BAAHLOLI 16

₁Samosone a ea Gasa. Ha a le hona teng a bona mosali oa seotsoa, 'me a kena likobong tsa hae. ₂Ha tsebisoa baahi ba Gasa, ha thoe: “Samosone o tlile koano.” Ba etsetsa ntlo eo a leng ka ho eona sakana-la-nkōpe, 'me ba mo lalla bosiu bohle khorong ea motse. Ba khutsa bosiu bohle, ba re: “Re tla mo emela ho fihlela bosiu bo e-sa, ebe rea 'molaea.”

₃Samosone a robala moo ho fihlela har'a mpa ea bosiu. A tsoha har'a mpa ea bosiu, a nka mamati a khoro ea motse le likosene tsa 'ona tse peli; a a pshemola 'moho le leballo la 'ona, a a jara lehetleng, a a isa holim'a leralla le tobaneng le Heborone.

₄Kamorao ho mona Samosone a ratana le mosali e mong ea phelang ka khohlong ea Soreke. Lebitso la hae e ne e le Delila. ₅Mahosana a Bafilesita a fihla ho mosali eo, 'me a re ho eena: “Mo qeke, 'me u fumane hore na matla ana a hae a maholo a tsoa kae; le hore na re ka mo hlōla joang, hore re tle re tsebe ho mo tlama, re mo fokolise. E mong le e mong oa rōna o tla u nea chelete ea silefera e ka etsang boima ba likilo tse leshome le metso e meraro.”

₆Delila a re ho Samosone: “Kea u kōpa: Ak'u mpolelle hore na matla ana a hao a maholo hakana a tsoa kae, le hore na u ka tlangoa ka eng ho u fokolisa.”

₇Samosone a re ho eena: “Haeba ba ka ntlama ka likhoele tsa seqha tse supileng, tse ncha, tsa lesika le e-s'o ka le omisoa, ke tla fokola, ke tšoane le monna e mong le e mong.”

₈Mahosana a Bafilesita a tlisetsa Delila likhoele tse supileng tsa seqha, tse ncha, tse sa omisoang, eaba o mo tlama ka tsona. ₉Delila o ne a e-na le banna ba laletseng ka kamoreng e kahare. A re ho Samosone: “Samosone, Bafilesita ke bao!” Eaba Samosone o khaola likhoele tsa seqha joalokaha khoele ea motsitla e khaoha ha e angoa ke mollo. Eaba sephiri sa matla a hae se ntse se sa tsejoe.

₁₀Delila a re ho Samosone: “Bona mona, u mphoqile, 'me u mpoleletse leshano. Joale ak'u mpolelle hle: Ke eng eo u ka tlangoang ka eona?”

₁₁Samosone a re ho Delila: “Ha feela ba ka ntlama ka mehala e mecha, e e-s'o ka e sebelisoa, ke tla fokola, ke be joaloka monna e mong le e mong.”

₁₂Delila a nka mehala e mecha, a mo tlama ka eona, eaba o re ho eena: “Samosone, Bafilesita ke bao!” Banna ba laletseng ba ne ba le ka kamoreng e 'ngoe. Samosone a khaola mehala e matsohong a hae joalokaha eka ke khoele feela.

₁₃Delila a re ho Samosone: “Le ho fihlela joale u sa mphoqile, 'me u sa mpoleletse leshano. Ak'u mpolelle hore na ke eng eo u ka tlangoang ka eona!”

Samosone a re ho eena: “Ha u ka lōha lithapo tse supileng tsa moriri oa ka, ua li thata ka khoele e lōhang, eaba u li khokhothela fatše ka thakhisa, ke tla fokola, ke be joaloka monna e mong le e mong.”

₁₄Delila a mo koietsa, a khaleha. Eaba o thata lithapo tsa moriri oa hae ka khoele, o li khokhothela fatše ka thakhisa, o re ho Samosone: “Samosone, Bafilesita ke bao!” Samosone a phaphama, 'me a pshemola thakhisa, a lōkōlla le khoele.

₁₅Eaba Delila o re ho eena: “U ka re u nthata joang, empa pelo ea hao e se ho 'na? U mphoqile ka makhetlo ana a mararo, 'me ha u e-s'o ka u mpolella hore na matla ana a hao a maholo a tsoa kae.” ₁₆Ka tsatsi le leng le le leng a 'na a pheella ho 'motsa, 'me a mo qophella. Samosone a fela pelo hoo e neng eka o tla shoa.

