” Bobeli ba bona ba e-ja.
9Ha monna eo a ema hore a tsamaee le mosali oa hae oa lefielo, le mohlanka oa hae, mohoe oa hae, e leng ntat'a ngoanana, a re ho eena: “Ak'u bone, ho se ho phirima. Kea u kōpa: Hlola mona bosiu bona bohle. Bona, letsatsi le se le il'o likela. Robaletsa mona, u ithabise, hosasane u tle u tsohele tseleng, u ee ha hao.” 10Empa monna eo a hana ho hlola bosiu boo, a ema, a tsamaea, a ba a fihla haufi le Jebuse, e leng Jerusalema. O ne a e-na le litonki tse peli, tse qhanehiloeng, a bile a e-na le mosali oa hae oa lefielo.
11Ha ba fihla Jebuse letsatsi le ne le se le ile, 'me mohlanka a re ho mong'a hae: “Tloo, kea u rapela: Re ke re fapohele motseng ona oa Bajebuse, re robaletse teng.”
12Mong'a hae a re ho eena: “Re ke ke ra fapohela motseng oa balichaba, oo e seng oa bana ba Iseraele; re tla fetela Gibea.” 13A re ho mohlanka oa hae: “Tloo, re ee ho se seng sa libaka tsena; re tla robaletsa Gibea kapa Rama.” 14Ba tsoela pele leetong la bona, 'me letsatsi la ba likella ha ba le pel'a Gibea, eo e neng e le ea morabe oa Benjamine. 15Ba khelohela teng, ho ea robaletsa Gibea. Ha a kena a itulela fatše, lebaleng la motse oo, empa ha se ke ha e-ba le motho ea ba amohelang tlung ea hae hore ba robaletse.
16Ka phirimana ha tla monna-moholo a e-tsoa mosebetsing oa hae masimong. Monna eo o ne a e-tsoa naheng e maralla ea Efraime, a jakile Gibea, empa batho ba moo e ne e le ba morabe oa Benjamine. 17Eitse ha a phahamisa mahlo, a bona monna oa motsamai a le lebaleng la motse, 'me monna-moholo a re: “U ea kae? U tsoa kae?”
18Eo a re ho eena: “Rea feta, re tsoa Betlelehema e Juda, re ea ka nq'ane ho naha e maralla ea Efraime, moo e leng haeso. Ke ne ke ile Betlelehema e Juda; joale ke ea tlung ea Morena, empa ha ho motho ea nkamohelang tlung ea hae. 19Feela re na le setoroi le lijo tsa litonki tsa rōna. Ke bile ke na le mofao oa bohobe le veine, e leng oa ka le oa lekhabunyane la ka, le oa mohlankana ea nang le bahlanka ba hao. Ha re hloke letho.”
20Monna-moholo a re: “Khotso e be le uena; tsohle tseo u li hlokang li tla tsoa ho 'na, feela u se ke ua robala lebaleng mona.” 21Eaba o mo isa ka tlung ea hae, o fepa litonki; ba hlatsoa maoto a bona, ba e-ja, ba e-noa.
22Eare ha ba ntse ba ithabisa, banna ba bang ba motse oo, ba khopo, ba etsetsa ntlo eo sakana-la-nkōpe, ba tulaka lemati, ba bua le monna-moholo, mong'a ntlo, ba re: “Ntša monna ea fihletseng mona ha hao, re tl'o mo ja maotoana!”
23Monna eo, e leng mong'a ntlo, a tsoela ho bona kantle, a re: “Oee, bana beso, kea le rapela! Se keng la etsa bokhopo! Monna enoa ke moeti oa ka! Se keng la etsa ketso ena e hlabisang lihlong! 24Bonang, morali oa ka oa moroetsana ke enoa, le mosali oa lefielo oa monna enoa; ke tla ba ntšetsa kantle hona joale, le ba silafatse, le etse seo le ratang ho se etsa ka bona, empa ho monna enoa le se ke la etsa ntho e hlabisang lihlong ena.”
25Ha banna bao ba sa mo mamele, monna eo a tšoara mosali oa lefielo oa monna oa moeti, a mo ntšetsa kantle, ho banna bao, seterateng, ba 'meta, ba mo robala bosiu bohle, ho fihlela mesong. Ha mafube a qala ho hlaba, ba mo tlohela, a tsamaea.
26Ha letsatsi le chaba, mosali a fihla a oela monyakong oa ntlo ea monna eo, moo mong'a hae a neng a le hona teng, ho fihlela bo e-sa. 27Mong'a hae a tsoha hoseng, a bula mamati a ntlo. Ha a e-tsoa, a re oa tsamaea, a bona mosali, e leng mosali oa hae oa lefielo, a tjapaletse fatše pel'a monyako oa ntlo, matsoho a hae a itšoareletse koseneng ea ntlo. 28A re ho eena: “Ema, re tsamaee!” Empa ha ho ea ileng a araba. Eaba monna eo oa ema, o belesa mosali holim'a tonki, o ea hahabo.
29Ha a fihla ka tlung ea hae, a nka thipa, a tšoara setōpō sa mosali oa hae oa lefielo, a se nonyolla manonyeletso, a se etsa likotoana tse leshome le metso e 'meli, eaba o li rōmela linaheng tsohle tsa Baiseraele. 30Ha e-ba joalo, hoo bohle ba boneng ba ileng ba re: “Ketso e tjena ha e es'o ka e etsahala, kapa e bonoa, ho tloha mohl'a letsatsi leo bana ba Iseraele ba neng ba nyoloha Egepeta ka lona, ho fihlela kajeno! E nahaneng, le ikeletse, le bue.”