₁₇Qetellong a 'molella 'nete, a re ho eena: “Hlooho ea ka ha e e-s'o ka e beoloa, hobane haesale ke le mokhethoa oa Molimo ho tloha pōpelong ea 'mè. Haeba nka beoloa, matla ana a ka a tla fela, ke fokole, ke be joaloka monna e mong le e mong.”

₁₈Ha Delila a bona hore o 'moleletse 'nete eohle, a rōmela maqosa ho bitsa mahosana a Bafilesita, a re: “Kajeno tloong, hobane o mpoleletse 'nete.” Joale mahosana a Bafilesita a tla ho eena, a nkile chelete. ₁₉Delila a sika Samosone, a mo robatsa. Eaba o bitsa monna e mong, 'me eo a beola lithapo tse supileng tsa moriri o hloohong ea Samosone. Joale Delila a qala ho hlōkōfatsa Samosone, hobane o ne a feletsoe ke matla.

₂₀Delila a hōoa, a re: “Samosone, Bafilesita ke bao!”

Samosone a phaphama borokong, a re: “Ke tla phonyoha joaloka kamehla, 'me ke tla itōkōlla.” Empa o ne a sa tsebe hore Morena o mo furaletse.

₂₁Bafilesita ba mo tšoara, ba mo honya mahlo, ba mo theolela Gasa. Ba mo tlama ka mahlaahlela a lethose, 'me mosebetsi oa hae chankaneng, ea e-ba oa ho sila ka leloala. ₂₂Kamora' hoba hlooho ea hae e beoloe, moriri oa hae oa qala ho mela hape.

₂₃Mahosana a Bafilesita a kopana, ho etsetsa Dagone, molimo oa 'ona, nyehelo e kholo ea sehlabelo, le ho ithabisa, hobane a ne a re: “Molimo oa rōna o neelane ka Samosone, sera sa rōna, matsohong a rōna.”

₂₄Ha sechaba se bona Samosone sa boka molimo oa sona, sa re: “Molimo oa rōna o neelane ka sera sa rōna matsohong a rōna, e leng mosenyi oa naha ea rōna, ea ileng a bolaea batho ba rōna ba bangata.”

₂₅Eare ha ba se ba nyakaletse ba re: “Tlisang Samosone, a tl'o re bapalla.” Ba tlisa Samosone a e-tsoa chankaneng, 'me a bapalla moo ba ntseng ba mo shebile. Ba 'mea pakeng tsa litšiea tse peli.

₂₆Samosone a re ho moshanyana ea neng a mo tataisa: “Ak'u ntumelle ke tšoare litšiea tse peli tse tšehelitseng ntlo, ke tle ke itšetlehe ka tsona.” ₂₇Ntlo ena e ne e tletse banna le basali; ho e-na le mahosana 'ohle a Bafilesita. Holim'a marulelo a ntlo ena ho ne ho lutse banna le basali ba likete tse tharo, ba neng ba ntse ba lebeletse Samosone ha a bapala.

₂₈Samosone a ipiletsa ho Morena, a re: “Oho, Morena, kea u rapela: Ak'u nkhopole, 'me u ke u 'matlafatse ka lekhetlo lena le le leng fella, Molimo, e le hore ke tle ke pheteletse mahlo a ka a mabeli ka Bafilesita.” ₂₉Samosone a itšoarella ka matla litšieeng tse peli tse bohareng ba ntlo, tse tšehelitseng ntlo. A itšetleha ka tsona, letsoho la hae le letona le tšoere e 'ngoe, le le letšehali le tšoere e 'ngoe. ₃₀Eaba Samosone o re: “A nke ke shoe, 'moho le Bafilesita!” A hōfōla ka matla a hae 'ohle, 'me ntlo ea oela holim'a mahosana, le holim'a sechaba sohle se neng se le kahar'a eona. Bao a ileng a ba bolaea ha a e-shoa ba ne ba feta bao a ileng a ba bolaea ha a sa ntsane a phela.

₃₁Bana babo le bohle ba ntlo eabo, ba theoha, ba fihla ba mo nka, ba mo nyolla, ba mo epela pakeng tsa Sora le Eshetaole, moo ntat'ae Manōoa a ileng a epeloa teng. Samosone e ne e ile ea e-ba moahlōli oa Baiseraele ka lilemo tse mashome a mabeli.